Dagiti Rag-o iti Pannagna iti Kinatarnaw
“Ti bendision ni Jehova—isu dayta ti mangpabaknang, ket awan rigat nga inayonna iti dayta.”—PROVERBIO 10:22.
1, 2. Apay a nasken a liklikantayo ti nalabes a panangpampanunot iti masanguanan?
“TI NALABES a panangpampanunot iti masanguanan . . . lapdannatayo a mangtagiragsak iti adda kadatayo iti agdama,” kinuna ti maysa nga Americano a pilosopo. Pudno daytoy kadagiti ubbing a maseknan unay no ania ti aramidenda inton dumtengda iti kinaadulto nga uray la limmabas ti kinaubingda a dida man la natagiragsak dayta.
2 Uray dagiti agdaydayaw ken ni Jehova mapanunotda met ti kasta no dadduma. Usigenyo ti mabalin a mapasamak. Il-iliwentayo ti kaitungpalan ti kari ti Dios a panangyegna iti maysa a paraiso a daga. Sigagagar nga ur-urayentayo ti maysa a biag nga awanan iti sakit, panaglakay, rigat, ken panagsagaba. Nupay nasayaat met nga inanamaen dagiti kasta a bambanag, ania ti mapasamak no maseknantayo unay kadagiti pisikal a bendision iti masanguanan ket ditay maapresiar dagiti agdama a naespirituan a bendision a tagtagiragsakentayo ita? Nakalkaldaang la ketdi dayta! Mabalin a nalakatayto a maupay ken ‘agsakit ti pusotayo gapu ta naitantan ti inanamaentayo’ a naiduma iti pampanunotentayo. (Proverbio 13:12) Mabalin a maupay wenno ay-ayentayo ti bagitayo gapu kadagiti parikut ken pakarigatan iti biag. Imbes a sarangtentayo dagiti di makaay-ayo a kasasaad, nalabit nga agbalintayo ketdi a reklamador. Bueno, maliklikantayo amin dagita no siyayaman nga utobentayo dagiti bendision a tagtagiragsakentayo ita.
3. Ania ti usigentayo iti daytoy nga artikulo?
3 “Ti bendision ni Jehova—isu dayta ti mangpabaknang, ket awan rigat nga inayonna iti dayta,” kuna ti Proverbio 10:22. Saan kadi a makaparagsak a bendision ti narang-ay a naespirituan a kasasaad dagiti agdama nga adipen ni Jehova? Usigentayo ti dadduma nga aspeto ti naespirituan a kinarang-aytayo ket kitaentayo no ania ti personal a kaipapananda kadatayo. Ti napudno a panangusig kadagiti bendision nga iburburay ni Jehova ‘kadagiti nalinteg a magmagna iti kinatarnawna’ sigurado a pabilgenna ti determinasiontayo nga agtultuloy nga agserbi a sirarag-o iti nailangitan nga Amatayo.—Proverbio 20:7.
‘Dagiti Bendision a Mangpabaknang Kadatayo’ Ita
4, 5. Ania a sursuro ti Biblia ti nangnangruna nga ipatpategyo, ken apay?
4 Umiso a pannakaammo kadagiti sursuro ti Biblia. Dagiti relihion ti Kakristianuan kaaduanna nga ibagada a patienda ti Biblia. Nupay kasta, saanda nga agtutunos no ania a talaga ti isursuro ti Biblia. Uray dagiti agkakarelihionan masansan a nagduduma ti panangmatmatda no ania a talaga ti isursuro ti Kasuratan. Anian a naiduma ti kasasaadda kadagiti adipen ni Jehova! Uray ania ti pagilian, kultura, wenno pulitayo, agdaydayawtayo iti Dios nga ammotayo ti naganna. Isu ket saan a maysa a misterioso a nagkatlo a dios. (Deuteronomio 6:4; Salmo 83:18; Marcos 12:29) Ammotayo met nga asidegen a marisut ti kangrunaan nga isyu mainaig iti sapasap a kinasoberano ti Dios ket no agtalinaedtayo a natarnaw kenkuana, maitandudotayo ti kinasoberanona. Ammotayo ti kinapudno maipapan kadagiti natay ken saantayo a matmatan a nakabutbuteng ti Dios, a tutuokenna kano dagiti tattao iti umap-apuy nga impierno wenno ikabilna ida iti purgatorio.―Eclesiastes 9:5, 10.
5 Kanayonanna, anian a rag-o a maammuan a saantayo a maysa a naiparparna a produkto ti di nainkalintegan nga ebolusion! Imbes ketdi, pinarsuanatayo ti Dios, nga inaramidnatayo iti ladawanna. (Genesis 1:26; Malakias 2:10) “Idayawkanto agsipud ta iti nakaam-amak a pamay-an nakaskasdaaw ti pannakaaramidko,” inkanta ti salmista iti Dios. “Nakaskasdaaw dagiti aramidmo, kas pagaammo unay ti kararuak.”—Salmo 139:14.
6, 7. Ania a panagbalbaliw iti biagyo wenno iti biag dagiti am-ammoyo ti nagbanag a makagunggona?
6 Pannakawayawaya kadagiti makadangran a bisio ken aramid. Nakaad-adu ti pakdaar ti media maipapan kadagiti peggad ti panagsigarilio, nalabes a panaginum, ken kinalulok iti sekso. Kaaduanna a mayaleng-aleng dagita a pakdaar. Ngem ania ti aramiden ti napasnek a tao no maadalna a ti pudno a Dios kondenarenna dagiti kasta bambanag ken saan a maay-ayo kadagidiay makipaspaset kadagita? Sigurado a matignay dayta a tao a mangiwaksi kadagita nga aramid! (Isaias 63:10; 1 Corinto 6:9, 10; 2 Corinto 7:1; Efeso 4:30) Nupay aramidenna dayta kangrunaanna tapno maay-ayona ni Jehova a Dios, masagrapna pay dagiti kanayonan a gunggona―nasaysayaat a salun-at ken natalna a panunot.
7 Adu ti marigatan a mangisardeng kadagiti dakes a bisioda. Kaskasdi, iti kada tawen pinullo ribu ti nagballigi a mangaramid iti dayta. Indedikarda ti biagda ken ni Jehova ken nagpabautisarda iti danum, a publiko a mangipakaammo nga inwaksidan dagiti aramid a di makaay-ayo iti Dios. Anian a makaparegta dayta kadatayo amin! Ad-adda a tumibker ti determinasiontayo nga agtalinaed a siwayawaya manipud panangadipen ti basol ken makadangran nga aramid.
8. Ania a balakad ti Biblia ti mangparayray iti kinaragsak ti pamilia?
8 Naragsak a biag ti pamilia. Iti adu a pagilian, marmargaay ti relasion ti pamilia. Adu nga agassawa ti agdibdiborsio, a masansan a mangibati iti nasaem a kapadasan kadagiti annak. Iti dadduma a pagilian iti Europa, dandani 20 porsiento kadagiti amin a pamilia ket agsolsolo ti nagannakda. Kasanonatayo a tinulongan ni Jehova a magna iti dana ti kinalinteg no maipapan iti pamilia? Basaenyo ti Efeso 5:22–6:4, ket imutektekanyo ti nagsayaat a balakad ti Sao ti Dios kadagiti asawa a lallaki, asawa a babbai, ken annak. Ti panangyaplikar iti linaonna ken kadagiti dadduma pay a teksto iti Kasuratan sigurado a palagdaenna ti singgalut ti agassawa, tulonganna dagiti nagannak a mangpadakkel a siuumiso kadagiti annak, ken parayrayenna ti kinaragsak ti pamilia. Saan kadi a bendision dagita a rumbeng a pagrag-oan?
9, 10. Kasano a naidumatayo iti lubong no maipapan iti panangmatmat iti masanguanan?
9 Pammatalged nga asidegen a marisut dagiti sangalubongan a parikut. Iti laksid dagiti pannakaammo iti siensia ken teknolohia ken dagiti panangikagumaan ti dadduma a lider, di latta narisut dagiti dadakkel a parikut iti agdama a biag. Ni Klaus Schwab, ti nangipasdek iti World Economic Forum, nabiit pay a kinunana nga “umat-atiddog ti listaan dagiti karit a pakaipaspasanguan ti lubong bayat nga umab-ababa ti tiempo a panangrisut kadagita.” Dinakamatna “dagiti peggad a mangap-apektar iti amin a nasion kas iti terorismo, pannakadadael ti aglawlaw, ken saan a natalged a kasasaad iti pinansial.” Ti konklusion ni Schwab: “Maipaspasango ita ti lubong kadagiti realidad nga agkalikagum iti panagkaykaysa ken naganat a panagtignay.” Bayat ti panaglabas ti maika-21 a siglo, nagtalinaed a nalidem ti namnama ti sangatauan.
10 Anian a yamantayo a makaammo a nangyussuat ni Jehova iti urnos a makabael a mangrisut kadagiti amin a parikut ti sangatauan―ti Mesianiko a Pagarian ti Dios! Babaen iti dayta, ti pudno a Dios ‘pagsardengenna dagiti gubat’ ken iyegna ti ‘naruay a talna.’ (Salmo 46:9; 72:7) Ti napulotan nga Ari, ni Jesu-Kristo, ‘ispalennanto dagidiay napanglaw, daydiay naparigatan, ken daydiay nanumo manipud iti pannakairurumen ken kinaranggas.’ (Salmo 72:12-14) Iti sidong ti turay ti Pagarian, saanto nga agkurang ti taraon. (Salmo 72:16) Ni Jehova “punasennanto ti amin a lua kadagiti mata[tayo], ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.” (Apocalipsis 21:4) Naipasdeken ti Pagarian idiay langit ken asidegen nga agtignay tapno risutenna ti amin a parikut ditoy daga.—Daniel 2:44; Apocalipsis 11:15.
11, 12. (a) Ti kadi pananggun-od kadagiti ragragsak mangyegda iti manayon a kinaragsak? Ilawlawagyo. (b) Ania ti mangyeg iti pudpudno a kinaragsak?
11 Ammotayo no ania ti mangyeg iti pudpudno a kinaragsak. Ania ti mangyeg iti pudpudno a kinaragsak? Maysa a sikologo ti nagkuna nga adda tallo a pakabuklan ti kinaragsak―ragragsak, pannakiraman (pannakipaset kadagiti aktibidad a kas iti trabaho ken pamilia), ken pannakapnek (panangragpat iti dakdakkel a panggep wenno kalat agpaay kadagiti sabali). Kadagita a tallo, ti ragragsak ti imbilangna a kabassitan iti pateg ket kinunana: “Makapainteres daytoy yantangay adu a tattao ti nangipamaysa iti biagda iti pananggun-od kadagiti ragragsak.” Ania ti panangmatmat ti Biblia iti dayta a banag?
12 Kinuna ni Solomon nga ari ti nagkauna nga Israel: “Siak, mismo a siak, kinunak iti pusok: ‘Umayka ita, bay-am a padasenka iti panagrag-o. Kasta met, kitaem ti naimbag.’ Ket, adtoy! dayta met ket kinaubbaw. Kinunak iti panagkatawa: ‘Di kinasimbeng!’ ket iti panagrag-o: ‘Ania ti ar-aramiden daytoy?’” (Eclesiastes 2:1, 2) Iti panangmatmat ti Kasuratan, temporario laeng ti kinaragsak nga iyeg dagiti ragragsak. Komusta met ti pannakiraman iti trabaho? Makipaspasettayo iti kasayaatan a trabaho―ti panangikasaba iti Pagarian ken ti panangaramid iti adalan. (Mateo 24:14; 28:19, 20) Babaen ti panangiranudtayo iti mensahe ti pannakaisalakan a nailawlawag iti Biblia, makipaspasettayo iti trabaho a mabalin nga agresulta iti pannakaisalakantayo ken dagidiay dumngeg kadatayo. (1 Timoteo 4:16) Kas ‘katrabahuan ti Dios,’ tagtagiragsakentayo ti kinapudno nga “ad-adu ti kinaragsak iti panangted ngem iti panangawat.” (1 Corinto 3:9; Aramid 20:35) Babaen daytoy a trabaho, ad-adda a makapnek ti biagtayo ken adda pangsungbat ti Dios iti daydiay mangum-umsi kenkuana, ni Satanas a Diablo. (Proverbio 27:11) Wen, impakita ni Jehova a matagiragsaktayo ti pudpudno ken manayon a kinaragsak no addaantayo iti nadiosan a debosion.―1 Timoteo 4:8.
13. (a) Iti ania a wagas a maysa a bendision a pagrag-oantayo ti Teokratiko nga Eskuelaan ti Panagministro? (b) Kasanokayo a nagunggonaan iti Teokratiko nga Eskuelaan ti Panagministro?
13 Addaantayo iti napateg ken epektibo a programa ti panagsanay. Agserserbi ni Gerhard kas panglakayen iti maysa a kongregasion dagiti Saksi ni Jehova. Malagipna pay ti kinaagtutubona: “Idi agtutuboak pay, adda dakkel a parikut iti panagsaok. No matarantaak, marigatanak nga agsao iti nalawag ket mangrugiak nga agbeddal. Nababa ti panangkitak iti bagik, banag a nangupay kaniak. Inserrekdak dagiti dadakkelko iti maysa a kurso a mangparang-ay iti panagsao ngem saan a nakatulong dayta a panangikagumaanda. Ti problemak ket sikolohikal, saan a pisikal. Ngem adda nagsayaat a probision ni Jehova―ti Teokratiko nga Eskuelaan ti Panagministro. Idi nagpalistaak iti daytoy nga eskuelaan, napatanorko ti kinatured. Inkagumaak nga inyaplikar dagiti maad-adalko. Ket pudno nga epektibo! Limmawag ti panagsaok, naiwaksik ti pannakaupayko, ken nagbalinak a naturtured iti ministerio. Ita, agpalpalawagak payen. Pudno nga agyamanak ken ni Jehova, a nangpasayaat iti kalidad ti biagko babaen iti daytoy nga eskuelaan.” Saan kadi a panggapuantayo nga agrag-o ti wagas ti panangsanay kadatayo ni Jehova a mangaramid iti trabahona?
14, 15. Iti tiempo ti panagdukot, ania a tulong ti mabalin a magun-odan? Iyilustraryo.
14 Adda personal a relasiontayo ken ni Jehova ken saranayennatayo ti nagkaykaysa a sangalubongan a panagkakabsat. Kasta unay ti danag ni Katrin, nga agnanaed idiay Alemania, idi nadamagna ti dakkel a ginggined a nagresulta iti tsunami iti makin-abagatan a daya nga Asia. Nagpasiar idiay Thailand ti balasangna idi napasamak dayta a kalamidad. Iti 32 nga oras, saan nga ammo daytoy nga ina no sibibiag pay ti anakna wenno maysan kadagiti natay, nga umadu nga umadu bayat ti panaglabas ti oras. Anian a nabang-aran ni Katrin idi makaawat iti awag iti telepono a nangipasigurado a natalged ti kasasaad ti balasangna.
15 Ania ti nakatulong ken ni Katrin kadagidi a panawen ti panagdanagna? Insuratna: “Binusbosko ti dandani amin a panawenko a nagkarkararag ken ni Jehova. Maulit-ulit a nadlawko no kasano a nangted dayta kaniak iti dakkel a pammabileg ken talna ti panunot. Malaksid iti dayta, sinarungkaran ken pinaregtadak dagiti naayat a kapammatian.” (Filipos 4:6, 7) Anian a nagrigat koma kenkuana dagidi a tiempo no saan a gapu iti bang-ar nga inyeg ti panagkararag ken ni Jehova ken ti liwliwa nga impaay dagiti naayat a kapammatian! Maysa met a bendision ti nasinged a relasiontayo ken ni Jehova ken iti Anakna, agraman ti nasinged a timpuyogtayo kadagiti Kristiano a kakabsat, banag a nakapatpateg a ditay koma tagilag-anen.
16. Mangted iti pagarigan a mangipakita iti pateg ti namnama a panagungar.
16 Ti namnama a makitatayto manen dagiti pimmusay nga ing-ingungotentayo. (Juan 5:28, 29) Maysa nga agtutubo nga agnagan iti Matthias ti napadakkel kas Saksi ni Jehova. Ngem gapu ta dina nabigbig dagiti bendision a sagsagrapenna, immikay iti kongregasion Kristiano idi tin-edyer pay. Insuratna ita: “Pulos a diak naaddaan iti nalapat a pannakipatang ken ni tatangko. Kanayonkami nga agrikkiar. Ngem ammok a ti pagimbagak ti kanayon a pampanunotenna. Ay-ayatennak unay, banag a diak nabigbig kadagidi a tiempo. Idi 1996, bayat a situtugawak iti abay ti iddana, nga iggemko ti imana ken napalalo ti sangitko, imbagak kenkuana no kasano a pagbabawyak ti amin nga inaramidko ken isu ket ay-ayatek unay. Ngem dinakon mangngeg. Kalpasan ti nabiit a panagsakitna, pimmusay ni tatangko. No makitak ni tatangko inton tiempo ti panagungar, punnuanminto dagiti nasayang idi a gundaway. Ken sigurado a maragsakanto no maammuanna a maysaak itan a panglakayen ken agserserbikami ken ni baketko kas payunir.” Anian a bendision kadatayo ti namnama a panagungar!
“Awan Rigat nga Inayonna iti Dayta”
17. Kasano a makatulong kadatayo ti panangutob kadagiti bendision nga ipapaay ni Jehova?
17 No maipapan iti nailangitan nga Amana, kinuna ni Jesu-Kristo: “Pagleggakenna ti initna kadagiti nadangkes a tattao ken kadagiti naimbag ket pagtuduenna kadagiti nalinteg a tattao ken kadagiti nakillo.” (Mateo 5:45) No ni Jehova mangted iti bendision uray kadagiti nakillo ken dakes a tattao, anian a nangnangruna a bendisionanna dagidiay magmagna iti dana ti kinatarnaw! “Ti aniaman a naimbag saanto a medmedan ni Jehova kadagidiay magmagna iti kinaawan pagkurangan,” kuna ti Salmo 84:11. No utobentayo ti naisangsangayan a panangaywan ken pannakaseknan nga ipakpakitana kadagidiay agayat kenkuana, anian a mapno ti pusotayo iti panagyaman ken rag-o!
18. (a) Apay a makuna nga awan ti rigat nga inayon ni Jehova kadagiti pamendisionna? (b) Apay nga agsagaba ti adu a nasungdo iti Dios?
18 “Ti bendision ni Jehova”—dayta ti pakaigapuan ti naespirituan a kinarang-ay dagiti adipenna. Ket naipanamnama kadatayo nga “awan rigat nga inayonna iti dayta.” (Proverbio 10:22) Apay ngarud a makapasar kadagiti pannubok ken pakasuotan ti adu a nasungdo kenkuana, a mangyeg kadakuada iti nakaro a saem ken panagsagaba? Makapasartayo kadagiti pakarigatan ken pakadukotan gapu iti tallo a kangrunaan a rason. (1) Ti pagannayasantayo nga agaramid iti dakes. (Genesis 6:5; 8:21; Santiago 1:14, 15) (2) Ni Satanas ken dagiti sairona. (Efeso 6:11, 12) (3) Ti dakes a lubong. (Juan 15:19) Nupay ipalpalubos ni Jehova a mapasarantayo dagiti dakes a bambanag, saan nga isu ti mangpatpataud kadagita. Kinapudnona, “tunggal naimbag a sagut ken tunggal naan-anay a rangkap aggapu iti ngato, ta bumaba dayta manipud iti Ama dagiti nailangitan a lawag.” (Santiago 1:17) Awan rigat nga iyeg dagiti pamendision ni Jehova.
19. Ania ti agur-uray kadagidiay agtultuloy a magna iti kinatarnaw?
19 Ti naespirituan a kinarang-ay ket kanayon a nainaig iti panagbalintayo a nasinged iti Dios. No nasinged ti relasiontayo kenkuana, ‘sitatalged a makaurnongtayo maipaay iti bagbagitayo iti nasayaat a pamuon maipaay iti masanguanan, tapno mapetpetantayo a sititibker ti pudpudno a biag’―ti biag nga agnanayon. (1 Timoteo 6:12, 17-19) Iti baro a lubong ti Dios, matagiragsaktayto agpadpada dagiti naespirituan ken pisikal a bendision. Amin nga ‘umim-imdeng iti timek ni Jehova’ tagiragsakendanto ti pudpudno a biag. (Deuteronomio 28:2) Buyogen ti nabileg a determinasion, sirarag-o koma nga itultuloytayo ti magna iti kinatarnaw.
Ania ti Naadalyo?
• Apay a saan a nainsiriban ti nalabes a panangpampanunot iti masanguanan?
• Ania dagiti bendision a tagtagiragsakentayo ita?
• Apay nga agsagaba dagiti matalek nga adipen ti Dios?