Kasanom a Maipakita ti Pudno a Kinapakumbaba?
NAGPATEG iti imatang ti Dios ti pudno a kinapakumbaba. Insurat ni Santiago: “Ti Dios busorenna dagiti natangsit, ngem itedna ti di kaikarian a kinamanangaasi kadagiti napakumbaba.” (Santiago 4:6) Mabalin nga adda iti panunot ni Santiago dagiti nabasana iti Hebreo a Kasuratan. “Nupay natan-ok ni Jehova, adda pay la panangpadayawna iti napakumbaba; ngem ti napalangguad mabigbigna manipud adayo.” “Ti napalangguad a panagkitkita ti tao mapaemmanto, ken ti kinatangsit dagiti tattao maparukbabto, ket ni Jehova laeng ti madaydayaw.” “Pudno nga umsien [ti Dios] dagiti managumsi; ngem itdenna ti parabur iti napakumbaba.”—Salmo 138:6; Isaias 2:11; Proverbio 3:34.
Imparegta met ni apostol Pedro ti kinapakumbaba. Insuratna: “Dakayo amin bariksanyo ti bagbagiyo iti kinapakumbaba iti panagpampanunot maipaay iti maysa ken maysa, agsipud ta ti Dios busorenna dagiti natangsit, ngem mangted iti di kaikarian a kinamanangaasi kadagiti napakumbaba.”—1 Pedro 5:5.
Ti Ulidan ni Kristo iti Kinapakumbaba
Mabalin a maisaludsodmo, Ania ti pagsayaatan wenno pagimbagan ti panagbalin a napakumbaba? Para iti tao a mangikagkagumaan nga agbalin a pudno a Kristiano, nagpateg ti sungbat—ti panagbalin a napakumbaba ket panagbalin a kas ken Kristo. Impakita ni Jesus ti kinapakumbabana babaen ti panangawatna iti naisangsangayan nga annongen, a bimmaba manipud langit ket nagbalin a nanumo a tao ditoy daga, a nababbaba ngem dagiti anghel. (Hebreo 2:7) Nupay isu ti Anak ti Dios, inibturanna dagidi panangpabpabain kenkuana dagiti relihioso a kabusorna. Nagtalinaed a natanang bayat dagiti pannakasusuotna, nupay mabalinna koma ti agpaibaon iti adu a lehion dagiti anghel a bumadang kenkuana.—Mateo 26:53.
Kamaudiananna, naibabain ni Jesus babaen ti pannakaibitinna iti kayo a pagtutuokan, ngem nagtalinaed a matalek ken Amana. Dayta ti gapuna a naikuna ni Pablo maipapan kenkuana: “Pagtalinaedenyo kadakayo daytoy a kababalin iti isip nga adda met ken Kristo Jesus, a, nupay adda idi iti langa ti Dios, saanna a pinanunot ti panangagaw, kayatna a sawen, nga isu makipada koma iti Dios. Saan, no di ket inuksobanna ti bagina ket innalana ti langa ti maysa nga adipen ket nagbalin a kaas-asping ti tattao. Ad-adda pay ngem dayta, idi nasarakanna ti bagina iti langa a kas maysa a tao, impakumbabana ti bagina ket nagtulnog agingga iti ipapatay, wen, ipapatay iti kayo a pagtutuokan.”—Filipos 2:5-8.
No kasta, kasanotay a maiparangarang ti pudno a kinapakumbaba? Kadagiti praktikal a kasasaad, kasanotay a makapagtignay a sipapakumbaba imbes a sitatangsit?
Ti Reaksion ti Napakumbaba a Tao
Usigentayo ti kinapakumbaba iti benneg ti trabaho, iti man panggedan wenno iti Nakristianuan a serbisio. Tapno naannayas ti pannakairingpas ti trabaho, mabalin a kasapulan dagiti manangaywan, manedyer, ken superbisor. Nasken nga adda mangdesision kadagiti bambanag. Kasano ti panangmatmatmo iti dayta? Kunam kadi, “Aniat’ panagkunana iti bagina ta dikdiktarannak ketdin? Nabaybayagakon iti daytoy a trabaho ngem isuna.” Wen, no natangsitka, tagidaksem ti agpasakup. Iti sabali a bangir, ti napakumbaba a tao ikagumaanna “nga awan ti aniaman nga aramiden[na] gapu iti kinamannakirupir wenno gapu iti panangipasindayaw iti bagi, no di ket buyogen ti kinapakumbaba iti isip nga ibilang[na] a dagiti dadduma nangatngatoda.”—Filipos 2:3.
Ania ti reaksionmo no ub-ubing wenno babai ti mangipaay iti singasing? No napakumbabaka, uray kaskasano ikonsiderarmo dayta. No natangsitka, tagidaksem wenno iwaksim a dagus. Kaykayatmo kadi ti pammadayaw ken pammasablog a pakadadaelam wenno ti balakad nga agpaay iti pagimbagam?—Proverbio 27:9; 29:5.
Kabaelam kadi a sanguen ti rigat? Ti kinapakumbaba tulongannaka a mangsango kadagiti narigat a kasasaad ken agibtur, kas ken Job. No natangsitka, nalakaka a maup-upay ken nalabit sakiten ti nakemmo ti nasaem a kasasaad ken ti ipagarupmo a pannakairurumen.—Job 1:22; 2:10; 27:2-5.
Naayat ken Manangpakawan ti Napakumbaba
Dagiti dadduma marigatanda a mangibaga iti, “Dispensarennak. Nagbiddutak. Hustoka.” Apay? Napalangguadda unay! Ngem ti napaypayso a panagpadispensar masansan a sebsebanna ti panagsubang dagiti agassawa.
Madadaanka kadi a mangpakawan iti tao a nakabasol kenka? Wenno, gapu iti kinatangsit, agim-impenka kadi iti sakit ti nakem, nalabit iti adu nga aldaw ken bulan, a dimo kayat a kasarita ti tao nga ipagarupmo nga adda atrasona kenka? Agibalbaleska kadi? Adda dagiti tattao a napapatay gapu iti panagibales. Dagiti dadduma mangpadpadakesda. Iti sabali a bangir, naayat ken manangpakawan ti tao a napakumbaba. Apay? Agsipud ta ti ayat saan nga agipempen iti gura. Madadaan idi ni Jehova a mangpakawan kadagiti Israelita no agpakumbabada. Ti napakumbaba a pasurot ni Jesus madadaan a mangpakawan, uray no maulit-ulit!—Joel 2:12-14; Mateo 18:21,22; 1 Corinto 13:5.
Ti tao a napakumbaba ‘idaulona nga ipakita ti pammadayaw kadagiti sabsabali.’ (Roma 12:10) Kastoy ti mabasa iti New International Version: “Padayawanyo ti tunggal maysa a nangnangruna ngem iti bagiyo.” Padpadayawam kadi dagiti dadduma ken ap-apresiarem dagiti abilidad ken talentoda? Wenno kanayonka kadi nga agbirok iti pangbabalawam tapno madadael ti pakasarsaritaanda? Wen, kabaelam kadi a padayawan a sipupudno dagiti dadduma a tattao? No marigatanka iti daytoy a banag, nalabit kinaawan panagtalek iti bagi ken kinatangsit ti problemam.
Di makaan-anus ti tao a natangsit. Napasensia ken naanus ti tao a napakumbaba. Sika ngay? Marurodka kadi iti aniaman nga ipagarupmo a di nasayaat a panangtrato? Ti kasta a reaksion isu ti kasungani ti mabayag a panagitured. No napakumbabaka, saan a nangato ti panangipapanmo iti bagim. Laglagipem ti napasamak idi nagpannakkel dagiti adalan ni Jesus. Nagsusupiatda no siasino ti katan-okan kadakuada. Nalipatanda nga agpapadada nga ‘awan kaes-eskanna nga ad-adipen’!—Lucas 17:10; 22:24; Marcos 10:35-37, 41.
Ti mannurat a Pranses a ni Voltaire dineskribirna ti kinapakumbaba kas “ti kinaemma ti kararua . . . pangparmek iti kinatangsit.” Wen, ti kinapakumbaba ket nanumo a panagnaknakem. Naemma, saan a napalangguad, ti tao a napakumbaba. Dakkel ti panagraemna ken nadayaw.
Isu nga apay nga ikagumaantayo ti agbalin a napakumbaba? Agsipud ta makaay-ayo iti Dios ti kinapakumbaba ken tulongannatayo nga agpaidalan iti Dios. Maysa a rason ti kinapakumbaba ni Daniel, isu nga imbilang ni Jehova ti propeta a “makaay-ayo unay” ket nangibaon iti anghel a nangted kenkuana iti sirmata! (Daniel 9:23; 10:11, 19) Adu a gunggona ti iyeg ti kinapakumbaba. Mangyeg kadagiti pudno a gagayyem a mangayat kenka. Napatpateg pay, mangyeg dayta iti pammendision ni Jehova. “Ti gunggona ti napakumbaba ken panagbuteng ken Jehova, kinabaknang, dayaw, ken biag.”—Proverbio 22:4.
[Ladawan iti panid 7]
Ti sipapakumbaba a panagpadispensar mapaannayasna ti biag