Report Dagiti Manangiwaragawag iti Pagarian
Panangaskasaba ‘iti Mainugot a Panawen ken iti Nariribuk a Panawen’
IDI adda gubat iti pagilian ti Bosnia ken Herzegovina, rinibu ti nakapadas kadagiti nakaro a rigat. Kabayatan dayta narigat a tiempo, inaramid dagiti Saksi ni Jehova ti amin a kabaelanda a mangyeg iti pammaregta ken namnama kadagiti tattao. Dagiti sumaganad ket paset ti insurat ti maysa a Saksi a nabayag bassit a nagserbi idiay Sarajevo.
“Narigat ti biag ditoy, ngem nalaka nga umawat dagiti tattao iti kinapudno ti Biblia. Nagsayaat a pagwadan dagiti Saksi sadiay no iti kinaregget. Agkirkirangda no kadagiti material a banag, ngem addaanda iti nagsayaat nga espiritu. Gistay amin dagiti agtutubo iti kongregasion ket adda iti amin-tiempo a ministerio. Maparparegta dagiti kabbaro nga agibumbunannag iti daytoy a kinaregta. Gapuna, saan a karkarna nga 60 nga oras wenno nasursurok pay ti binulan a mabusbosda iti ministerio manipud iti umuna a bulanda iti serbisio.
“Malaksid iti panangaskasaba iti binalaybalay, pinadasmi met dagiti sabali a pamay-an tapno madanon dagiti tattao. Kas pagarigan, nasayaat dagiti resulta ti panangiranudmi kadagiti publikasion ti Biblia kadagiti adu a sementerio iti siudad.
“Adda met dagidiay mangaskasaba kadagiti ospital. Iti Cardiology Department ti maysa nga ospital idiay Sarajevo, nangala ti mamangulo a doktor iti Disiembre 8, 1996 nga Agriingkayo!, nga addaan parupa a tema nga ‘Atake Ti Puso—Aniat’ Maaramidan?’ Nagkiddaw kadagiti kanayonan a kopia tapno mairanudna met kadagiti dadduma a doktor. Kalpasanna, napalubosan dagiti Saksi a bumisita kadagiti amin a pasiente iti departamentona. Gapuna, iti nasurok la bassit a maysa nga oras, nasurok a 100 a magasin ti naiwaras kadagiti nagduduma a pasiente. Adu kadagiti pasiente ti nagkuna a daydi ti damo nga adda bimmisita kadakuada iti ospital a nangipaay iti pammaregta ken namnama.
“Iti sabali pay a gundaway, nasarungkaran met ti Pediatric Department. Naiwaras dagiti magasin nga addaan kadagiti artikulo a maibagay kadagiti ubbing. Nangala met ti mamangulo a doktora iti sumagmamano a kopia ti libro a Ti Librok Dagiti Estoria ti Biblia para iti siled a pagbasaan. Ita, dagiti inna a sumarungkar kadagiti annakda idiay ospital inaldaw nga ibasaanda ida kadagiti estoria ti Biblia. Nayurnos met a masarungkaran daytoy a doktora iti pagtaenganna.
“Idiay Sarajevo, adda rinibu a soldado ti NATO [North Atlantic Treaty Organization] a naggapu kadagiti nagduduma a pagilian. Nakaskasabaan met a naimbag dagitoy. No dadduma, pindaenmi dagiti armored car, nga aramatenmi ti bokleta a Good News for All Nations agraman dagiti magasin a Pagwanawanan ken Agriingkayo! iti nagduduma a pagsasao. Nasurok a 200 a magasin ti naipaima kadagiti kuartel dagiti soldado nga Italiano. Makapasiddaaw ta adu kadagiti soldado nga Italiano ti nagkuna nga awan pay pulos idi ti nakasaritada a Saksi ni Jehova. Bueno, nakasaritami ida sadi Sarajevo.
“Iti maysa nga aldaw, nakaparada ti maysa nga armored car iti igid ti kalsada. Tinuktokko dayta babaen ti payongko, ket adda timman-aw a soldado. Intukonko kenkuana ti Pagwanawanan nga addaan parupa a tema a ‘Dagiti Mensahero ti Talna—Siasinoda?’ Kinitanak ti soldado sana dinamag, ‘Maysaka kadi kadagiti Saksi ni Jehova?’ Idi maammuanna a Saksiak, kinunana, ‘Diak mamati, addakayo uray ditoy! Adda kadi lugar ditoy daga nga awan dagiti Saksi?’”
Imbalakad ni apostol Pablo: “Ikasabam ti sao, naganetgetka koma iti dayta iti mainugot a panawen, iti nariribuk a panawen.” (2 Timoteo 4:2) Kas kadagiti kapammatianda iti intero a lubong, ar-aramiden dayta dagiti Saksi ni Jehova idiay Sarajevo. Pindaenda uray dagiti pasiente a nakaidda iti ospital ken dagiti armored car!