Ipakitayo ti Espiritu ti Panagpayunir
1. Ania ti kayat a sawen ti espiritu ti panagpayunir?
1 Makapagserbida man kas payunir iti agdama wenno saan, maiparangarang dagiti amin nga agibumbunannag iti Pagarian ti espiritu ti panagpayunir. Sipapasnek a tungtungpalenda ti bilin a mangasaba ken mangaramid kadagiti adalan. (Mat. 28:19, 20; Ara. 18:5) Maseknanda kadagiti tattao ken agsaksakripisioda tapno maitungpalda ti ministerioda. (Mat. 9:36; Ara. 20:24) Situtulok dagiti adipen ni Jehova a mangaramid iti aniaman a kasapulan tapno matulongan dagiti sabsabali a mangammo iti kinapudno. (1 Cor. 9:19-23) Usigentayo ti ulidan ti maysa a nangipakita iti kasta nga espiritu, ni Felipe nga ebanghelisador.
2. Kasano a matulad dagiti panglakayen ken ministerial nga adipen ti regta ni Felipe iti ministerio?
2 Panangasaba ken Panangisuro: Nadagsen dagiti rebbengen ni Felipe iti kongregasion idi umuna a siglo. (Ara. 6:1-6) Nupay kasta, kangrunaanna a maysa ni Felipe a naregta a manangaskasaba iti naimbag a damag. (Ara. 8:40) Kasta met ita, bayat nga as-asikasuen dagiti panglakayen ken ministerial nga adipen dagiti naituding nga annongenda, maipakitada ti espiritu ti panagpayunir babaen ti naanep a panangidauloda iti ministerio. Anian a makapabileg daytoy iti espiritu ti kongregasion!—Roma 12:11.
3. Kasanotayo a maipakita ti espiritu ti panagpayunir no masuottayo?
3 Kalpasan ti ipapatay ni Esteban, rimmigat iti kasta unay ti kasasaad dagiti adalan gapu iti itataud ti nakaro a panangidadanes. Ngem intultuloy ni Felipe ti nangasaba, ket napateg ti akemna iti pannakailukat ti trabaho kadagiti taga Samaria. (Ara. 8:1, 4-6, 12, 14-17) Matuladtayo ti ulidanna babaen ti agtultuloy a panangipakaammo iti naimbag a damag uray iti sidong dagiti narigat a kasasaad ken babaen ti panangasaba a di mangidumduma kadagiti amin a masarakantayo.—Juan 4:9.
4. Ania nga ulidan ti impasdek ni Felipe kas mannursuro?
4 Maysa ni Felipe a nalaing a mannursuro iti Sao ti Dios, kas makita iti salaysay maipapan iti pannakakomberte ti eunuko nga Etiope. (Ara. 8:26-38) Ti panangpatanor iti abilidad a mangusar iti Biblia ken ‘makirinnason manipud iti Kasuratan’ ket sabali pay a pamay-an ti panangiparangarang iti espiritu ti panagpayunir. (Ara. 17:2, 3) Kas ken Felipe, ikagumaantayo nga iranud ti naimbag a damag iti sadinoman a pakasarakantayo kadagiti tattao ken iti amin a maitutop a gundaway.
5. Ania ti makatulong kadagiti Kristiano a nagannak a mangitukit iti espiritu ti panagpayunir kadagiti annakda?
5 Pamilia ken Kongregasion: Awan duadua a ti kababalin ken ulidan ni Felipe ket nasayaat ti epektona kadagiti babbalasangna. (Ara. 21:9) Kasta met, dagiti Kristiano a nagannak a mangipangpangruna iti biagda kadagiti banag a mainaig iti Pagarian maparegtada dagiti annakda a mangaramid met iti kasta. Nupay nabannog iti ngudo ti lawas gapu iti kaadu ti asikasuenna, ti nagannak a sigagagar a mangaskasaba kadagiti sabsabali ket makaipaay iti ulidan nga agtalinaed iti puso ti anakna.—Prov. 22:6.
6. Kasanotayo a maipakita nga ipatpategtayo dagiti payunir iti kongregasiontayo?
6 Pinadagus idi ni Felipe da Pablo ken Lucas, agpada a naregta a Kristiano a siaanep nga agserserbi ken ni Jehova. (Ara. 21:8, 10) Kasanotayo a maipakita ti panangipateg ken suportatayo kadagiti nareregta a kakabsat ita? Nalabit mabalintayo nga idiaya ti makipagtrabaho kadagiti payunir iti agsapa wenno malem iti aldaw a manmano ti makiraman iti ministerio. (Fil. 2:4) Mabalintay met nga awisen ida iti pagtaengantayo maipaay iti makapabileg a panaglalangen. Aniaman ti ipalubos ti kasasaadtayo, ikagumaantay koma amin nga ipakita ti espiritu ti panagpayunir.