Dakayo nga Agtutubo—Rumangrang-aykayo Kadi iti Naespirituan?
“NUPAY tumabtabunoak kadagiti Nakristianuan a gimong, awan ti nasged a tarigagayko nga agserbi ken ni Jehova,” kuna ni Hideo bayat nga isalsalaysayna ti kasasaadna idi haiskul pay. “Masansan nga arapaapek a maysaak a popular kadagiti kaeskuelak ken sipaparammag a magna iti kalsada a kaduak ti nobiak. Awan ti masnup a kalatko, ken awan ti tarigagayko a rumang-ay iti naespirituan.” Kas ken Hideo, kasla agkalkallautang ti adu nga agtutubo, nga awan ti tarigagayda a mangragpat iti aniaman a naimbag a kalat wenno rumang-ay.
No agtutuboka, nalabit pakaragsakam ti makiraman iti isport wenno aglinglingay. Ngem no maipapan kadagiti naespirituan nga aktibidad, nalabit a saan a kasta ti mariknam. Posible kadi ti maragsakan kadagiti naespirituan a kalat? Utobenyo dagitoy a sasao ti salmista: “Ti pammalagip ni Jehova ket mapagpiaran, mamagsirib iti daydiay awanan kapadasan. . . . Ti bilin ni Jehova nadalus, mamagsilnag iti matmata.” (Salmo 19:7, 8) Ti Sao ti Dios maiturongna “daydiay awanan kapadasan” tapno agtignay a sisisirib, a ‘mamagsilnag iti matana.’ Wen, mabalinmo ti maragsakan kadagiti naespirituan a banag. Ngem ania ti kasapulam tapno masagrapmo dayta? Ania ti pangrugiam?
Matignayka nga Agserbi iti Dios
Umuna, masapul a matignayka. Usigem ti kaso ti agtutubo a ni Ari Josias ti Juda. Idi masarakan iti templo ti libro ti Linteg ni Jehova, impabasa dayta ni Josias ket natignay unay iti nangngegna. Kas resulta, “inikkat ni Josias ti amin a nakarimrimon a bambanag manipud kadagiti amin a daga a kukua ti annak ti Israel.” (2 Cronicas 34:14-21, 33) Babaen ti panagbasa iti Sao ti Dios, natignay ni Josias nga ad-adda a mangitandudo iti nasin-aw a panagdayaw.
Mabalinmo met a masukay ti tarigagay nga agserbi ken ni Jehova no regular a basaem ti Biblia ken mennamennaem ti nabasam. Dayta ti nangtignay ken ni Hideo. Sisisinged a nakitimpuyog iti nataengan a payunir, maysa nga amin-tiempo a ministro dagiti Saksi ni Jehova. Ti payunir ket maysa a naanep nga estudiante ti Biblia ken inkagumaanna nga iyaplikar iti biagna dagiti sursuro ti Biblia. Gapu ta naparegta unay iti ulidan ti payunir, tinulad dayta ni Hideo ket napatanorna ti nasged a tarigagay nga agserbi iti Dios ken iti sabsabali. Naaddaan panggep ti biagna kas resulta ti panagrang-ayna iti naespirituan.
Ti inaldaw a panagbasa iti Biblia ti mamagtignay kadagiti agtutubo. Inlawlawag ni Takahiro: “No agiddaak ket malagipko a diak pay nagbasa iti Biblia para iti dayta nga aldaw, bumangonak ket aramidek dayta. Kas resultana, nariknak ti panangiwanwan ni Jehova. Ti inaldaw a panagbasa iti Biblia dakkel ti naitulongna iti panagrang-ayko iti naespirituan. Gapu ta determinadoak nga ad-adda nga agserbi ken ni Jehova, simrekak kas regular pioneer di nagbayag kalpasan a nagturposak iti haiskul. Ket tagtagiragsakek unay dayta.”
Malaksid iti panagbasa iti Biblia, ania pay ti makatulong kenka a mangpabileg iti determinasionmo a mangidayaw ken ni Jehova? Naisuro ken ni Tomohiro ti kinapudno iti Biblia babaen ken nanangna. Kunana: “Sa la natukay ti riknak iti panagayat ni Jehova ken iti pangsubbot a daton ni Jesus kalpasan a naadalko a naimbag ti libro a Life Does Have a Purpose iti tawenko a 19. Dayta a panangapresiar iti ayat ti Dios ti nangtignay kaniak nga ad-adda nga agserbi ken ni Jehova.” (2 Corinto 5:14, 15) Kas ken ni Tomohiro, naparegta ti adu nga agtutubo a mangparang-ay iti espiritualidadda babaen ti panangitultuloy iti naanep a personal a panagadal iti Biblia.
Ngem kasano no awananka latta iti naimpusuan a tarigagay nga agserbi ken ni Jehova? Adda kadi mabalinmo a pagpatulongan? Insurat ni apostol Pablo: “Ta ti Dios . . . agtigtignay kadakayo tapno agpadpada nga agtarigagay ken agtignaykayo.” (Filipos 2:13) No ikararagmo ti tulong ni Jehova, situtulok nga ipaayna kenka ti nasantuan nga espirituna, a mangpabileg kenka a saan laeng nga “agtignay” no di ket “agtarigagay.” Kaipapananna daytoy a parayrayen ti nasantuan nga espiritu ti Dios ti tarigagaymo a mangaramid iti amin a kabaelam nga agserbi ken ni Jehova ken tumulong kenka a rumang-ay iti naespirituan. Aniaman ti mapasamak, agtalekka iti pannakabalin ni Jehova ken bumilegka!
Ikeddengmo Dagiti Kalatmo
Apaman a maikeddengmo ti ad-adda a panagserbi ken ni Jehova, nasken a mangitudingka kadagiti personal a kalat tapno rumang-ayka iti naespirituan. Kinuna ni Mana, maysa a Kristiano nga agtutubo: “Dakkel a tulong kaniak ti panangikeddeng iti kalat. Imbes a kumapuy, rumang-ayak buyogen ti regta. Bayat a sipapanunotak iti kalatko, sipapasnek nga inkararagko ti panangiwanwan ni Jehova, ket awan ti lapped iti panagrang-ayko.”
Nasken a realistiko ken maragpat dagiti kalatmo. Mabalin a rasonable a kalat ti inaldaw a panagbasa iti maysa a kapitulo ti Biblia. Mabalinmo met nga irugi ti proyekto a panagsukimat. Kas pagarigan, babaen ti panangusar iti adda nga Ingles a reperensia, mabalin a pagadalam dagiti galad ni Jehova a nailista iti sidong ti subtitulo a “Qualities by Name” iti sidong ti paulo a “Jehovah” iti Watch Tower Publications Index. Adda agarup 40 a nailista a mabalinmo nga usigen, ken ti panagsukimat awan duadua nga ad-adda nga iyadaninaka ken ni Jehova ken gutugotennaka nga ad-adda nga agserbi kenkuana. Dadduma pay a maragpat a kalat isu ti panagkomento uray maminsan laeng iti tunggal Nakristianuan a gimong a pakipasetan dagiti dumdumngeg, panangammo a naimbag iti uray maysa a miembro ti kongregasion kada gimong, ken saan a panangpalabas iti aldaw a di agkararag ken ni Jehova ken panangisarita ti maipapan kenkuana kadagiti sabsabali.
No saanka pay a nagpasalista iti Teokratiko nga Eskuelaan ti Panagministro, nasayaat no aramidem dayta a kalat. Makipaspasetka kadin iti ministerio? No saan pay, nalabit kayatmo nga ikagumaan ti agbalin a di bautisado nga agibumbunannag. Ti serioso a panangusigmo iti relasionmo ken ni Jehova ken panagdedikarmo kenkuana ti natural a sumaganad nga addang. Adu nga agtutubo ti mangikagkagumaan a mangitungpal iti dedikasionda babaen ti panangragpatda iti amin-tiempo a ministerio.
Nupay nasayaat ti maaddaan kadagiti kalat iti biagmo, agannadka di la ket ta mapatanormo ti espiritu ti kompetision. Ad-adda a naragsakka iti aramidem no saanmo nga idilig ti bagim iti sabsabali.—Galacia 5:26; 6:4.
Nalabit mariknam nga awan kapadasam ken marigatanka a mangikeddeng kadagiti rasonable a kalat. No kasta, tungpalem ti balakad ti Biblia: “Iyallingagmo ta lapayagmo ket denggem dagiti sao dagidiay masirib.” (Proverbio 22:17) Agpatulongka kadagiti dadakkelmo wenno kadagiti nataengan a Kristiano. Siempre, dagiti nagannak ken dagiti sabsabali kasapulanda ti agbalin a rasonable ken makaparegtada iti daytoy a banag. Mabalin a mapukaw ti rag-o dagiti agtutubo no marigatanda a mangragpat iti kalat nga inkeddeng dagiti sabali ken mapukaw pay ketdi ti panggep ti panangituding kadagiti kalat. Napasamak dayta iti maysa a balasitang. Kinunana: “Nagadu ti kalat nga ipapaaramid kaniak dagiti dadakkelko, kas iti panagpasalista iti Teokratiko nga Eskuelaan ti Panagministro, mangasaba, agpabautisar, ken agbalin a payunir. Marigatanak a mangragpat kadagita. No adda naragpatko a kalat, didak komendaran dagiti dadakkelko, nayonanda pay ketdi ti kalatko. Kas resulta, mariknak a kanayon a mapilpilitanak a mangragpat kadagiti kalat. Nabannogak ken kasla awan magapgapuanak.” Ania ti parikut? Husto amin dagiti kalat, ngem saan nga isu ti nangikeddeng. Tapno agballigi, masapul a sika ti matignay a mangikeddeng iti kalatmo!
Utobem ni Jesu-Kristo. Idi immay ditoy daga, ammona no ania ti namnamaen kenkuana ti Amana, ni Jehova. Para ken ni Jesus, ti panangaramid iti pagayatan ni Jehova ket saan laeng a maysa a kalat no di ket maysa a mision a maitungpal. Kasano a minatmatan ni Jesus ti annongenna? Kinunana: “Ti taraonko isu ti panangaramidko iti pagayatan daydiay nangibaon kaniak ken panangturposko iti trabahona.” (Juan 4:34) Naragsakan ni Jesus a mangaramid iti pagayatan ni Jehova ken inaramidna dagiti namnamaen ni Amana. Kasla taraon dayta ken ni Jesus—addaan ragsak ken pannakapnek iti panangitungpal iti naipatrabaho kenkuana. (Hebreo 10:5-10) Maaddaanka met iti ragsak no siuumiso a matignayka a mangaramid iti iparparegta kenka dagiti dadakkelmo.
Saanka a Sumuko nga Agaramid iti Naimbag
No adda inkeddengmo a kalat, siaanep nga itungpalmo dayta. Kuna ti Galacia 6:9: “Ditay koma sumuko nga agaramid iti nasayaat, ta iti naikeddeng a panawen agapittayto no ditay mabannog.” Saanka nga agpannuray iti bukodmo laeng a pigsa wenno abilidad. Addanto latta dagiti lapped ken no dadduma mariknam a kasla napaayka. Ngem ipanamnama kadatayo ti Biblia: “Imutektekam [ti Dios] iti amin a daldalanmo, ket isu palintegennanto dagiti danam.” (Proverbio 3:6) Saranayennaka ni Jehova bayat a siaanep a ragpatem dagiti naespirituan a kalatmo.
Wen, babaen ti panangsukay iti tarigagay nga agserbi ken ni Jehova ken babaen ti panangragpat kadagiti naespirituan a kalat, kabaelam nga ‘iparangarang ti panagrang-aymo iti amin a tattao.’ (1 Timoteo 4:15) Iti kasta, matagiragsakmo ti addaan panggep a biag iti panagserbi iti Dios.
[Ladawan iti panid 9]
Ti panagbasa iti Biblia ken panangmennamenna iti nabasam tignayennaka nga agserbi ken ni Jehova
[Ladawan iti panid 10]
Inaramid ni Jesus dagiti namnamaen ni Amana