Ibaballaet ti Dios​—Ania ti Mainanamatayo?

IDI maikawalo a siglo K.K.P., ti agtawen iti 39 a ni Ari Ezekias ti Juda naammuanna nga adda makapapatay a sakitna. Naldaangan ni Ezekias iti dayta a naammuanna, isu nga immararaw iti Dios tapno maagasan. Simmungbat ti Dios babaen ti propetana: “Nangngegko ti kararagmo. Nakitak ti luluam. Adtoy manginayonak iti sangapulo ket lima a tawen iti al-aldawmo.”​—Isaias 38:1-5.

Apay a bimmallaet ti Dios iti dayta a partikular a kasasaad? Sinigsiglo kasakbayanna, inkari ti Dios ken ni nalinteg nga Ari David: “Ti balaymo ken ti pagariam sigurado a natibkerto agingga iti tiempo a di nakedngan iti sangom; ti mismo a tronom agbalinto a maysa a naipasdek a sititibker agingga iti tiempo a di nakedngan.” Impalgak pay ti Dios a ti Mesias maipasngay iti kapuonan ni David. (2 Samuel 7:16; Salmo 89:20, 26-29; Isaias 11:1) Idi nagsakit ni Ezekias, awan pay ti anakna. Gapuna, agpegpeggad a maguped ti naarian a linia ni David. Ti ibaballaet ti Dios iti kaso ni Ezekias ket maigapu iti espesipiko a panggep a maitalimeng ti kapuonan a pagtaudan ti Mesias.

Tapno matungpal dagiti karina, natignay ni Jehova a bumallaet para iti ilina iti adu a gundaway sakbay ti panawen Kristiano. Mainaig iti pannakaispal ti Israel manipud iti pannakaadipen iti Egipto, impakpakauna ni Moises: “Gapu iti panagayat kadakayo ni Jehova, ken gapu iti panangsalimetmetna iti sinapataan a sasao nga insapatana kadagidi ammayo, a ni Jehova inruarnakayo babaen ti napigsa nga ima.”​—Deuteronomio 7:8.

Idi umuna a siglo, ti ibaballaet ti Dios nagserbi met a mangitungpal kadagiti panggep ti Dios. Kas pagarigan, iti dalan nga agturong iti Damasco, ti maysa a Judio nga agnagan Saulo simimilagro a naipaayan iti sirmata tapno isardengna ti panangidadanesna kadagiti adalan ni Kristo. Ti pannakakomberte daytoy a tao, a nagbalin kas ni apostol Pablo, dakkel ti naaramidanna iti pannakaisaknap ti naimbag a damag kadagiti nasion.​—Aramid 9:1-16; Roma 11:13.

Kanayon Kadi nga Adda Ibaballaet?

Kanayon kadi a bumallaet ti Dios wenno no kasapulan laeng? Nalawag nga ipakita ti Kasuratan a saan a kanayon a bumallaet ti Dios. Nupay inispal ti Dios dagiti tallo nga agtutubo a Hebreo manipud iti pannakapapatay iti umap-apuy nga urno ken ni propeta a Daniel manipud iti abut a kulongan dagiti leon, saan a nagtignay a mangispal iti biag dagiti dadduma a propeta. (2 Cronicas 24:20, 21; Daniel 3:21-27; 6:16-22; Hebreo 11:37) Ni Pedro ket simimilagro a nawayawayaan manipud iti nangibaludan kenkuana ni Herodes Agripa I. Kaskasdi, daytoy met laeng nga ari ti nangipapatay ken ni apostol Santiago, ket saan a bimmallaet ti Dios tapno lapdanna dayta a krimen. (Aramid 12:1-11) Nupay ti Dios impaayanna dagiti apostol iti bileg a mangpaimbag kadagiti masakit ken mangpagungar pay ketdi kadagiti natay, impalubosna nga agtultuloy ti “siit ti lasag” a nangparigat ken ni apostol Pablo, a nalabit sakit iti pisikal.​—2 Corinto 12:7-9; Aramid 9:32-41; 1 Corinto 12:28.

Saan a bimmallaet ti Dios a manglapped iti agsasaruno a pannakaidadanes dagiti Kristiano iti ima ni Romano nga Emperador Nero. Dagiti Kristiano natutuok, napuoran a sibibiag, ken naibelleng kadagiti atap nga animal. Ngem daytoy nga ibubusor ket saan a nagsiddaawan dagiti nagkauna a Kristiano, ken sigurado a saan a nangpakapuy iti pammatida iti kaadda ti Dios. Ngamin, binallaagan ni Jesus dagiti adalanna a maisaklangda kadagiti pangukoman ket rumbeng a nakasaganada nga agsagaba ken matay gapu iti pammatida.​—Mateo 10:17-22.

Kas iti naaramidanna iti napalabas, ti Dios sigurado a kabaelanna nga ispalen ita dagiti adipenna manipud kadagiti napeggad a kasasaad, ket saan koma a mababalaw dagidiay agkuna a sinalakniban ida ti Dios. Nupay kasta, narigat nga ipato no bimmallaet ti Dios wenno saan kadagiti kasta a kaso. Sumagmamano a matalek nga adipen ni Jehova ti nadangran iti maysa a panagbettak idiay Toulouse, ken rinibu a matalek a Kristiano ti natay idiay Nazi ken kadagiti kampo dagiti Komunista wenno iti sidong dagiti dadduma a makadidigra a kasasaad, ngem saan a bimmallaet ti Dios tapno lapdanna dagita. Apay a saan a kanayon a bumallaet ti Dios tapno saranayenna dagidiay anamonganna?​—Daniel 3:17, 18.

“Ti Tiempo ken Di Mapakpakadaan a Pasamak”

No mapasamak ti didigra, maapektaran ti uray siasino, ken saan a kanayon a maigapu iti di kinamatalek iti Dios. Bayat ti panagbettak idiay Toulouse, a nalasatan da Alain ken Liliane, 30 a tao ti natay ken ginasut ti nasugatan, nupay saan a gapu ta nakaaramidda iti dakes. Iti nadumaduma a lugar, pinullo a ribu a tao ti biktima ti krimen, di naannad a panagmaneho, wenno gubgubat, ket saan a ti Dios ti mapabasol iti nakaay-ay-ay a napasaranda. Ipalagip kadatayo ti Biblia a “ti tiempo ken di mapakpakadaan a pasamak mapagteng” iti isuamin.​—Eclesiastes 9:11.

Kanayonanna, agsakit, lumakay, ken matay dagiti tattao. Matay uray dagidiay mangipapan a ti Dios inispalna ti biagda wenno mangibaga a ti Dios pinaimbagna ti sakitda. Ti pannakaikkat ti sakit ken ipapatay ken ti ‘pannakapunas ti amin a lua’ manipud iti mata ti tao ket mapasamakto iti masanguanan.​—Apocalipsis 21:1-4.

Tapno mapasamak dayta, saan laeng a sagpaminsan nga ibaballaet ti kasapulan no di ket nasaksaknap ken naan-anay. Ti Biblia saritaenna ti maysa a pasamak a naawagan “ti dakkel nga aldaw ni Jehova.” (Sofonias 1:14) Bayat daytoy nasaknap nga ibaballaet, ti Dios pagpatinggaenna ti amin a kinadakes. Maikkan ti sangatauan iti gundaway nga agbiag nga agnanayon iti perpekto a kasasaad, inton “dagiti immun-una a banag saandanto a maipalagip, saandanto met a tumpuar iti puso.” (Isaias 65:17) Uray dagiti natay mapagungardanto, isu nga agpatingganto ti kadakkelan kadagiti amin a didigra a napasaran dagiti tattao. (Juan 5:28, 29) Babaen ti di aggibus a panagayat ken kinaimbag ti Dios, naan-anay a marisutto dagiti amin a parikut ti sangatauan.

No Kasano Ita a Bumallaet ti Dios

Ngem dina kayat a sawen nga iti agdama ket agpalpaliiw laeng ti Dios bayat nga agrigrigat ti sangaparsuaan. Ita, ipapaay ti Dios kadagiti amin a tao, aniaman ti etniko wenno sosial a nalikudanda, ti gundaway a mangam-ammo kenkuana ken maaddaan iti personal a relasion kenkuana. (1 Timoteo 2:3, 4) Ni Jesus dineskribirna daytoy a proseso kadagitoy a sasao: “Awan ti tao a makaumay kaniak malaksid no ti Ama, a nangibaon kaniak, ti mangyasideg kenkuana.” (Juan 6:44) Ti Dios iyadanina kenkuana dagiti nasingpet-panagpuspusoda a tattao babaen ti mensahe ti Pagarian a maipakpakaammo iti sangalubongan babaen dagiti adipenna.

Kanayonanna, ti Dios direkta nga impluensiaanna ti biag dagidiay situtulok nga agpaiwanwan kenkuana. Babaen ti nasantuan nga espirituna, ‘luktan ti Dios ti pusoda’ tapno matarusanda ti pagayatanna ken maaramidda dagiti ipaannurotna. (Aramid 16:14) Wen, babaen ti panangipaayna iti gundaway a mangam-ammo kenkuana, iti Saona, ken kadagiti panggepna, pampaneknekan ti Dios ti naayat a pannakaseknanna iti tunggal maysa kadatayo.​—Juan 17:3.

Kamaudiananna, ti Dios tultulonganna dagiti adipenna ita, saan a babaen ti simimilagro a panangispalna kadakuada, no di ket babaen ti panangipaayna kadakuada iti nasantuan nga espirituna ken “ti pannakabalin a nalablabes ngem ti gagangay” tapno madaeranda ti aniaman a kasasaad a maipasango kadakuada. (2 Corinto 4:7) Insurat ni apostol Pablo: “Ta iti amin a bambanag addaanak iti bileg gapu iti daydiay [ni Jehova a Dios] mangmangted kaniak iti pannakabalin.”​—Filipos 4:13.

Addaantayo ngarud iti rason nga inaldaw nga agyaman iti Dios gapu iti biag ken iti impaayna kadatayo a namnama nga agbiag nga agnanayon iti maysa a lubong nga awan ti panagsagaba. “Ania ti isupapakko ken Jehova gapu kadagiti amin a gunggonana kaniak?” inyimtuod ti salmista. “Ti kopa ti naindaklan a pannakaisalakan alaekto, ket iti nagan ni Jehova umawagakto.” (Salmo 116:12, 13) Ti regular a panangbasa iti daytoy a magasin tulongannakayo a mangtarus iti inaramid, iti ar-aramiden, ken iti aramidento pay ti Dios a mangyeg kadakayo ita iti ragsak ken natalged a namnama iti masanguanan.​—1 Timoteo 4:8.

[Blurb iti panid 6]

“Dagiti immun-una a banag saandanto a maipalagip, saandanto met a tumpuar iti puso.”​—Isaias 65:17

[Dagiti Ladawan iti panid 5]

Idi panawen ti Biblia, saan a linapdan ni Jehova ti pannakaubor ni Zacarias . . .]

uray ti panangpapatay ni Herodes kadagiti inosente

[Ladawan iti panid 7]

Asidegen ti tiempo nga awanton ti panagsagaba; uray dagiti natay mapagungardanto