Salsaludsod Dagiti Agbasbasa

Kalpasan ti Layus, nangibaon ni Noe iti maysa a kalapati manipud iti daong ket nagsubli daytoy nga addaan iti “bulong ti olibo.” Nakasarakan dayta a kalapati iti bulong?

Ibaga kadatayo ti Biblia a “ti dandanum linapunosda ti daga iti kasta unay nga amin dagiti natayag a bantay nga adda iti baba ti intero a langlangit natinep.” (Genesis 7:19) Idi immes-es ti danum, nangibaon ni Noe iti maysa a kalapati iti tallo a gundaway iti baet ti saggaysa a lawas. Iti maikadua a gundaway, nagsubli ti kalapati nga “adda kakkettel a bulong ti olibo iti sippitna, ket ngarud naammuan ni Noe a ti dandanum nagabbaten iti daga.”​—Genesis 8:8-11.

Siempre, awan ita ti pamay-an a maibaga no kasano kapaut a nalayus ti maysa a paset ti daga, ta awan duadua a binalbaliwan ti Delubio ti topograpia ti daga. Kaskasdi, mabalin a napaut unay ti pannakalayus ti kaaduan a paset ti daga nga uray la nalpes ti adu a kaykayo. Ngem agparang a saan a natay ti dadduma a kayo, ket nagsaringitda idi immes-es ti danum.

No maipapan iti kayo ti olibo, kuna ti The New Bible Dictionary: “No mapukan, agsaringit manen ti ramutna, isu a makapataud iti agingga lima a baro a puon. Uray dagiti matmatay a kayo ti olibo masansan a kasta met laeng ti panagsaringitda.” “Kasla saan a matmatay dayta a kayo,” kuna ti The New Schaff-Herzog Encyclopedia of Religious Knowledge. Awan ita ti tao a makaammo kadagiti detalye maipapan kadagiti danum ti layus, kas koma iti kaapgad ken temperatura ti danum. Gapuna, ditay masierto no ania ti mabalin nga epektona kadagiti kayo ti olibo ken dadduma a mula.

Ngem dagiti balang a kayo ti olibo dida makapagbiag iti nalamiis a temperatura, kas kadagiti dadduma a mula a masarakan kadagiti nangato a bambantay. Kaaduanna nga agbiagda kadagiti lugar a di lumbes iti 1,000 a metro ti kangatona, a ti promedio a temperatura ket nangatngato ngem 10 degree Celsius. “Gapuna,” kuna ti libro a The Flood Reconsidered, “mabalin a panunoten ni Noe nga immes-esen ti danum kadagiti nababa a katanapan gapu iti dayta kakkettel a bulong.” Idi pinatayab ni Noe ti kalapati kalpasan ti maysa manen a lawas, saanen a nagsubli dayta, a mangipakita nga adun ti mula ken potensial a paginanaan ti kalapati.​—Genesis 8:12.