Salsaludsod Dagiti Agbasbasa

Ania ti kayat a sawen ni apostol Pablo idi kinunana a dagiti babbai rumbeng nga “agulimekda koma kadagiti kongregasion”?

Nagsurat ni Pablo iti kongregasion Kristiano idiay Corinto: “Kas kadagiti amin a kongregasion dagiti sasanto, dagiti babbai agulimekda koma kadagiti kongregasion, ta di maipalubos nga agsaoda.” (1 Corinto 14:33, 34) Tapno matarusantayo daytoy a naimbag, makatulong no usigentayo nga umuna ti konteksto ti balakad ni Pablo.

Iti 1 Corinto kapitulo 14, dinakamat ni Pablo ti bambanag mainaig kadagiti gimong ti kongregasion Kristiano. Dineskribirna ti rumbeng a mapagsasaritaan kadagita a gimong ken inrekomendana no kasano ti rumbeng a pannakaidaulo dagita. (1 Corinto 14:1-6, 26-34) Kasta met, impaganetgetna ti panggep dagiti Nakristianuan a gimong​—“tapno ti kongregasion umawat iti pannakapabileg.”​—1 Corinto 14:4, 5, 12, 26.

Iti 1 Corinto kapitulo 14, ti bilin ni Pablo a ‘panagulimek’ ket nagparang iti namitlo a daras. Nupay naiturong dayta iti nagduduma a grupo iti kongregasion iti tunggal gundaway, maymaysa ti panggepna​—tapno “amin a bambanag maaramid koma a sitatakneng ken sigun iti urnos.”​—1 Corinto 14:40.

Umuna, kinuna ni Pablo: “No ti asinoman agsao iti maysa a pagsasao, makedngan koma agingga iti dua wenno tallo laeng, ken agsisinnublatda; ket adda koma agipatarus. Ngem no awan ti managipatarus, isu agulimek koma iti kongregasion ket agsao iti bagina ken iti Dios.” (1 Corinto 14:27, 28) Saanna a kayat a sawen dayta a ti kasta a tao ket saan a pulos nga agsasao kadagiti gimong, imbes ketdi adda dagiti panawen a rumbeng nga agulimek. Kinapudnona, ti panagpipinnabileg a panggep dagiti gimong ket saan a maragpat no isu agsao iti lenguahe nga awan ti makatarus.

Maikadua, kinuna ni Pablo: “Agsao koma ti dua wenno tallo a mammadto, ket ti dadduma lasinenda koma ti kaipapananna. Ngem no adda paltiing iti sabali bayat a situtugaw sadiay, agulimek koma daydiay immun-una.” Saanna a kaipapananna daytoy a liklikan ti umuna a propeta ti agsao kadagiti gimong. Imbes ketdi, adda dagiti gundaway nga agulimek. Kalpasanna, daydiay addaan namilagruan a paltiing mabalinna ti agsao iti kongregasion, ket maragpat ti panggep ti gimong​—a ‘maparegta ti amin.’​—1 Corinto 14:26, 29-31.

Maikatlo, dagiti laeng Kristiano a babbai ti kinasarita ni Pablo, a kunkunana: “Dagiti babbai agulimekda koma kadagiti kongregasion, ta di maipalubos nga agsaoda, no di ket agpasakupda koma.” (1 Corinto 14:34) Apay nga inted ni Pablo daytoy a bilin kadagiti kakabsat a babbai? Tapno mataginayon ti urnos iti kongregasion. Kunana: “Ngarud, no kayatda a sursuruen ti maysa a banag, agsaludsodda koma kadagiti bukodda nga assawa idiay pagtaengan, ta nakababain a ti maysa a babai agsao iti kongregasion.”​—1 Corinto 14:35.

Nalabit a dadduma a kakabsat a babbai kueskuestionaranda ti naibaga iti kongregasion. Ti balakad ni Pablo tinulonganna dagiti kakabsat a babbai a mangliklik iti manangriribuk a kababalin ken sipapakumbaba nga awatenda ti takderda iti urnos ni Jehova mainaig iti kinaulo, nangruna maipapan kadagiti assawada. (1 Corinto 11:3) Kasta met, babaen ti panagulimek dagiti kakabsat a babbai, ipakpakitada a dida tarigagayan ti agbalin a mannursuro iti kongregasion. Idi nagsurat ni Pablo ken Timoteo, impakitana a di umiso nga agakem ti babai kas mannursuro: “Saanko nga ipalubos a ti babai mangisuro, wenno mangwatwat iti autoridad iti lalaki, no di ket agulimek koma.”​—1 Timoteo 2:12.

Kayat kadi a sawen dayta a dagiti Kristiano a babbai saanda a pulos nga agsasao kabayatan ti gimong ti kongregasion? Saan. Idi kaaldawan ni Pablo adda dagiti okasion a dagiti Kristiano a babbai, a nalabit tinignay ti nasantuan nga espiritu, ti nagkararag wenno nagipadto iti kongregasion. Kadagita nga okasion, bigbigenda ti takderda babaen ti panagdalungdongda.a (1 Corinto 11:5) Kanayonanna, idi kaaldawan ni Pablo ken iti agdama, naiparegta agpadpada kadagiti kakabsat a lallaki ken babbai nga iwaragawagda iti publiko ti namnamada. (Hebreo 10:23-25) Malaksid iti panangasabada, dagiti kakabsat a babbai iwaragawagda ti namnamada ken paregtaenda ti sabsabali babaen ti panangipaayda iti nasayaat pannakaisaganana a komento no maawaganda ken babaen ti panangiparangda iti pasetda a demostrasion wenno pasetda kas estudiante.

Gapuna, dagiti Kristiano a babbai “agulimekda” babaen ti dida panagakem kas lalaki a mangisuro iti kongregasion. Dida mangibangon kadagiti saludsod a mangkuestion iti autoridad dagidiay mangisuro. Babaen ti panangtungpalda iti umiso nga akemda iti kongregasion, dagiti Kristiano a kakabsat a babbai dakkel ti maitulongda iti panangpatanor iti talna tapno “maaramid ti amin a bambanag [kadagiti gimong ti kongregasion] a maipaay a pakapabilgan.”​—1 Corinto 14:26, 33.

[Footnote]