Mapagpannurayan a Giya Agturong iti Kinaragsak

KALINTEGAN ti amin a tao “ti panangikagumaan a mangragpat iti Kinaragsak.” Isu dayta ti panangmatmat dagiti nangpanday iti Deklarasion ti Wayawaya ti Estados Unidos ti America. Ngem ti panangikagumaan a maragpat ti maysa a kalat ken ti pannakaragpat iti dayta ket dua nga agduma a banag. Nupay adu nga agtutubo ti mangikagkagumaan a mangragpat kadagiti kalatda iti paglinglingayan ken isport, mano ti ammoyo a nakaragpat iti balligi a tartarigagayanda? “Posible a saanka nga agballigi,” kuna ti maysa a nalatak a kumakanta a makaammo iti rigat ti panagbalin a naballigi a musikero.

No kasta ti nariknam maipapan iti panangbirok iti kinaragsak, saanka koma a maupay. No umiso ti pangbirokam iti kinaragsak, masarakam dayta. Apay a makunatayo ti kasta? Ti immuna nga artikulo dinakamatna ti “naragsak a Dios,” ni Jehova. (1 Timoteo 1:11) Iti Biblia, mangipaay ti Dios iti giya tapno saan nga agtungpal iti pannakapaay ti panangbirokmo iti kinaragsak. Matulongannaka ti Dios a mangliklik kadagiti gagangay a pakaigapuan ti panagladingit. Kas pagarigan, usigem ti panangliwliwana kenka no adda matay nga ing-ingungotem.

No Matay ti Maysa nga Ing-ingungoten

Adda aya ngamin ti pagimbagan ti ipapatay? Ti ipapatay isinana dagiti nagannak kadagiti annakda wenno dagiti annak kadagiti dadakkelda. Pagsisinaenna dagiti nasinged nga aggagayyem ken mangted iti saan a natalged a rikna kadagiti natalna a komunidad. No matayan ti maysa a naragsak a pamilia, mabalin a malapunosda iti liday.

Nabatad a ti ipapatay ket maysa a trahedia. Ngem adda dagiti tattao a mangilibak iti dayta a kinapudno ken iladawanda ti ipapatay kas maysa a bendision. Usigenyo ti napasamak idi a ti Bagyo a Katrina dinidigrana ti Gulpo ti Mexico idi Agosto 2005. Iti pumpon ti maysa a biktima, kinuna ti klero: “Saan a ti Katrina ti makagapu a natay. Isu ket innala ti Dios idiay langit.” Iti sabali a gundaway, maysa a nasayaat ti intensionna nga empleado iti ospital ti nangibaga iti maysa a babai a saan a rumbeng nga agdanag agsipud ta ti Dios innalana ni nanangna idiay langit. Insangit ti babai: “Apay, apay a masapul nga iyadayona ni nanangko?”

Nalawag, ti kasta a di umiso a kapanunotan maipapan iti kasasaad dagiti natay kaaduanna a saan a makaliwliwa kadagiti natayan. Apay? Agsipud ta dagitoy a kapanunotan ket saan a maitunos iti kinapudno maipapan iti ipapatay. Dakdakes pay, dayta ti mangiladawan iti Dios kas mamagsisina iti nakaal-alingget, nakas-ang a pamay-an kadagiti agdidinnungngo a pamilia ken gagayyem. Imbes a maipatuldo kas gubuayan ti liwliwa, napagparang a ti Dios ti makinnakem iti trahedia nga ipapatay. Ngem ti Sao ti Dios ti makaibaga iti kinapudno maipapan iti ipapatay.

Iti Biblia, naawagan ti ipapatay kas kabusor. Iyarigna ti ipapatay kas maysa nga ari a nangituray iti sangatauan. (Roma 5:17; 1 Corinto 15:26) Ti ipapatay ket maysa a nabileg a kabusor nga awan ti tao a makabael a manglapped, isu a tunggal adda matay nga ing-ingungoten, mainaynayon dayta a tao iti nagatiddog a listaan dagiti biktima ni patay. Daytoy a kinapudno iti Biblia ti naan-anay a mangilawlawag iti panagleddaang ken kinaawan gaway a mariknatayo no matayantayo iti patpatgen. Patalgedanna a gagangay laeng dagita a rikna. Nupay kasta, usaren kadi ti Dios ti kabusor a ni patay tapno alaenna idiay langit dagiti ing-ingungotentayo? Bay-antayo a ti Biblia ti sumungbat iti dayta a saludsod.

Kuna ti Eclesiastes 9:5, 10: “No maipapan kadagiti natay, saanda a pulos sipapanunot iti aniaman . . . Awan ti aramid wenno uray gakat wenno uray pannakaammo wenno uray sirib idiay Sheol, ti disso a papanam.” Ania ti Sheol? Isu dayta ti tanem a papanan ti amin a tao no matayda. Iti tanem, awan ti aniaman a maaramid dagiti natay, awananda iti aniaman nga aktibidad, rikna wenno panunot. Arigna a nargaan ti turogda.a Ibatad ngarud ti Biblia a ti Dios saanna nga alaen dagiti ing-ingungotentayo tapno makaduana ida idiay langit. Imbes ketdi, addada iti tanem ket awan biagda.

Pinatalgedan ni Jesus daytoy a kinapudno kalpasan ti ipapatay ti gayyemna a ni Lazaro. Ti ipapatay ket inyarig ni Jesus iti pannaturog. No napan ni Lazaro idiay langit tapno makadua ti Mannakabalin-amin a Dios, saan la ketdi a kinamanangngaasi no isu ket pinasubli ni Jesus ditoy daga tapno laeng matayto manen kalpasanna. Kunaen ti naipaltiing a salaysay nga iti lugar ti tanem, impukkaw ni Jesus: “Lazaro, rummuarka!” Ituloy ti Biblia: “Ti tao a natayen rimmuar.” Nagbiag manen ni Lazaro. Ammo ni Jesus a di pulos pimmanaw ni Lazaro ditoy daga. Isu ket awanan biag idiay tanem.​—Juan 11:11-14, 34, 38-44.

Daytoy a pagteng a nairekord iti Biblia tulongannatayo a mangtarus a saan nga usaren ti Dios ti ipapatay tapno alaenna idiay langit dagiti tattao manipud ditoy daga. Mabalintayo ngarud ti suminged iti Dios yantangay ammotayo a saan nga isu ti makinggapuanan iti panaglidaytayo. Makapagtalektayo met a naan-anay a maawatanna ti panagladingit ken rigat nga umapay kadatayo kas epekto ti ipapatay. Ken ti kinapudno nga isuro ti Biblia maipapan iti kasasaad dagiti natay paneknekanna a dagiti natay ket saanda nga agsagsagaba iti impierno wenno iti purgatorio no di ket awanandan iti biag iti nakaitanemanda. Gapuna, no malaglagiptayo dagiti natay nga ing-ingungotentayo, saantay a rumbeng a gumura iti Dios wenno mariribukan no sadino ti ayan dagiti minataytayo. Maysa pay, iti Biblia, mangipapaay ni Jehova iti kanayonan a liwliwa.

Ti Namnama Mangyeg iti Kinaragsak

Dagiti inusigtayo a kasuratan ipakitada a ti namnama ket napateg a paset ti napaypayso a kinaragsak. Ti sao a “namnama” kas nausar iti Biblia ipasimudaagna ti natalged a panangnamnama iti naimbag. Tapno maawatantayo no kasano a ti namnama ket mangyeg iti kinaragsak ita, ituloytayo nga usigen ti salaysay maipapan iti panangpagungar ni Jesus ken ni Lazaro.

Adda ti di kumurang a dua a rason no apay nga inaramid ni Jesus dayta a milagro. Ti maysa ket tapno maikkat ti kinaliday da Marta, Maria, ken dagiti agledleddaang a gagayyem. Iti kasta, makaduada manen ti ing-ingungotenda. Ngem ni Jesus dinakamatna ken ni Marta ti maikadua, napatpateg a rason: “Saanko aya nga imbaga kenka a no mamatika makitam ti dayag ti Dios?” (Juan 11:40) Ti The New Testament in Modern English, ni J. B. Phillips, impatarusna ti naudi a sasao kas “ti nakaskasdaaw a maaramidan ti Dios.” Babaen ti panangpagungarna ken ni Lazaro, imparipirip ni Jesus no ania ti maaramidan ken aramidento ni Jehova a Dios iti masanguanan. Adtoy ti kanayonan a detalye maipapan iti daytoy “nakaskasdaaw a maaramidan ti Dios.”

Iti Juan 5:28, 29, kinuna ni Jesus: “Dikay agsiddaaw iti daytoy, agsipud ta um-umayen ti oras nga amin dagidiay adda kadagiti pakalaglagipan a tanem mangngegdanto ti timekna ket rummuarda.” Kaipapananna daytoy a mapagungar amin dagiti natay nga adda iti Sheol, a pakairamanan dagiti natay nga ing-ingungotentayo. Ipalgak ti Aramid 24:15 ti ad-adu pay maipapan iti daytoy a nakaskasdaaw a pasamak, a kunkunana: “Addanto panagungar agpadpada dagiti nalinteg ken dagiti nakillo.” Isu nga uray “dagiti nakillo,” ti adu a tattao a saan a nakaam-ammo ken nakapagserbi ken ni Jehova, maaddaandanto iti gundaway iti masanguanan a manggun-od iti anamong ti Dios.

Pakapasamakanto daytoy a panagungar? Kuna ti Salmo 37:29: “Dagiti nalinteg tagikuaendanto ti daga, ket agtaengdanto nga agnanayon ti dayta.” Panunotenyo laengen ti kaipapanan dayta! Dagiti agkakapamilia a pinagsisina ni patay mabalindanto ti agkikita manen ditoy daga. Bayat a panunotem a matagiragsakmonto manen dagiti naragsak a kanito a kaduam dagiti mapagungar a patpatgem, malapunos la ketdi ti pusom iti kinaragsak.

Kayat ni Jehova a Naragsakka

Inusigtayo ti dua a pamay-an a maparayray ni Jehova ti kinaragsakmo iti laksid dagiti parikutmo. Umuna, babaen ti Biblia, mangipaay iti pannakaammo ken giya a tumulong kenka tapno mapagballigiam dagiti pakarigatam. Malaksid a tulongannatayo a mangdaer iti kinaliday ti matayan, matulongannatayo pay ti balakad ti Biblia a mangsango kadagiti parikut iti salun-at ken rigat ti panagbiag. Mapabilegnaka a mangibtur iti kinaawan ti hustisia iti kagimongan ken napolitikaan a riribuk. Ken no agbiagka maitunos iti panangiwanwan ti Biblia, matulonganka a mangsango kadagiti dadduma pay a personal a parikut.

Maikadua, babaen ti panangadal iti Biblia, magun-odmo ti namnama nga adayo a nasaysayaat ngem iti aniaman a maitukon ti organisasion ti tao. Ti panagungar dagiti gagayyem ken kapamilia ket paset ti namnama nga isursuro ti Biblia. Mangipaay ti Apocalipsis 21:3, 4 iti kanayonan a detalye: “Ti Dios a mismo addanto [iti sangatauan]. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.” Kaipapananna daytoy nga asidegen nga agpatingga iti agnanayon ti amin a pakaigapuan ti panagladingitmo. Matungpalto dagiti kari ti Biblia, ket mabalinmo a matagiragsak ti kaitungpalanda. Makaliwliwa uray ti pannakaammo laeng nga asidegen a sumayaat ti kasasaad. Maysa a pakaigapuan ti ragsak ti pannakaammo a saanka nga agsagaba iti agnanayon no matayka.

Kas panangyilustrar: Sumagmamano a tawen ti napalabasen, naimatangan ni Maria ti in-inut ken nasaem nga ipapatay ni lakayna gapu iti kanser. Saanna pay a nailiwliwag ti ladingitna idi isu ken dagiti tallo nga annakna a babbai ket napapanaw iti pagtaenganda gapu iti pinansial a parikut. Dua a tawen kalpasanna, naduktalan nga agsakit ni Maria iti kanser. Namindua a naopera ken inaldaw nga agpapaut-ot. Iti laksid dagitoy a parikut, positibo unay ti panagpampanunotna nga uray la natignay a mangparegta kadagiti sabsabali. Kasano a nataginayonna ti kinaragsakna?

Kuna ni Maria: “No adda parikutko, liklikak ti agpanunot iti bin-ig a maipapan kaniak. Liklikak nga iyimtuod dagitoy a saludsod: ‘Apay a siak pay? Apay nga adda ti kastoy a sagsagabaek? Apay a masapul nga agsakitak?’ Makapaksuy ti negatibo a panagpampanunot. Imbes ketdi, usarek ti pigsak nga agserbi ken ni Jehova ken tumulong kadagiti sabsabali. Dayta ti mangipapaay kaniak iti ragsak.”

Kasano a ti namnama nakatulong ken ni Maria? Ur-urayen ni Maria ti masanguanan inton ikkaten ni Jehova ti sakit ken dadduma pay a parikut ti sangatauan. No mapan agpaagas iti ospital, iranranudna dayta a namnama kadagiti dadduma nga agsakit iti kanser, a nalabit desperado gapu iti kasasaadda. Kasano kapateg ken ni Maria ti namnama? Kunana: “Masansan a panunotek ti ibagbaga ti Biblia iti Hebreo 6:19, a sadiay dineskribir ni Pablo ti namnama kas maysa nga angkla para iti kararua. No awan dayta nga angkla, mayanudka a kas iti bangka a di nakaangkla bayat ti bagyo. Ngem no nakaangklaka, natalgedka iti laksid dagiti arig bagyo a parikutmo.” Dayta a ‘namnama iti agnanayon a biag nga inkari ti Dios a saan a mabalin nga agulbod’ isu ti tumultulong ken ni Maria tapno agtalinaed a naragsak. Kasta met ti mabalin a maitulong kenka ti namnama.​—Tito 1:2.

Babaen ti panangadal iti Biblia, makasarakka iti pudno a kinaragsak iti laksid dagiti parikut. Nupay kasta, mabalin nga adda dagiti saludsodmo maipapan iti kinapraktikal ti panagadal iti Biblia. Pakaragsakan dagiti Saksi ni Jehova nga ipakita kenka dagiti Nainkasuratan a sungbat a kasapulan a maammuam tapno agbalinka a pudno a naragsak. Bayat nga ur-urayem ti kaitungpalan ti namnama nga ituktukon ni Jehova, mabalinmo ti maibilang kadagidiay nadeskribir iti kastoy: “Magtengandanto ti panagragsak ken panagrag-o, ket agtalawto ti ladingit ken panagsennaay.”​—Isaias 35:10.

[Footnote]

[Ladawan iti panid 7]

Mangparayray iti kinaragsak ti panagungar nga ipampanamnama ti Biblia