Tuladenyo ti Kinatulnog ken Kinatured ni Kristo

“Bumilegkayo! Pinarmekko ti lubong.”​—JUAN 16:33.

1. Kasano katulnog ni Jesus iti Dios?

KANAYON nga inaramid ni Jesu-Kristo ti pagayatan ti Dios. Pulos a dina pinanunot ti agsukir iti nailangitan nga Amana. (Juan 4:34; Heb. 7:26) Ngem maysa idi a karit ti agbalin a natulnog gapu kadagiti napasaranna ditoy daga. Manipud rugi ti panangasaba ni Jesus, dagiti bumusbusor kenkuana, a pakairamanan ni Satanas, pinadasda a kombinsiren, piliten, wenno allilawen a tallikudanna ti kinamatalekna. (Mat. 4:1-11; Luc. 20:20-25) Dagitoy a bumusbusor ti nakaigapuan ti nakaro a pannakaburibor ni Jesus ken pannakaparigatna iti pisikal. Kamaudiananna, nagballigida a nangpapatay kenkuana iti pagtutuokan a kayo. (Mat. 26:37, 38; Luc. 22:44; Juan 19:1, 17, 18) Iti laksid amin dagitoy, ken iti nakaro a panagsagabana, nagtalinaed ni Jesus a ‘natulnog agingga ken patay.’​—Basaen ti Filipos 2:8.

2, 3. Ania ti maadaltayo iti kinatulnog ni Jesus iti laksid dagiti sinagabana?

² Ti napadasan ni Jesus kas tao ditoy daga ti nangisuro kenkuana iti baro nga aspeto ti kinatulnog. (Heb. 5:8) Agparang a saanen a kasapulan ni Jesus ti kanayonan a panagsursuro maipapan iti panagserbi ken Jehova. Total, di mabilangen a panawen a tinagiragsakna ti nasinged a pannakikadua ken ni Jehova ken isu ti “nasigo a managobra” ti Dios bayat ti panamarsua. (Prov. 8:30) Nupay kasta, pinaneknekanna a naan-anay ti kinatarnawna babaen ti panagibturna kas tao iti laksid dagiti sinagabana. Ni Jesus, ti Anak ti Dios, ket nagtultuloy a rimmang-ay iti naespirituan. Ania ti masursurotayo iti ulidanna?

³ Nupay perpekto idi a tao ni Jesus, saan a nagpannuray iti bagina tapno mataginayonna ti naan-anay a kinatulnogna. Inkararagna ti tulong ti Dios tapno makapagtalinaed a natulnog. (Basaen ti Hebreo 5:7.) Masapul met nga agbalintayo a napakumbaba ken kanayontayo nga agkararag iti Dios tapno makapagtalinaedtayo a natulnog. Dayta ti makagapu a binalakadan ni apostol Pablo dagiti Kristiano: “Pagtalinaedenyo kadakayo daytoy a kababalin iti isip nga adda met ken Kristo Jesus,” nga “impakumbabana ti bagina ket nagtulnog agingga iti ipapatay.” (Fil. 2:5-8) Paneknekan ti ulidan ni Jesus a posible nga agbalin a natulnog dagiti tattao iti tengnga ti nadangkes a kagimongan. Pudno, perpekto ni Jesus. Ngem kabaelan met kadi nga aramiden dayta dagiti imperpekto a kas kadatayo?

Natulnog iti Laksid ti Kinaimperpekto

4. Ania ti kaipapanan ti pannakaparsuatayo nga addaan iti wayawaya nga agpili?

⁴ Ti Dios pinarsuana da Adan ken Eva kas intelihente a parsua ken addaan iti wayawaya nga agpili. Kas kaputotanda, addaantayo met iti wayawaya nga agpili. Ania ti kayat a sawen dayta? Kaipapananna nga adda kadatayo no kayattayo nga aramiden ti naimbag wenno dakes. Iti sabali a pannao, inikkannatayo ti Dios iti wayawaya nga agpili no agtulnogtayo kenkuana wenno saan. Ngem dayta a dakkel a wayawaya ket addaan iti kakuyog a responsabilidad. Kinapudnona, ti pangngeddengtayo kaipapananna ti biag wenno ipapataytayo. Adda pay epektona kadagiti sabsabali.

5. Ania a dangadang ti mapaspasarantayo amin, ken kasanotayo nga agballigi?

⁵ Gapu iti natawidtayo a kinaimperpekto, saan a kanayon a nalaka ti agtulnog kadagiti linteg ti Dios. Kasta ti narikna ni Pablo. Insuratna: “Makitak iti kamkamengko ti sabali a linteg a makigubgubat iti linteg ti panunotko ken mangiturturong kaniak a kautibo iti linteg ti basol nga adda iti kamkamengko.” (Roma 7:23) Siempre, nalaklaka ti agtulnog no awan ti kalikagumanna a panagsakripisio, saem, wenno rigat. Ngem ania ti aramidentayo no agsupadi ti tarigagaytayo nga agtulnog ken “ti derrep ti lasag ken ti derrep dagiti mata”? Dagitoy a di umiso a tarigagay ket maigapu iti kinaimperpektotayo ken iti impluensia “ti espiritu ti lubong,” ken nakabilbilegda. (1 Juan 2:16; 1 Cor. 2:12) Tapno masarangettayo dagitoy, masapul nga ‘isaganatayo ti pusotayo’ sakbay a maipasangotayo iti parikut wenno pakasuotan ken determinadotayo nga agtulnog ken Jehova aniaman ti mapasamak. (Sal. 78:8) Naglaon ti Biblia kadagiti adu a pagarigan dagidiay nagballigi gapu ta insaganada ti pusoda.​—Esd. 7:10; Dan. 1:8.

6, 7. Iyilustrar no kasano a ti personal a panagadal matulongannaka a mangaramid kadagiti nainsiriban a pangngeddeng.

⁶ Ti maysa a pamay-an tapno maisaganatayo ti pusotayo ket babaen ti naanep a panagadal iti Kasuratan ken kadagiti publikasion a naibatay iti Biblia. Iladawanmo ti bagim iti daytoy a situasion. Ipapanmo nga eskediul ti personal a panagadalmo. Kalkalpasmo nga inkararag ti espiritu ni Jehova tapno tulongannaka a mangyaplikar iti naadalmo iti Saona. Planom a buyaen ti maysa a pelikula iti telebision iti sumaganad a rabii. Nadamagmo a nasayaat dayta a pelikula, ngem ammom met a nalaokan dayta iti imoralidad ken kinaranggas.

⁷ Utobem ti balakad ni Pablo iti Efeso 5:3: “Ti pannakiabig ken tunggal kita ti kinarugit wenno kinaagum saan koma nga uray madakamat iti nagtetengngaanyo, kas maitutop kadagiti nasantuan a tattao.” Malagipmo met ti balakadna iti Filipos 4:8. (Basaen.) Bayat nga utobem dagita a naipaltiing a balakad, isaludsodmo, ‘No igaggagarak a buyaen dagiti kasta a pelikula, tultuladek kadi ti naan-anay a kinatulnog ni Jesus iti Dios?’ Ania ti aramidem? Ituloymo kadi a buyaen dayta a pelikula?

8. Apay a nasken a taginayonentayo dagiti nangato a pagalagadan ti Dios?

⁸ Maysa a biddut no tagilag-anentayo dagiti pagalagadan ti Dios, a nalabit a panunotentayo a nabilegtayo a mangsaranget kadagiti epekto ti dakes a pannakikadua, a pakairamanan ti naranggas ken imoral a paglinglingayan. Imbes ketdi, masapul a salaknibantayo ti bagitayo ken dagiti annaktayo manipud kadagiti makadadael nga impluensia ni Satanas. Ikagumaan dagiti tattao a salakniban ti kompiuterda manipud kadagiti virus a mangdadael kadagiti linaonna nga impormasion, iti panagandarna, ken iti mismo a kompiuter ken dadduma pay a maakaranna. Saan kadi a nasken nga ad-adda pay a salaknibantayo ti bagitayo manipud kadagiti “pangallilaw a pamuspusan” ni Satanas?​—Efe. 6:11.

9. Apay a masapul nga inaldaw a determinadotayo nga agtulnog ken Jehova?

⁹ Dandani inaldaw nga adda dagiti gundaway a masapul nga ikeddengtayo no aramidentayo dagiti bambanag maitunos iti pamay-an ni Jehova. Tapno maisalakantayo, masapul nga agtulnogtayo iti Dios ken iyaplikartayo dagiti nalinteg a pagalagadanna. No tuladentayo ti kinatulnog ni Kristo uray “agingga iti ipapatay,” ipakpakitatayo a pudno ti pammatitayo. Gunggonaanto ni Jehova ti kinamatalektayo. Inkari ni Jesus: “Ti nakapagibtur agingga iti panungpalan isunto ti maisalakan.” (Mat. 24:13) Nabatad nga agkalikagum daytoy iti panangpatanor iti umiso a kinatured kas iti imparangarang ni Jesus.​—Sal. 31:24.

Ni Jesus​—Ti Kangrunaan nga Ulidan ti Kinatured

10. Ania dagiti pakarigatan a mabalin a pakaipasanguantayo, ken ania ti rumbeng nga aramidentayo?

¹⁰ Gapu ta maipaspasangotayo iti kababalin ken kondukta ti lubong, kasapulantayo ti kinatured tapno saantayo a maimpluensiaan. Makidangdangadang dagiti Kristiano kadagiti pakarigatan mainaig iti moral, kagimongan, kuarta, ken relihion a mabalin a mangisiasi kadakuada iti nalinteg a dalan ni Jehova. Adu ti maipaspasango iti ibubusor ti pamilia. Iti dadduma a pagilian, nakarkaro ita ti panangitandudo dagiti eskuelaan iti teoria ti ebolusion, ken umad-adun ti mangak-akseptar iti ateismo. Iti sidong dagiti kasta a pakarigatan, saantayo a mabalin ti agpampamayan. Masapul nga agtignaytayo tapno masaranget ken masalaknibantayo ti bagitayo. Ipakita ti ulidan ni Jesus no kasanotayo nga agballigi.

11. Kasano a ti panangutob iti ulidan ni Jesus tulongannatayo nga agbalin nga ad-adda a natured?

¹¹ Kinuna ni Jesus kadagiti adalanna: “Iti lubong addaankayo iti rigat, ngem bumilegkayo! Pinarmekko ti lubong.” (Juan 16:33) Pulos a di nagpaimpluensia ni Jesus iti lubong. Dina impalubos a pasardengen ti lubong a mangitungpal iti annongenna a mangasaba wenno mangtagilag-an kadagiti pagalagadan ti pudno a panagdayaw ken umiso a kondukta. Kastatayo met koma. Inkararag ni Jesus maipapan kadagiti adalanna: “Saanda a paset ti lubong, a kas kaniak a saan a paset ti lubong.” (Juan 17:16) Ti panangadal ken panangutob iti kinatured ni Kristo ti tumulong kadatayo a maaddaan iti tured tapno makapagtalinaedtayo a naisina iti lubong.

Tuladenyo ti Kinatured ni Jesus

12-14. Mangted kadagiti pagarigan a nangipakita ni Jesus iti kinatured.

¹² Imparangarang ni Jesus ti naisangsangayan a kinatured iti intero a ministeriona. Iti panangusarna iti autoridadna kas Anak ti Dios, situtured a ‘simrek iti templo ket pinaruarna amin dagidiay aglaklako ken aggatgatang idiay templo, ket binalintuagna dagiti lamisaan dagiti agsuksukat iti kuarta ken dagiti bangko dagidiay aglaklako kadagiti kalapati.’ (Mat. 21:12) Idi a dagiti soldado immayda arestuen ni Jesus iti maudi a rabiina ditoy daga, situtured a kinunana tapno masalaknibanna dagiti adalanna: “No siak ti sapsapulenyo, bay-anyo dagitoy a mapan.” (Juan 18:8) Kalpasanna, binilinna ni Pedro a mangidulin iti kampilanna, a mangipakita a ni Jehova ti pagpannurayan ni Jesus imbes a kadagiti igam.​—Juan 18:11.

¹³ Situtured nga imbutaktak ni Jesus dagiti di naasi a palso a mannursuro ken dagiti di umiso a pannursuroda. “Asikayo pay, eskriba ken Fariseo, a managinsisingpet! agsipud ta rikpanyo ti pagarian ti langlangit iti sanguanan dagiti tattao,” kinuna kadakuada ni Jesus. “Saanyo nga inkankano ti nadagdagsen a bambanag iti Linteg, nga awan sabali, ti kinahustisia ken asi ken kinamatalek. . . . Dalusanyo ti ruar ti kopa ken ti pinggan, ngem iti uneg napnoda iti samsam ken panaglablabes.” (Mat. 23:13, 23, 25) Kasapulan met dagiti adalan ni Jesus ti kasta met laeng a kinatured gapu ta dagiti palso a lider ti relihion idadanes ken papatayenda ti dadduma kadakuada.​—Mat. 23:34; 24:9.

¹⁴ Situtured ni Jesus a nangsaranget uray kadagiti demonio. Naminsan, isu ket naipasango iti lalaki a naluganan kadagiti demonio ken nakapigpigsa daytoy ta awan ti makabael a mangikadena kenkuana. Ngem saan a nagbuteng ni Jesus. Imbes ketdi, pinaruarna ti adu a demonio a nanglugan iti lalaki. (Mar. 5:1-13) Ti Dios saanna nga inikkan dagiti Kristiano ita iti pannakabalin nga agaramid kadagiti kasta a milagro. Kaskasdi, iti panangasaba ken panangisurotayo, maipaspasangotayo met iti naespirituan a pannakidangadang ken Satanas, daydiay ‘nangbulsek iti pampanunot dagiti di manamati.’ (2 Cor. 4:4) Kas ken Jesus, ti igamtayo ket “saan a nainlasagan, ngem mannakabalin babaen iti Dios a maipaay a pangbalintuag iti natibker ti pannakasarikedkedna a bambanag”​—dagiti rimmamuten nga ulbod a sursuro dagiti relihion. (2 Cor. 10:4) Makasursurotayo ken Jesus no kasano nga usaren dagitoy a naespirituan nga igam.

15. Ania ti nakaibatayan ti kinatured ni Jesus?

¹⁵ Ti kinatured ni Jesus ket naibatay iti pammati, saan nga iti kinapangas. Kastatayo met koma. (Mar. 4:40) Kasano a maparayraytayo ti pudno a pammati? Adda manen maadaltayo ken Jesus. Impakitana a naan-anay ti pannakaammo ken panagtalekna iti Kasuratan. Imbes a literal a kampilan, inusar ni Jesus kas igam ti kampilan ti espiritu, ti Sao ti Dios. Kanayon a pinatalgedanna dagiti pannursurona babaen ti Kasuratan. Masansan nga irugina dagiti sasaona iti: “Adda a naisurat,” kayatna a sawen, adda a naisurat iti Sao ti Dios.a

16. Kasano nga ad-adda a rumayray ti pammatitayo?

¹⁶ Tapno maaddaantayo iti pammati a makadaer kadagiti pakasuotan a di malapdan a dumteng iti maysa nga adalan, masapul nga inaldaw a basaen ken adalentayo ti Biblia ken tabunuantayo dagiti Nakristianuan a gimong. Iti kasta, maipasagepsep iti isiptayo dagiti kinapudno a nakaibatayan ti pammatitayo. (Roma 10:17) Masapul met a mennamennaentayo​—utoben a naimbag​—dagiti maad-adaltayo ken ipapusotayo dagita. Ti laeng nabiag a pammati ti makatignay kadatayo nga agbalin a natured. (Sant. 2:17) Ken masapul met nga ikararagtayo ti nasantuan nga espiritu gapu ta ti pammati ket paset ti bunga ti espiritu.​—Gal. 5:22.

17, 18. Kasano a nangipakita iti kinatured ti maysa nga agtutubo a kabsat idiay eskuelaan?

¹⁷ Napadasan ti maysa nga agtutubo a kabsat nga agnagan iti Kitty no kasano a mangted iti tured ti pudno a pammati. Manipud kinaubingna, ammona a saanna a rumbeng nga “ibain ti naimbag a damag” idiay eskuelaan, ken kayatna a talaga a kasabaan dagiti kaeskuelaanna. (Roma 1:16) Kada tawen, kayatna nga iranud ti naimbag a damag ngem agpangadua a mangaramid iti dayta gapu ta maamak. Sumagmamano a tawen kalpasanna, immakar iti sabali nga eskuelaan. Kunana, “Mangrugi ita, diakon sayangen ti gundawayko a mangasaba.” Inkararag ni Kitty a maaddaan iti kinaannad, umiso a gundaway, ken kinatured a kas iti imparangarang ni Kristo.

¹⁸ Iti umuna nga aldaw ti klase, nakiddaw kadagiti estudiante nga iyam-ammoda ti bagida. Sumagmamano ti nangdakamat iti relihionda, ngem kunada a saanda nga an-annuroten dagiti patpatienda. Nabigbig ni Kitty a dayta ti gundaway nga inkarkararagna. Idi batangnan, sikokompiansa a kinunana, “Maysaak kadagiti Saksi ni Jehova, ken ti Biblia ti nakaibatayan dagiti patpatiek ken mangiwanwanwan iti konduktak.” Bayat nga agsasao, naglibbi ti dadduma a kaklasena. Ngem dadduma ti nagimdeng ken nagsaludsod kalpasanna. Isu ket inusar pay ti maestrona kas pagwadan iti panangidepensa ti maysa kadagiti patpatienna. Maragsakan unay ni Kitty gapu ta tinuladna ti kinatured ni Jesus.

Tuladenyo ti Pammati ken Kinatured nga Imparangarang ni Kristo

19. (a) Ania ti ramanen ti pudno a pammati? (b) Kasano a maparagsaktayo ni Jehova?

¹⁹ Nabigbig met dagiti apostol a ti kinaturedda ket masapul a naibatay iti pammati. Gapuna, impakaasida ken Jesus: “Ikkannakami iti ad-adu pay a pammati.” (Basaen ti Lucas 17:5, 6.) Ti pudno a pammati ket saan laeng a panamati nga adda Dios. Ramanenna ti panangpatanor iti nauneg ken nasinged a relasion ken Jehova, kas iti relasion ti maysa nga ubing iti naasi ken naayat nga amana. Napaltiingan ni Solomon a mangisurat: “Anakko, no ti pusom nagbalin a masirib, ti pusok agrag-onto, siak a mismo. Ket dagiti bekkelko agragsakdanto no dagiti bibigmo agsaoda iti kinalinteg.” (Prov. 23:15, 16) Umasping iti dayta, maragsakan ni Jehova no situtured nga annurotentayo dagiti nalinteg a pagalagadanna, ken ti pannakaammo iti dayta parayrayenna ti kinaturedtayo. Gapuna, kanayon a tuladentayo ti ulidan ni Jesus, a situtured a nangitandudo iti kinalinteg!

[Footnote]

Mailawlawagyo Kadi?

• Ania ti makatulong kadatayo nga agtalinaed a natulnog iti laksid ti kinaimperpektotayo?

• Ania ti nakaibatayan ti pudno a pammati, ken kasano a matulongannatayo nga agbalin a natured?

• Ania ti resulta ti panagbalin a natulnog ken panangipakita iti kinatured a kas iti imparangarang ni Kristo?

[Ladawan iti panid 13]

‘Isagsaganam kadi ti pusom’ tapno masarangetmo dagiti sulisog?

[Ladawan iti panid 15]

Kas ken Jesus, maipakitatayo ti kinatured a naibatay iti pammati