Umadanika iti Dios

“Agtignaykanto a Sisusungdo”

2 SAMUEL 22:26

MANMANO la ketdi ti ad-adda a makasair ngem ti panangliput ti maysa a pagtaltalkantayo. Gagangayen ti kasta a pannakaupay iti daytoy di nasungdo a lubong. (2 Timoteo 3:1-5) Adda kadi asinoman kadatayo a makapagtalinaed a nasungdo iti amin a tiempo? Usigentayo ti pammatalged ni Ari David iti nagkauna nga Israel.

Napasaran ni David dagiti kakaruan a kita ti di kinasungdo. Gapu iti imon, kasta unay ti panangidadanes kenkuana ni Saul nga umuna nga ari ti Israel, a nanggapuanna nga aglibas kas pugante. Saan met a nagtalinaed a nasungdo ti mismo nga asawana a ni Mical, a ‘nangrugi a mangumsi kenkuana iti pusona.’ (2 Samuel 6:16) Ti pagtaltalkanna a mammagbaga a ni Ahitofel nakikumplot iti iyaalsa maibusor kenkuana. Siasino ti nangidaulo iti dayta a panagkukumplot? Ti mismo nga anak ni David a ni Absalom! Gapu kadagita a napasaran ni David, naupay kadin ket awanen ti ibilangna a nasungdo iti amin a gundaway?

Masungbatan dayta iti sasao ni David iti 2 Samuel 22:26. Kas tao a di maisin ti pammatina, naindaniwan nga inkanta ni David ken Jehova a Dios: “Iti daydiay nasungdo agtignaykanto a sisusungdo.” Agtalek ni David a kasanoman ti panangupay kenkuana ti dadduma a tattao, agtultuloy a nasungdo ni Jehova kenkuana.

Usigentayo ti sasao ni David. Ti Hebreo a sao a naipatarus nga ‘agtignay a sisusungdo’ mabalin met nga ipatarus nga “agtignay buyogen ti naayat a kinamanangngaasi.” Ayat ti pundasion ti pudno a kinasungdo. Siaayat a makisinninged ni Jehova kadagidiay nasungdo kenkuana.a

Ipasimudaag pay dayta a ti kinasungdo ket saan laeng a basta emosion; nabuyogan dayta iti tignay. Agtigtignay ni Jehova buyogen ti kinasungdo, kas napaneknekan a mismo ni David. Bayat ti karirigatan a tiempo iti biag ni David, nagtignay ni Jehova para kenkuana, a sisusungdo a sinalakniban ken inwanwanna ti matalek nga ari. Agyamyaman ni David ket pinadayawanna ni Jehova gapu iti pannakaispalna iti “dakulap dagiti amin a kabusorna.”​—2 Samuel 22:1.

Ania ti masursurotayo kadagiti sasao ni David? Di pulos agbalbaliw ni Jehova. (Santiago 1:17) Kanayon a napudno kadagiti pagalagadanna ken kanayon a matalek iti karina. Iti sabali pay a kanta, insurat ni David: “Ni Jehova . . . saannanto a panawan dagidiay nasungdona.”​—Salmo 37:28.

Napateg ken Jehova ti kinasungdotayo kenkuana. Ipatpategna ti nasungdo a panagtulnogtayo kenkuana, ken idagdagadagna a tuladentayo ti kinasungdona iti panangtratotayo iti sabsabali. (Efeso 4:24; 5:1) No aramidentayo dayta, makapagtalektayo a saannatayto a baybay-an. Uray kasano ti panangupay kadatayo ti dadduma a tao, makapagtalektayo a sisusungdo nga agtignay ni Jehova para kadatayo, a tulongannatayo a mangsango a sibaballigi iti aniaman a pakasuotantayo. Saanka kadi a matignay nga umadani ken Jehova, “Daydiay nasungdo”?​—Apocalipsis 16:5.

[Footnote]