Posible Kadi ti Agbalin a Kontento?
“Uray napanglawka no kontentoka, nabaknangka. Ngem uray nabaknangka no saanka met a kontento, napanglawka.” —Benjamin Franklin.
MAITUNOS iti dayta a pagsasao, nasursuro ti adu a tattao a ti pannakakontento ket saan a magatang a kas iti produkto. Di pagsiddaawan a ti pannakakontento wenno pannakapnek ket naatap iti daytoy lubong a mangitantandudo iti pananggun-od iti ad-adu a sanikua, natantan-ok a gapuanan, wenno kasasaad ti biag ti sabsabali! Naimpluensiaannaka kadi ti aniaman kadagitoy?
• Ti nakaad-adu a pangallukoy dagiti adbertismen a mangipasimudaag nga agbalinka laeng a kontento no gumatangka iti ad-adu pay.
• Ti kompetision iti pagtrabahuan ken iti eskuelaan a manggutugot kenka a mangidilig iti bagim kadagiti sabsabali.
• Dagiti tattao nga awanan apresasion kadagiti ar-aramidem agpaay kadakuada.
• Gagayyem a manggutugot kenka nga umapal kadagiti sanikuada.
• Dagiti kangrunaan a saludsod maipapan iti biag a saanmo a maisapulan ti sungbat.
Gapu kadagitoy a karit, talaga kadi a posible ti agbalin a kontento? Tinukoy ni apostol Pablo ti “palimed ti panagbalin a kontento.” No maminsan, agbiag nga addaan kinaruay ken no dadduma, addaan iti bassit. Ni Pablo ay-ayaten dagiti gagayyemna ngem lalaisen ti dadduma. Kaskasdi, kinunana a “naadalko ti agbalin a kontento aniaman ti kasasaad.”—Dakami ti nangitaliko; Filipos 4:11, 12, New International Version.
Ti panagbalin a kontento ket maysa a sekreto kadagidiay saan a mangikagkagumaan a mangsursuro iti dayta, ngem kas imbaga ni Pablo, mabalin nga adalen dayta. Awisendaka itan a mangusig iti lima a sekreto ti panagbalin a kontento a masarakan iti Sao ti Dios a ti Biblia.