Agtutubo​—Pangusaranyo iti Biagyo?

“Ti wagas a panangiturongko kadagiti danogko saan a kasla panangkabkabil iti angin.”​—1 COR. 9:26.

1, 2. Tapno agballigika bayat nga agmatmataenganka, ania ti masapul nga adda kenka?

NO AGBIAHEKA iti dimo kabesado a lugar, nalabit a mangitugotka iti mapa ken kompas. Makatulong kenka ti mapa a mangammo iti eksakto a lokasionmo ken mangikeddeng iti dalan a surotem. Makatulong met kenka ti kompas nga agtalinaed iti umiso a dalan. Ngem agpada nga awan serserbi ti mapa ken kompas no dimo ammo ti papanam. Tapno dika mayaw-awan, masapul nga ammom ti eksakto a destinasionmo.

² Maipasangoka iti umasping a situasion bayat nga agmatmataenganka. Ngem addaanka iti mapagpannurayan a mapa ken kompas. Ti Biblia ket maysa a mapa a makatulong kenka a mangammo no ania a dalan ti rumbeng a surotem. (Prov. 3:5, 6) No umiso ti pannakasanay ti konsiensiam, dakkel ti maitulongna tapno makapagtalinaedka iti umiso a dalan. (Roma 2:15) Agserbi ti konsiensia a kas kompas. Ngem tapno naballigi ti biagmo, masapul nga ammom ti destinasionmo. Masapul nga addaanka kadagiti nalawag a kalat.

3. Sigun iti dinakamat ni Pablo iti 1 Corinto 9:26, ania dagiti pagimbaganna no addaanka kadagiti kalat?

³ Ginupgop ni apostol Pablo dagiti pagimbagan ti panangipasdek kadagiti kalat ken ti panangikagumaan a mangragpat kadagita idi kinunana: “Ti wagas a panagtarayko di mapagduaduaan; ti wagas a panangiturongko kadagiti danogko saan a kasla panangkabkabil iti angin.” (1 Cor. 9:26) No addaanka kadagiti kalat, adda direksion ti biagmo. Di agbayag, mangaramidkanto iti sumagmamano a napateg a desision mainaig iti panagdayaw, panggedan, panagasawa, pamilia, ken dadduma pay. No dadduma, kasla matikawka no ania ti aramidem. Nupay kasta, no iplanom a nasaksakbay ti aramidem, nga ibataymo dagiti desisionmo kadagiti kinapudno ken prinsipio a linaon ti Sao ti Dios, saanka a masulisog a magna iti di umiso a dana.​—2 Tim. 4:4, 5.

4, 5. (a) Ania ti mabalin a mapasamak no awan ti kalatmo? (b) Apay a siguraduem koma a makaay-ayo iti Dios dagiti aramidem a desision?

⁴ No awan ti kalatmo, adda posibilidadna a maimpluensiaandaka dagiti kapatadam ken mannursurom a mangaramid iti ipagarupda a pagsayaatam. Siempre, uray addaanka kadagiti masinunuo a kalat, adda latta dagiti mangted kadagiti sabali a singasing. Bayat a pampanunotem dagiti singasingda, isaludsodmo iti bagim, ‘Dagiti kadi kalat nga ibagbagada ket makatulong kaniak a manglaglagip iti Namarsua bayat nga agtutuboak pay wenno singaendak laeng a mangaramid iti dayta?’​—Basaen ti Eclesiastes 12:1.

⁵ Apay a siguraduem koma a makaay-ayo iti Dios dagiti aramidem a desision? Ti maysa a rason ket naggapu ken Jehova ti amin a naimbag a banag nga adda kadatayo. (Sant. 1:17) Kinapudnona, addaantayo amin iti utang a naimbag a nakem ken Jehova. (Apoc. 4:11) Adda pay kadi nasaysayaat a pamay-an a maipakitam ti panagyamanmo ken Jehova ngem iti panangikabilangam kenkuana no mangipasdekka kadagiti kalat? Usigentayo no ania dagiti kalat a nagsayaat a gun-oden ken no ania ti masapul nga aramidem tapno maragpatmo dagita.

Ania Dagiti Kalat a Mabalinmo nga Ipasdek?

6. Ania a napateg a kalat ti mabalinmo nga ipasdek, ken apay?

⁶ Kas nadakamat iti napalabas nga artikulo, daytoy ti maysa a napateg a kalat: paneknekam iti bagim a pudno ti isursuro ti Biblia. (Roma 12:2; 2 Cor. 13:5) Mabalin a mamati dagiti kapatadam iti ebolusion wenno kadagiti di umiso a doktrina ti nagduduma a relihion gapu ta naibaga kadakuada a dayta ti rumbeng a patienda. Ngem saanka koma a basta mamatpati. Laglagipem a kayat ni Jehova nga agserbika kenkuana buyogen ti intero a panunotmo. (Basaen ti Mateo 22:36, 37.) Kayat ti nailangitan nga Amatayo nga ibataytayo ti pammatitayo kadagiti kinapudno iti Biblia.​—Heb. 11:1.

7, 8. (a) Ania dagiti simple a kalat a mangpabileg iti pammatim? (b) Ania ti matagiragsakmo apaman a maragpatmo ti dadduma kadagiti simple a kalatmo?

⁷ Tapno mapabileg ti pammatim, apay a dika mangipasdek iti sumagmamano a simple a kalat? Ti maysa ket ti inaldaw a panagkararag. Tapno espesipiko ken saan a maulit-ulit dagiti kararagmo, mabalinmo a lagipen wenno isurat dagiti espesipiko a pasamak iti agmalem a kayatmo nga iraman kadagiti kararagmo. Siguraduem a saan laeng a dagiti nakaipasanguam a karit ti dakamatem no di ket dagiti pay bambanag a natagiragsakmo. (Fil. 4:6) Ti sabali pay a kalat ket ti inaldaw a panagbasa iti Biblia. Ammom kadi a no makabasaka iti agarup uppat a panid iti kada aldaw, mabasam ti intero a Biblia iti makatawen?a “Naragsak ti tao a . . . ti pakaragsakanna adda iti linteg ni Jehova,” kuna ti Salmo 1:1, 2, “ket iti lintegna agbasa iti nababa a timek iti aldaw ken rabii.”

⁸ Ti maikatlo a simple a kalat a mabalinmo nga ipasdek ket ti panangisaganam iti komentom para iti tunggal gimong. No damo, mabalin nga uray basaem ti sungbatmo wenno ti maysa a teksto. Inton agangay, pagbalinem a kalat ti agkomento iti bukodmo a sasao. Kinapudnona, tunggal agkomentoka, mangipapaayka iti sagut ken Jehova. (Heb. 13:15) Apaman a maragpatmo ti dadduma kadagita a kalat, dumakkel ti kompiansam, kasta met ti apresasionmo ken Jehova. Iti kasta, nakasaganakan a mangipasdek kadagiti dadakkel a kalat.

9. No saanka pay a maysa nga agibumbunannag iti Pagarian, ania dagiti dadakkel a kalat a mabalinmo nga ipasdek?

⁹ Ania dagiti dadakkel a kalat a mabalinmo nga ipasdek? No dika pay makiramraman iti trabaho a panangasaba iti publiko, mabalin nga aramidem a kalat ti panagbalin nga agibumbunannag iti Pagarian. No naragpatmon dayta a nagsayaat a kalat, aramidem koma dayta a regular ken epektibo, a dimo palabsen ti makabulan a dika mangasaba. Sursuruem met nga usaren ti Biblia iti ministerio. Bayat nga ar-aramidem dayta, mariknamto a naragragsakka a mangasaba. Kalpasanna, mabalinmo a nayonan ti tiempo a busbusbosem iti trabaho a panagbalaybalay wenno ikagumaam pay ketdi ti mangyadal iti Biblia. Kas di bautisado nga agibumbunannag, adda pay kadi nasaysayaat a kalat ngem iti panagbalin a kualipikado a mabautisaran tapno agbalinka a dedikado ken bautisado a Saksi ni Jehova a Dios?

10, 11. Ania dagiti dadakkel a kalat a mabalin a ragpaten dagiti bautisado nga agtutubo?

¹⁰ No maysakan a bautisado nga adipen ni Jehova, dagitoy ti sumagmamano a dadakkel a kalat a mabalinmo a ragpaten. Mabalin a kayatmo ti sagpaminsan a tumulong kadagiti kongregasion tapno wanasenyo dagiti manmano a maasak a teritoria. Mabalinmo pay nga usaren ti pigsa ken salun-atmo nga ag-auxiliary wenno ag-regular pioneer. Pinullo a ribu a nararagsak a payunir ti mangibaga kenka a ti amin-tiempo a serbisio ket maysa a makagunggona a pamay-an a maipakitam a silalagipka iti Namarsua kenka bayat ti kinaagtutubom. Mabalinmo a ragpaten dagita a kalat uray addaka pay la iti poder dagiti nagannakmo. Magunggonaan met ti kongregasionyo no ragpatem dagita a kalat.

¹¹ Saan laeng a ti kongregasionyo ti magunggonaan no ragpatem ti dadduma pay a dadakkel a kalat. Kas pagarigan, mabalinmo nga iplano ti agserbi iti sabali a lugar wenno pagilian nga addaan iti dakdakkel a panagkasapulan. Mabalin a kayatmo ti tumulong a mangibangon kadagiti Kingdom Hall wenno pasilidad ti sanga nga opisina iti sabali a pagilian. Mabalinmo pay ti agserbi iti Bethel wenno agbalin a misionero. Siempre, ti umuna a napateg a kalat a masapul a ragpatem sakbay a padasem a gun-oden ti kaaduan kadagiti nadakamat a dadakkel a kalat ket ti panagpabautisar. No dika pay nabautisaran, usigem no ania ti ramanen ti panangragpat iti dayta a napateg a kalat.

Panangragpat iti Kalat nga Agpabautisar

12. Ania dagiti rason nga agpabautisar ti dadduma, ken apay a saan nga umdas dagita?

¹² Para kenka, ania ti panggep ti bautismo? Mabalin a panunoten ti dadduma a dayta ti mangigawid kadakuada nga agbasol. Adda met dagidiay agpabautisar gapu ta nabautisaranen dagiti kapatadanda. Dadduma nga agtutubo ti agpabautisar tapno maparagsakda dagiti nagannakda. Ngem ti bautismo ket saan a maysa a kontrata a manglapped kenka a mangaramid a sililimed iti kayatmo nga aramiden, wenno agpabautisarka gapu iti panangpilit kenka ti sabsabali. Gapuna, agpabautisarka laeng koma inton naan-anay a matarusam no ania ti ramanen ti panagbalin a Saksi ni Jehova ken no talaga a nakasagana ken situtulokkan a mangibaklay iti daytoy a responsabilidad.​—Ecl. 5:4, 5.

13. Apay a masapul nga agpabautisarka?

¹³ Ti maysa a rason nga agpabautisarka ket gapu ta imbilin ni Jesus kadagiti pasurotna a ‘mangaramidda iti ad-adalan ken bautisaranda ida.’ Impasdekna a mismo ti ulidan babaen ti panagpabautisarna. (Basaen ti Mateo 28:19, 20; Marcos 1:9.) Kanayonanna, napateg nga addang ti panagpabautisar para kadagidiay agtarigagay a maisalakan. Kastoy ti kinuna ni apostol Pedro kalpasan a dinakamatna ti panangibangon ni Noe iti daong a nangispal kenkuana ken iti pamiliana bayat ti Layus: “Daydiay katupag daytoy ket isalsalakannakayo met ita, awan sabali, ti bautismo, . . . babaen ti panagungar ni Jesu-Kristo.” (1 Ped. 3:20, 21) Ngem dina kayat a sawen a ti bautismo ket kasla panangala iti insurance tapno adda proteksionmo no dumteng ti didigra. Imbes ketdi, agpabautisarka gapu ta ay-ayatem ni Jehova ken kayatmo ti agserbi kenkuana buyogen ti intero a puso, kararua, isip, ken pigsam.​—Mar. 12:29, 30.

14. Apay nga agkedked ti dadduma nga agpabautisar, ngem ania ti maipanamnama kenka?

¹⁴ Agkedked ti dadduma nga agpabautisar gapu ta maamakda amangan no mailaksidda inton agangay. Kasta kadi ti panagriknam? Adda met ketdi pagsayaatanna ti kasta a panagamak. Mangipakita dayta a matarusam ti kinadagsen ti responsabilidad nga itden ti panagbalin a Saksi ni Jehova. Ngem mabalin kadi nga adda sabali pay a rason? Nalabit a saanka pay a naan-anay a kombinsido a pagimbagantayo ti panangannurot kadagiti pagalagadan ti Dios. Gapuna, makatulong kenka nga agdesision no panunotem ti nagbanagan dagidiay saan a nangannurot kadagiti pagalagadan ti Dios. Iti sabali a bangir, mabalin nga ipatpategmo met dagiti pagalagadan ti Dios ngem mariknam a dimo kabaelan nga annuroten dagita. Kinapudnona, nasayaat a seniales dayta gapu ta ipakpakitana a napakumbabaka. Ibaga ngamin ti Biblia a manangallilaw ti puso dagiti imperpekto a tattao. (Jer. 17:9) Ngem makapagballigika no kanayon nga ‘agaluadka maitunos iti Sao ti Dios.’ (Basaen ti Salmo 119:9.) Aniaman ti makagapu nga agkedkedka nga agpabautisar, masapul a sanguem dayta.b

15, 16. Kasanom a maammuan no nakasaganakan nga agpabautisar?

¹⁵ Ngem kasanom a maammuan no nakasaganakan nga agpabautisar? Ti maysa a pamay-an ket ti panangyimtuodmo iti bagim iti salsaludsod a kas iti: ‘Kabaelak kadin nga ilawlawag dagiti pamunganayan a pannursuro ti Biblia iti sabsabali? Makiramramanak kadi iti ministerio uray awan dagiti nagannakko? Ikagkagumaak kadi a tabunuan ti amin a Nakristianuan a gimong? Addada kadi malagipko a gundaway a nasarangetko ti panangpilit dagiti kapatadak? Itultuloyko kadi ti agserbi ken Jehova uray agsardeng dagiti nagannak ken gagayyemko? Ikarkararagko kadi ti maipapan iti relasionko iti Dios? Nakaaramidak kadin iti naimpusuan a dedikasion ken Jehova babaen ti kararag?’

¹⁶ Ti bautismo ket maysa nga addang a mangbalbaliw iti biagmo, banag a saan a rumbeng a tagilag-anen. Talaga kadi a nataengankan iti naespirituan, a kabaelamon a tarusan ti kinaserioso daytoy nga addang? Ti kinanataengan ket saan a maibatay iti kinalaingmo nga agpalawag wenno agkomento kadagiti gimong. Imbes ketdi, naibatay dayta iti abilidadmo a mangaramid kadagiti desision maitunos iti pannakaawatmo kadagiti prinsipio ti Biblia. (Basaen ti Hebreo 5:14.) No kabaelamon nga aramiden dayta, agur-uray kenka ti kadakkelan pay laeng a pribilehio​—ti naimpusuan a panagserbi ken ni Jehova ken panagbiag a mangipakita a pudno a dedikadoka kenkuana.

17. Ania ti makatulong kenka a mangsango kadagiti pakasuotan a mabalin a dumteng kalpasan ti bautismom?

¹⁷ Kalpasan unay ti bautismom, mabalin a nakaregregtaka nga agserbi iti Dios. Ngem di agbayag, mabalin a maipasangoka kadagiti suot a mangsubok iti pammati ken kinatibkermo. (2 Tim. 3:12) Dimo koma panunoten nga agmaymaysaka a mangsango kadagita a pakasuotan. Agpabalakadka kadagiti nagannakmo. Agpatulongka kadagiti nataengan a kakongregasionmo. Makigayyemka kadagidiay makabael a mangsaranay kenka. Laglagipem a maseknan kenka ni Jehova ken ipaayannaka iti pigsa a kasapulam tapno mapagballigiam ti aniaman a tumaud a kasasaad.​—1 Ped. 5:6, 7.

Kasanom a Maragpat Dagiti Kalatmo?

18, 19. Kasanoka a magunggonaan no usigem dagiti prioridadmo?

¹⁸ Iti laksid ti panangikagumaam, kasla kadi kurang ti tiempom a mangibanag iti kayatmo ken kasapulam nga aramiden? No kasta, masapul nga usigem dagiti prioridadmo. Kas panangyilustrar: Mangalaka iti timba ket kargaam iti sumagmamano a dadakkel a bato sa punuem iti darat. Ita, napunnon ti timba kadagiti bato ken darat. Ibukbokmo ti nagyan ti timba ngem saanmo nga ibelbelleng dagiti isu met laeng a darat ken bato. Padasem nga ikarga nga umun-una ti darat sa iparabawmo dagiti bato. Saanen nga umanay? Ngamin, inyun-unam nga inkarga ti darat.

¹⁹ Kasta ti karit a pakaipasanguam no iti panangusarmo iti tiempom. No iyun-unam dagiti bambanag a kas iti panaglinglingay, mariknam a kasla kurangen ti panawenmo para iti napatpateg a bambanag​—dagiti naespirituan nga aktibidad. Ngem no surotem ti balakad ti Biblia a ‘siguraduem ti napatpateg a bambanag,’ makitam nga adda gayam umdas a panawenmo para kadagiti interes ti Pagarian ken iti kalkalainganna a panaglinglingay.​—Fil. 1:10.

20. Ania ti rumbeng nga aramidem no madanagan wenno agduaduaka bayat nga ikagkagumaam a ragpaten dagiti kalatmo?

²⁰ Bayat nga ikagkagumaam a ragpaten dagiti kalatmo, kas iti panagpabautisar, mabalin a makariknaka iti danag wenno panagduadua. No mariknam dagita, “ipalladawmo ti dadagsenmo ken Jehova a mismo, ket isu saranayennakanto.” (Sal. 55:22) Addaanka ita iti gundaway a makiraman iti karagsakan ken kapatgan a trabaho iti pakasaritaan ti tao, ti sangalubongan a panangasaba ken panangisuro. (Ara. 1:8) Isu nga agpilika: Buyaem lattan dagidiay mangar-aramid iti dayta a trabaho, wenno makiramanka? Dika koma bumdeng a mangusar iti abilidadmo a mangyadelantar kadagiti interes ti Pagarian. Dimonto pulos pagbabawyan ti panagserbim iti “Namarsuam kadagiti aldaw ti kinaagtutubom.”​—Ecl. 12:1.

[Footnotes]

Ania ti Sungbatyo?

• Apay a masapul a mangipasdekkayo kadagiti kalat?

• Ania dagiti dadduma a kalat a nagpateg a ragpaten?

• Ania ti ramanen ti pananggun-od iti kalat nga agpabautisar?

• Kasano a ti panangusig kadagiti prioridadyo tulongannakayo a mangragpat kadagita?

[Ladawan iti panid 13]

Kalatmo kadi a basaen ti Biblia iti inaldaw?

[Ladawan iti panid 15]

Ania ti makatulong kenka a mangragpat iti kalatmo nga agpabautisar?

[Ladawan iti panid 16]

Ania ti maadalmo iti daytoy nga ilustrasion?