Nalaing a Trabahador a Mangusar iti Sao ti Dios iti Umiso
1 Umiso ti pannakaawag dagiti Kristiano a ministro a kas “katrabahador ti Dios.” (1 Cor. 3:9) Masapul a kalattayo ti mangpatanor iti laingtayo a kas managtrabaho a mangusar “iti sao ti kinapudno iti umiso.”—2 Tim. 2:15.
2 Tapno matulongantayo nga agbalin a nalaing iti ministerio, inraman ti Sosiedad dagiti adu a nagpaiduma a benneg iti New World Translation. Kabisadoyo kadi dagitoy? Us-usarenyo aya dagitoy a benneg iti tay-ak ti ministerio ken iti personal a panagadalyo ti Biblia?
NAKASAGANA A PARABOR
3 Idi damo a nairuar iti New World Translation, masarakantayo a dagiti agkukuros a reperensia, dagiti nota iti baba, ti apendise ken agsisilpo a reperensia ket dakkel unay ti maitulongda iti ministeriotayo, iti panagsagana kadagiti gimong, ken iti pangkaaduan a personal a panagadal. Kalpasanna, idi 1984, anian a ragsaktayo a nakaawat iti daydiay Reference Bible! Nagpaiduma unay a parabor a bumadang kadatayo nga agbalin a nalaing a trabahador! Babaen iti nagaget a panangusar iti daytoy a parabor, nasaysayaat itan ti pannakakabaltayo a mangibangon kadagiti solido a naespirituan a kalidad iti mismo a bagbagitayo ken iti dadduma.—Mat. 7:24; 1 Tim. 4:16; Heb. 5:14.
4 Bayat ti kaaddayo iti ministerio mabalin a makasabetkayo iti maysa a sinsero a Katoliko a mangisitar iti Mateo 16:18 a kas pammatalged a ni Pedro isu daydiay bato a nakaibangonan iti Iglesia Katolika. Mabalinyo a sukimaten dayta a kasuratan idiay New World Translation babaen dagiti agkukuros a reperensia ket masarakanyo dagiti lima a kasuratan a nagreperensia iti sao a “rock-mass” wenno pedaso a bato. Dagitoy a kasuratan ti mangipakita a ni Kristo, saan a ni Pedro, ti Pundasion iti kongregasion. Babaen ti panagkonsulta iti isu met laeng a teksto idiay Reference Bible, masarakanyo dagiti kanayonan pay nga impormasion idiay nota iti baba maipapan iti kababagas ti sao a “rock-mass” wenno pedaso a bato iti orihinal a Griego.
5 Ti maysa a beddeng a napauluan iti “Bible Topics for Discussion” isut’ maysa a benneg a makatulong iti ministerio. No agtrabahokayo iti teritoria a masansan a mawanas, mabalin a kayatyo ti pumili iti nagduduma a topiko manipud idiay nadakamat iti Ti Ministeriotayo iti Pagarian. Idiay baba dagiti subsuheto a kas iti “Earth,” “Kingdom,” ken “Last Days,” masarakanyo dagiti kasuratan a mabalinyo a dakamaten iti panagbalaybalay a presentasion wenno iti Nainkasuratan a diskusion iti panagsarungkar.
KATULONGAN A MANGKABISADO
6 No saanyo a malagip no sadino ti pakasarakan iti maysa a kasuratan bayat nga adda diskusion iti Biblia, mabalin nga agturongkayo idiay “Bible Words Indexed” iti likud ti Bibliayo ket maalayo iti kasapulan a tulong. Us-usarenyo met laeng daytoy a nagpateg a benneg?
7 Ti parupa a sasao iti panid 5 mangted iti makaawis nga ebidensia a ti New World Translation ket naeskolaran a gapuanan. Ti apendise isut’ mangted iti nabatad a salaysay no apay a ti panangusar iti nadibinuan a nagan ket maitutop. Patalgedanna met babaen iti Kasuratan no ania ti kaipapanan iti “Gehenna,” “Hades,” “Sheol,” ken ti “soul” wenno kararua. Mainayon pay, babaen ti panagturong idiay “Table of the Books of the Bible” iti panid 1546-7, masarakantayo no siasino ti nagsurat iti kada libro, no sadino a naisurat, kaano a naisurat, ken iti tiempo a nasaklawna.
8 Pudno unay, impaay ni Jehova no ania daydiay kasapulantayo tapno datayo ti “naan-anay a nakabalan a maipaay iti kada naimbag nga aramid.” (2 Tim. 3:17) Babaen ti panangusar iti New World Translation a kadua dagiti publikasion ti Biblia nga itukontayo, mabalintayo a sieepektibo a maaramid iti trabaho a naituding kadatayo. (Luc. 6:47, 48) Bayat a paneknekan a nalaingtayo a trabahador, nga usaren iti Sao ti Dios iti umiso, sitatalektayo a mangnamnama a kunaen kadatayo ti Apo: “Naimbag a trabaho”!—Mat. 25:21.