Panangirugi iti Panagadal ti Biblia iti Pagtaengan
1 Maysa kadagiti kapnekan a kapadasan dagiti pudno a Kristiano isut’ panangisuro iti maysa a tao ti kinapudno babaen iti panagadal ti Biblia iti pagtaengan. Kaskasdi, adu ti nalabit a saan a mangsagsagrap iti daytoy a benneg ti ministerio gapu ta riknaenda a saanda a makairugi ken makaidaulo iti panagadal ti Biblia. Adu nga agibumbunannag ken payunir ti kasta iti marikanada idi. Nupay kasta, babaen ti talekda ken Jehova ken panangiyaplikarda kadagiti singasing manipud iti Ti Ministeriotayo iti Pagarian, naadalda no kasano a mairugi ken maidaulo dagiti panagadal ti Biblia. Mabalinyo met nga aramiden a kalat dayta.
2 Panangusar iti Diretso a Metodo ken Dagiti Tract: Maysa kadagiti kalakaan a wagas a mangirugi iti panagadal isut’ babaen ti diretso a metodo. Ti laeng kasapulan dagiti tattao isut’ nabara a panangawis iti panagadal ti Biblia. Maaramid daytoy babaen laeng ti panangisaludsod iti bumalay: “Kayatyo kadi ti maaddaan iti personal a panagadal ken parang-ayen ti pannakaammoyo iti Biblia ken panggep ti Dios nga agpaay iti daga?” Wenno mabalinyo nga ibaga iti bumalay a maragsakankayo a mangidemostra iti wagas no kasano a maikondukta iti panagadal ti Biblia iti pagtaengan. Panunotenyo ti rag-oyo a makasarak iti maysa a mangawat iti dayta!
3 Maysa pay a wagas a pangirugi iti panagadal ti Biblia isut’ babaen iti panangusar ti maysa a tract. Kasano a mairugi ti panagadal iti maysa a tract? Babaen laeng iti pannangted ti maysa a tract iti bumalay a patienyo a makapainteres kenkuana. Kalpasanna, awisenyo ti bumalay a makipagbasa kadakayo iti umuna a parapo. Kitaenyo dagiti naisitar a kasuratan, ken pagsaritaan no kasanoda nga agaplikar iti material. Iti umuna a sarungkar, mabalin a mausig laeng ti maysa wenno dua a parapo. Bayat a ti bumalay ket tagipatgenna iti maadalna, mabalinyo a paatiddogen ti oras a mausar iti diskusion.
4 Panangusar ti Biblia Laeng: No dadduma kumanunong ti maysa a tao a pagsaritaan iti Biblia ngem agkedked a mangawat ti pormal a panagadal wenno usaren iti maysa a publikasiontayo. Makairugi ken makaidaulokayo latta ti panagadal iti Biblia babaen ti panagsagana iti makapainteres a Nainkasuratan a diskusion a naibasar idiay benneg ti Agbiag nga Agnanayon wenno Panakirinnason a libro ngem Biblia laeng ti usarenyo no sarungkaranyo daytoy interesado a tao. Dagita a diskusion ti agpaut iti 15 wenno 20 a minutos, wenno at-atiddog, agpannuray ti kasasaad. No maaramid a regular iti naprogreso a metodo ti panangisuro iti kinapudno ti Biblia, nakairugikayon iti panagadal ti Biblia, ket maireport a kasta. No maitutopen ti tiempo, maiyammo daytoy Agbiag nga Agnanayon a libro, ket maikondukta dayta iti pormal a panagadal.
5 Mainayon iti panangsarak ti oportunidad iti tay-ak ti ministerio, inkagumaanyo kadin nga inrugi ti panagadal iti Biblia kadagiti kaaruba, katimpuyog, wenno miembro iti pamilia? Nabayagen aya dayta? Pinadasyo kadi manen iti kallabes? No ti maysa a metodo ket saan nga agkurri, pinadasyo aya iti sabali a pamuspusan?
6 Agballigikayo a mangirugi iti panagadal no iyaplikaryo dagiti singasing a naited, ket agtalekkayo ken Jehova a maipaay ti bendisionna. Sapay koma ta dumegdeg iti rag-oyo babaen ti panangirugi ken panangidaulo kadagiti panagadal ti Biblia iti pagtaengan.