Alagadenyo ti Nadiosan a Debosion a kas ken Kristo
1 Ti balikas iti Biblia a “nadiosan a debosion” ket adda reperensiana iti napasnekan a panagraem ken Jehova a Dios ken ti napalungdo a serbisio kenkuana. Ti kalatakan a nangipasimudaag iti nadiosan a debosion isu ni Apotayo a Jesu-Kristo.
2 Babaen ti kurso iti biagna ditoy rabaw ti daga, impabigbig ni Jesus ti bagina a kas maysa a tao iti perpekto a nadiosan a debosion. Gapuna, naimbag a banag kadatayo no usigentayo iti sumagmamano a bambanag maipapan iti biagna, nangruna dagiti naisinggalut iti papelna kas kangrunaan a pannakangiwat ni Jehova a Dios.
3 Agregta ken Agturedkayo: Naregta ni Jesus a nangiwaragawag iti daydiay dineskribe ti Isaias 61:1 a kas “ti tawen iti naimbag a nakem iti biang ni Jehova.” Kas panangsurot iti ehemplo ni Jesus, masapul a naregtatayo a mangiranud iti makasalbar ti biag a trabaho bayat daytoy maudi nga al-aldaw iti dakes a sistema dagiti bambanag. Masapul met a naturedtayo a kas idi ken Jesus. Apay? Agsipud ta ti damag iti Pagarian nga iwarwaragawagtayo ket makadanar ken saan a kanunongan dagiti dadduma, nangruna no agsaotayo maipapan iti aldaw ti panagibales ni Jehova.
4 Tapno matulongantayo nga agsao a situtured ken mangipannayag iti nadiosan a debosion, kasapulantayo ti espiritu ken panangigiya ni Jehova. Iti Lucas 4:18, nakuna ni Jesus: “Ti espiritu ni Jehova adda kaniak.” Babaen iti espiritu ken bendision ni Jehova, mabalintayo nga alagaden iti nadiosan a debosion ket makaay-ayotayo kenkuana. Ti panangalagad iti maysa a banag kaipapananna ti pannakairuam a mangaramid iti dayta. Kaipapananna a ti maysa a banag ket nagbalinen nga inaldaw a paset iti biag. Ti nadiosan a debosion masapul nga isut’ maysa a wagas iti panagbiag dagiti adipen ti Dios. Nakuna ni apostol Pablo: “Gapuna, mangankayo man wenno uminumkayo wenno aramidenyo ti aniaman a banag, aramidenyo dagiti amin a bambanag a maipaay iti dayaw ti Dios.”—1 Cor. 10:31.
5 Nadiosan a Debosion, ti Wagas iti Panagbiagtayo: Ti Disiembre isut’ maysa a tiempo dagiti kombension ken bakasion. Ngem ditay koma pukawen ti sirmatatayo iti agtultuloy a panangtulad ken Kristo babaen ti pananggundaway kadagiti oportunidad a mangiranud iti naimbag a damag iti dadduma. Bayat nga aramidentayo daytoy, mairekomenda nga aramatentayo daydiay Estoria ti Biblia a libro iti tay-ak ti ministeriotayo agraman ti impormal a panangasabatayo. Adda pagimbaganna no adda latta itugotyo bayat nga agbiahe wenno bumisitakayo kadagiti gagayyem ken kabagianyo.
6 Tumabunotayo amin iti “Managayat ti Wayawaya” a Kombension ti Distrito. Kalpasanna, nasayaat no repasuen dagiti notatayo tapno kitaen no ania dagiti puntos a naadal ken maiyaplikar iti biagtayo kas panangalagad iti nadiosan a debosion. Mabalintayo met nga ilawlawag kadagiti kaaruba wenno miembro ti pamiliatayo dagiti espiritual a taraon a nasagraptayo iti kombension.—Efe. 4:25.
7 Ti wagas iti panagbiagtayo ket saan laeng a maipamatmat babaen ti panangiwaragawag iti aldaw ti panagibales ni Jehova ken iti tawen ti naimbag a nakemna ngem iparangarangna met iti nadiosan a debosion ti personal ken biag iti pamiliatayo. Masapul a tuladentayo ni Jesus, a suruan dagiti dadduma babaen ti ehemplo iti no ania ti nadiosan a debosion. Babaen ti panangsurot iti ehemplo ni Kristo iti nadiosan a debosion, kanayontayo nga ikagumaan a maadda kadatayo iti umiso a motibo kadagiti amin nga aramidentayo, a dayawen ni Jehova ken patalgedan a datayo dagiti nasungdo nga adipenna.