Panagmula ken Panagsibug—Dagiti Addang iti Panagaramid ti Adalan
1 “Nagmulaak, ni Apolos ti nagsibug, ngem ti Dios isut’ namadakkel.” (1 Cor. 3:6) Iti daytoy impabigbig ni apostol Pablo dagiti tallo pamunganayan nga addang iti panagaramid kadagiti adalan ni Kristo. Dagiti umuna a dua nga addang, ti panagmula ken panagsibug, saklawenna iti pribilehio ken responsabilidad dagiti dedikado, bautisado nga ad-adipen ti Dios.
2 Kiddawenna daytoy ti panangasaba iti publiko ken balaybalay, iti impormal, ken dadduma pay a wagas. Ramanenna met ti naprogreso a panangisuro kadagiti tattao a mangalagad kadagiti amin a bambanag nga imbilin ni Jesus. (Mat. 28:19, 20) Daytoy naudi nga addang isut’ maaramid babaen iti panagsarungkar kadagidiay a nangipakita ti interes, a makilinnawagtayo kadakuada iti diskusion ti Biblia, ken idaulo iti panagadal ti Biblia kadakuada. Patpatalgedanyo kadi ti bagbagiyo a kas nasungdo a katrabaho, a makitunos ken Jehova babaen iti panagmula kadagiti bin-i ti kinapudno ken sarungkaran ida a maipaay iti kasapulan a panangsibug ken panangkultibar?—1 Cor. 3:9.
AMMUEN DAGITI PANGNAMNAMAAN KEN KASAPULAN
3 Ditoy Pilipinas bayat iti 1990 a tawen ti serbisio, nakaiwarastayo iti gistay 900,000 a libro ken polieto ken dandani 4.7 a milion a magasina! Naaddaantayo met iti nasurok a 317,000 a tattao iti Memorial, nga adayo a nalabsanna iti 100,571 a promedio ti agibumbunannag iti dayta a tawen. Ti panagiwaras iti literatura isut’ maysa a nasken a paset ti panagmula nga aspekto iti trabahotayo. Dagiti bukel ti kinapudno a maimula isudat’ nagpaiduma a pangnamnamaan kadagiti mapataud a baro a disipulo, ngem datayo aya, kas katrabaho ti Dios, ket mariknatayo a kasapulan iti panagsarungkar kadagitoy a tattao ken kultibaren ti interesda kadagiti topiko iti Biblia? Dagiti agibumbunannag ditoy Pilipinas ti nakapromedio ita iti 0.3 a panagadal ti Biblia. Agtalektayo a daytoy a promedio ti mabalin a maparang-ay no kada agibumbunannag ket tingitingenna a mas umiso iti personal a responsabilidad a labsanna pay daydiay umuna nga addang a basta panagmula laeng iti bin-i ti kinapudno ket ikagumaanna iti mangikondukta kadagiti naprogreso a panagadal ti Biblia iti pagtaengan. Nupay dadduma, gapu iti nagduduma a limitasion, ket saanda a makaidaulo iti maysa wenno nasursurok pay a panagadal ti Biblia iti pagtaengan, nasayaat no tunggal maysa ket repasuenna iti personal a kasasaadna.
4 Makapainteres a makita no ania ti mapaspasamak iti dadduma a luglugar. Addaan dagiti dadduma a kongregasion iti nabunga a teritoria ket nakaireportda iti promedio a maysa agingga iti dua a panagadal ti Biblia iti kada agibumbunannag. Ti iyaadu dagiti baro a disipulo isut’ mairukod iti bilang dagiti panagadal ti Biblia a maikonkondukta. Makita daytoy babaen ti panamagdilig iti promedio ti agibumbunannag iti bilang dagiti panagadal ti Biblia kadagiti nagduduma a pagilian kas naireport iti 1991 Yearbook.
5 Ti mangtignay kadatayo a mangidaulo iti panagadal ti Biblia isu koma daydiay panagayattayo kadagiti tattao a nangipangag iti damag ti Pagarian a naikasabatayo. Sipupudnotayo koma a mangiraman iti naayat a pannakaseknan ni Jehova kadagiti tattao ken patgen a ti pannakaisalakanda ket naikalammiat iti espiritual a panagrang-ayda. (1 Ped. 2:2) Kas kadagiti literal a mula nga agkasapulan iti danum tapno mataraken iti panagdakkelda, dagiti tattao a nangipakita iti damo nga interes iti mensahe ti Pagarian ket saanda a madadagus a tumabuno kadagiti gimong malaksid no maidaulo iti panagadal ti Biblia kadakuada a regular ken maiturongda iti organisasion ti Dios.
6 Ti panagtulnogtayo ket sumrek met iti daytoy a ladawan. Nakuna ni Jesus a dagidiay adda iti dasig ti kinapudno ket dumngegda iti timekna. (Juan 18:37) Binilinna dagiti disipulona a mangasaba ken mangisuro, ket kinabalanna ida a mangitungpal iti dayta a trabaho. Babaen ti nagpaiduma nga ehemplona kas maestro ken babaen iti napasnek a panangidanagna kadagiti tattao, impakita ni Jesus iti padron a surotentayo a tumulong iti sabsabali. (Luc. 6:40; Juan 13:13; 14:12) Ti pingettayo isut’ mangiturong iti pannakaisalakantayo ken dagidiay a suruantayo.—1 Tim. 4:16.
KATULONGAN A MANGIRUGI ITI PANAGADAL TI BIBLIA
7 Tapno maperpekto iti trabahona, ti maysa a nalaing managputar ket pilienna dagiti nagduduma a remienta nga aramatenna. Kas maestro, addaantayo kadagiti sangagabsuon a publikasion, agraman broshur ken tract, a nadisenioda a kas remienta a tumulong kadatayo a mangdanon iti puso dagiti tattao a nagduduma ti nalikudan ken panagmatmatda.
8 Dadduma kadagiti agibumbunannag ti nakapadas iti naimbag a resulta ti panangusarda iti tract ken broshur a mangirugi iti diskusion ti Biblia. Kas ehemplo, iti tract a Biag iti Maysa a Natalna a Baro a Lubong isitar ken kotarenna iti nasurok a 20 a nagduduma a teksto a nangibalabala iti daytoy a nakaskasdaaw a namnama. Dagitoy a kasuratan ti mabalin a mausar a pangpataud kadagiti nawadwad a makagutugot a diskusion iti Biblia. Dagiti broshurtayo, iti makapataliaw ti mata ken simple a wagas, maiyammoda met kadagiti tattao dagiti pamunganayan a kinapudno ti Biblia ken riingenna ida nga agtultuloy a mangsukimat iti dayta.
9 Adda aya ammoyo a limitado laeng ti edukasionda wenno nakapoy iti panagkitada? Pinadasyo kadin nga inusar daydiay broshur a Tagiragsakenyo ti Biag nga Agnanayon Ditoy Daga! a mangipasdek iti progresibo a diskusion ti Biblia iti maysa a tao? Ti “Adtoy!” a broshur isut’ maysa a sabali a kagawaan nga addaan kadagiti panglukat a parapo a sisasaririt a mangiraman iti bumalay a mangadal maipapan iti karkari ti Dios iti masanguanan. Ket sigurado a ti libro a Mabalinyo ti Agbiag nga Agnanayon iti Paraiso a Daga, a nairuar idi 1982, ket epektibo unay a timmulong iti dakkel a porsiento dagiti nasurok a 1,700,000 a nabautisaran manipud pay idi.
PANAGTIGNAY A RESPONSABLE KADAGITI INTERESADO
10 Masarakanyo a makagunggona no kitaenyo dagiti bukodyo a Congregation’s Publisher Record card ket imutektekan iti bilang dagiti libro, polieto (agraman broshur), ken magasina a naipaimayo bayat iti 12 a napalabas a bulan. Nagngudo latta kadin iti basta pannakaipaima dagitoy? Wenno linabsanyo pay iti labes ti addang a panagmula? Kadagidiay a nangipakita iti umdas nga interes a nangala kadagiti literaturatayo, mano kadakuada ti nadagdagus a nakasaoyo manen? Nagsublikayo aya a kumita no ti bin-i a naimula ket nagrusingdan? Sinarunoyo kadi ida a maipaay iti panggep a panagsibug ken inkararagyo ken Jehova a padakkelenna?—Maidilig iti Aramid 16:14 ken 2 Tesalonica 3:1.
11 Amangan no saankayo pay laeng nga agsarsarungkar ken mangidadaulo iti panagadal ti Biblia agsipud ta mariknayo a marigatankayo iti dayta. Nalabit, maigapu dayta iti kapanunotan a nalablabes ngem iti kinaawan ti abilidadyo. Saan nga imbaon ni Jehova dagiti tattaona a mangaramid iti trabaho nga awan ti makaanay a kabal ken pannakabael kadakuada. Babaen iti nasantuan a Sao ken organisasionna, insagananatayo a maipaay iti “kada naimbag a trabaho.” (2 Tim. 3:16, 17; 2 Cor. 3:5, 6) Babaen iti nasantuan nga espiritu, naimaldit a panid, ken naisawang nga instruksion ken demostrasion iti plataporma, saanen a dakamaten dagiti nabiag nga ehemplo dagiti nalaing ken debotado nga ad-adipen a nakasagana a tumulong kadatayo, nangted kadatayo no ania iti kasapulantayo. Saantayo a kasapulan iti nangato nga edukasion daytoy lubong tapno makaidaulotayo iti panagadal ti Biblia. Kasapulan nga ipangagtayo iti superior a naespirituan nga edukasion nga ipapaay iti organisasion ni Jehova.—Maidilig iti Aramid 4:13.
12 Ti personal nga aplikasion no ania ti ipapaay iti Ti Ministeriotayo iti Pagarian, ti Teokratiko a Pagadalan iti Ministerio, Gimong ti Serbisio, ken dadduma pay a dalan iti instruksion isudat’ nasken. Sibabatad ti panagkuna ni apostol Pablo kadagiti Hebreo a Kristiano: “Ta kinapudnona, idinto ta rebbengna koman a dakayo ti mannursuro gapu iti kabayagyon, kasapulanyo manen ti sabali a mangisuro kadakayo manipud kadagiti elementaria a bambanag iti sagrado a sasao ti Dios.” (Heb. 5:12) Ti maysa a tao nga agtartrabaho iti maysa a panggedan iti adun a tawtawen manamnama kenkuana a nakagun-oden iti rukod ti kinalaing a mangusar kadagiti remientana. Ti naprogreso a panangadal no kasano a mapalaing dagiti diskusion ti Biblia isut’ nabatad no maiparangarang iti napudno nga interes ken panagregta.—Prov. 12:24; 22:29.
13 Ti sarungkar ken mainayon a diskusion kadagiti topiko iti Biblia kadagidiay a mangipakita ti interes iti mensahe ti Pagarian ket kaipapananna iti gasto no maipapan iti tiempo ken pinget. Ngem masapul a patgentayo a ti kaaddatayo iti kinapudno isut’ maysa nga ebkas ti ayat ken di magatadan nga asi ni Jehova. Isu daytoy ti maiyebkas babaen iti maysa a mangusar iti nawadwad nga oras a siaanus a mangisuro kadatayo iti kinapudno. Kasta met, ti ayat isut’ mangdagdag kadatayo a manggatang iti kasapulan a tiempo ken mangideboto iti dayta a maipaay iti daytoy mas importante a trabaho a panagaramid iti disipulo.—2 Cor. 5:14, 15; Efe. 5:15, 16.
14 Adu a kongregasion ti nangsurot iti singasing ti Sosiedad a maaramid iti urnos ti panangasaba iti rabii. Ti nasapa nga oras iti rumabii ti masansan a nasayaat a tiempo iti panagsarungkar kadagidiay a nangipamatmat iti interes. Ti maysa a house-to-house record, a mangipaay iti rumbeng nga impormasion maipapan iti tunggal tao a makasabaan, isut’ nasken a maipaay iti epektibo a sarungkar ken pangirugian iti diskusion ti Biblia. Dikay koma iwagat dagita a rekord iti maysa a libro wenno Biblia ken lipaten ida. Ti saan a pananglagip a sarungkaran iti maysa a tao agingga ti adun a lawas a napalabas idinto ta addakayo laeng iti sangakaarubaan isut’ mamaggundaway kadagiti ahente ni Satanas a mangraut iti daytoy a tao, isuda a maragsakan a mangrabsut kadagiti naimula iti pusona. (Luc. 8:12) Kayatyo kadi nga sumraen dagiti taktika ni Satanas babaen iti nasapa a sarungkaryo? No marikna iti reponsabilidad ken patgen iti pribilehioyo, madagdagus nga agsarungkarkayo, agingga iti mabalin.—1 Cor. 9:16, 23.
NO KASANO A MAIRUGI ITI PANAGADAL TI BIBLIA
15 Ti panangirugi iti panagadal ti Biblia ket saanna a saklawen iti narigat, narikut a wagas. Dadduma kadagiti tattao ti sidadaan a mangawat iti direkta a maitukon a panagadal ti Biblia kadakuada iti pagtaengan. Nupay kasta, adu dagiti agibumbunannag a kaykayatda a saanda pay laeng a dakamaten iti panagadal ngem iturongda ida iti diskusion ti Biblia agingga iti ngudo.
16 Ti ayat kadagiti tattao ken ti napudno a tarigagay a tumulong kadakuada isut’ kasapulan. Nasken met iti nasayaat a panagsagana. Ramanenna daytoy ti panangrepaso iti nota kadagidiay nalpasen a napagsaritaan ken desideren no kasano a maisinggalut iti kanayonan a diskusion ti Biblia. Maadda koma iti panunot ti gagangay a pagturongan iti komentoyo. Pilienyo kadi dagiti sumagmamano a mainayon a teksto iti suheto a nalawlawagan iti napalabas? Wenno luktanyo aya a dagus iti tract wenno libro nga addan iti daydiay tao ken usigen dagiti sumagmamano a panglukat a parapo kenkuana? Nalabit a pilienyo ti maysa a suheto a naiyebkasna a paginteresan. Iti damo, alaenyo laeng iti 10 wenno 15 a minutos. Ti kapaut iti tiempo isut’ agin-inut a mapaatiddog, agpannuray iti ipasimudaagna nga interes. Ti umiso a panangpaliiw isut’ tumulong kadakayo a mangtinong no kasanokayo nga agtultuloy ken agpaut.
17 Nawadwad a makatulong a singasing iti nalpasen a naited kadagiti naglabas a tawtawen a tumulong kadakayo a mangala iti naprogreso nga addang iti panagaramid ti adalan. Kas paset iti maysa a serye, ti Nobiembre ken Disiembre 1990 a ruar iti Ti Ministeriotayo iti Pagarian isudat’ naglaon kadagiti makatulong nga artikulo a napauluan iti “Danonen dagiti Puso Babaen kadagiti Epektibo a Panangyadal ti Biblia” ken “Panangiturong kadagiti Estudiante ti Biblia iti Organisasion ni Jehova.” Daydiay Ti Ministeriotayo iti Pagarian iti Abril 1987 isut’ naglaon iti artikulo nga “Panagsagana ken Panangikondukta iti Panagadal ti Biblia iti Pagtaengan.” Ti napartak a panangsitar iti Index idiay baba iti “Bible Studies” isut’ mangiturong kadakayo iti kanayonan a makatulong nga impormasion.
18 Kas modelo no kasano a maikondukta iti panagadal, imutektekanyo no ania ti maar-aramid iti Panagadal ti Libro iti Kongregasion. Siempre, iti maysa a panagadal ti Biblia iti pagtaengan, awanankayo iti siguden a naiyurnos a kaatiddog ti material a mawanas. Gapuna nga idanggayyo ti mawanas a material iti kapasidad ken kasapulan ti estudiante. Mainayon pay, ti manangaywan iti serbisio ken dadduma a nasanayen nga agibumbunannag ken payunir ti nasursurok pay ngem iti ayatda ti makikadua kadakayo tapno maitukonda iti praktikal a singasing a mangidaulo iti epektibo a panagadal ti Biblia.
19 Idinto ta mailasintayo a biang ni Jehova iti panulbek a papel iti reggettayo a tumulong kadagiti tattao, masapul nga ikararagtayo saan laeng a maipapan iti pannakasaraktayo iti maadalan ngem kasta met iti panagprogreso dagidiay interesado a tattao a masarakantayo. Ti koma kababalin ken riknatayo isut’ umasping iti daydiay adda ken apostol Pablo idi a kinasabaanna ni Ari Agripa: “Tarigagayak iti Dios iti ababa wenno napaut a tiempo nga saan laeng a sika ngem amin a dumdumngeg ita nga aldaw ket agbalinda koma a tattao a kas kaniak.” (Ara. 26:29) Kayat ni Pablo a dagiti managimdengna ket agbalinda koma a disipulo ni Kristo, agpapan pay kasapulanna iti ababa wenno napapaut pay a periodo a maipaay iti personal a tulong.
20 Ti panangidaulo iti panagadal ti Biblia isut’ mangbadang kadatayo a “mangaramid iti naan-anay a pammaneknek iti naimbag a damag ti di magatadan nga asi iti Dios.” (Ara. 20:24) Di maibaga a bilang iti mabalin pay a maibaw-ing manipud ti sipnget nga agturong iti lawag ken manipud iti autoridad ni Satanas a maiturong iti Dios. (Ara. 26:18) Dakayo, ti kada dedikado, bautisado nga adipen ni Jehova, ti masapul a mangaramid iti pasetna nga agmula iti bin-i ti kinapudno ken sarunuen iti kasapulan a panagsibug babaen iti diskusion ti Biblia ken regular a panagadal iti Biblia. Iti kasta masagrapyonto ti aglaplapusanan a rag-o iti pannakaimatang kadagiti tattao nga agbalin a disipulo ken makitimpuyog a tumulong kadagiti kaskasdi a sabsabali pay a tattao nga agbalin met nga adalan ni Jesu-Kristo.