Mannursurotayo Koma, Saan Laeng a Manangaskasaba

¹ Naikuna a “dagiti Saksi ni Jehova literal a sinaknapanda ti daga iti panangaskasabada.” Kasano a nagbalin a posible daytoy? Saan a gapu iti bileg wenno pannakabalin ti tao, no di ket babaen iti panagandar ti espiritu ti Dios kadagiti adipenna bayat nga aramatenda dagiti nadumaduma a probision a mangitungpal iti annongenda a mangasaba ken mangisuro.—Zac. 4:6; Ara. 1:8.

² Dagiti pagbasaan ket epektibo nga instrumento a pangitungpal iti trabahotayo a panangasaba. Kadagiti napalabas a tawen binilbilion a libro, bokleta, broshur, magasin, ken tract ti inyimprenta ken inwaras dagiti Saksi ni Jehova a tumulong iti pannakaiwaragawag ti naimbag a damag ti Pagarian. Dagiti report iti 1997 Yearbook ipakitana a nakaskasdaaw ti kaadu ti mayim-imprenta a literatura. Agingga ita, nasurok a 91 milion (91,000,000) a kopia ti New World Translation ti nayimprentan. Iti makatawen immadu iti 7.1 porsiento ti bilang dagiti magasin a Pagwanawanan ken Agriingkayo! a mayim-imprenta idiay Estados Unidos. Idiay Alemania, ngimmato iti 35 porsiento ti kaadu ti mayim-imprenta a magasin. Mausar idiay Russia ti nasurok a kakatlo kadagiti magasin a mayim-imprenta idiay Alemania.

³ Apay a kasapulan ti adu unay a literatura? Iti sangalubongan, nakaad-adu dagiti nangipangag iti pammaregta a mangasabatayo iti sadinoman nga ayan dagiti tattao. Yantangay umad-adu kadatayo ti mangaskasaba itan kadagiti publiko a lugar, lansangan, ken iti teritoria a pagnegosiuan, umad-adu ti literatura a maipapaima kadagiti tattao nga aginteres. Adu kadagitoy ti paspasaray wenno awan pay ketdi ti gundawayda idi a dumngeg iti mensahe ti Pagarian. Tapno masulnitan daytoy a panagkasapulan, adda koma abasto dagiti kongregasion a nadumaduma a publikasion a mausar iti amin a benneg ti ministerio.

⁴ Ania ti Kalattayo iti Panagipaima Kadagiti Literatura? Saan a basta agipaima kadagiti literatura ti kalattayo. Ti annongen a panagaramid kadagiti adalan ramanenna ti dua a banag—panangasaba ken panangisuro. Umuna, pribilehiotayo nga ikasaba ti naimbag a damag ti Pagarian, nga ipakaammotayo kadagiti tattao a dayta ti kakaisuna a namnama ti sangatauan. (Mat. 10:7; 24:14) Nabayagen a napaneknekan ti kinaepektibo dagiti naibatay iti Biblia a literaturatayo ken epektibo dagita a pangtukay iti interes ken pangiranud iti pannakaammo maipapan iti Pagarian kadagiti sabsabali.

⁵ Maikadua, tapno makaaramidtayo kadagiti adalan, masapul nga isurotayo amin a bambanag nga imbilin ni Jesus. (Mat. 11:1; 28:19, 20) Manen, napateg dagiti literatura iti panangyallatiwtayo iti kinapudno iti puso dagiti estudiante, a tumulong kadakuada nga agbalin nga adalan.

⁶ Dagidiay umawat iti literatura mabalin a ‘managdengngegda iti sao,’ ngem nalabit saanda nga agbalin a managtungpal iti sao no awan ti tumulong kadakuada. (Sant. 1:22-25) Manmano ti agbalin nga adalan no awan mangigiya kadakuada. (Ara. 8:30, 31) Kasapulanda ti mannursuro a tumulong kadakuada tapno mapaneknekanda a mismo ti kinapudno a masarakan iti Kasuratan. (Ara. 17:2, 3) Ti kalattayo ket tulongantayo ida a rumang-ay agingga nga agdedikar ken agpabautisarda, ken sanayentayo ida nga agbalin a naan-anay a kualipikado a mangisuro kadagiti sabsabali.—2 Tim. 2:2.

⁷ Kasapulan Unay ti Ad-adu a Mannursuro: No mangasabatayo, iwaragawagtay ti naimbag a damag iti publiko. Nupay kasta, ti panangisuro ramanenna ti progresibo a panangsanay iti maysa a tao. Nupay ti panangasaba ipaayanna dagiti sabsabali iti gundaway a makaammo iti mensahe ti Pagarian, ti panangisuro tulonganna dagiti indibidual a mangawat iti naimbag a damag ket agtignayda a maitunos iti dayta. (Luc. 8:15) Ti trabaho ti mannursuro ket saan laeng nga agipadamag; agilawlawag, makirinnason a buyogen iti nasayaat nga argumento, mangidatag kadagiti pammaneknek, ken mangallukoy.

⁸ Aginggat’ mabalin ikagumaantayo ti agbalin a mannursuro, saan la a manangaskasaba. (Heb. 5:12a) Ti panagiwaras kadagiti literatura ket napateg a paset ti trabahotayo, ngem ti panangitungpal iti maikadua a panggep ti ministeriotayo nangnangruna nga agpannuray iti aramidentayo kas mannursuro. Nupay maragsakantayo no makaipaimatayo kadagiti literatura, tapno maitungpaltay a naan-anay ti ministeriotayo, ditay koma panunoten a ti ultimo a kalattayo ket agipaima. (2 Tim. 4:5) Dagiti naipaima ket epektibo nga alikamen a panglukat iti gundaway a mangisuro iti kinapudno kadagiti sabsabali.

⁹ Agsarungkar Tapno Makairugi Kadagiti Panangyadal iti Biblia: Nalabit nakaipaimatayo aminen iti adu a libro, broshur, ken magasin, nga adun ti nailistatayo a masarungkaran. Iyeskediultay koma ti regular a panagsublitayo a manggutugot iti interes. Ti kangrunaan a panggeptayo iti panagsubli ket saan laeng a tapno agipaima iti ad-adu pay a literatura no di ket mangparegta kadagiti tattao tapno basaenda ken magunggonaanda kadagiti addan kadakuada. Kasano koma ngata ti kinarang-ay ti espiritualidadtayo no awan nagsublisubli a timmulong kadatayo a gumun-od iti umiso a pannakaammo?—Juan 17:3.

¹⁰ Surnadanyo amin nga aginteres a sipapanunotkayo a mangirugi iti panagadal iti Biblia iti broshur nga Ania ti Kalikaguman ti Dios Kadatayo? wenno iti libro a Pannakaammo a Mangiturong iti Biag nga Agnanayon. Dagitoy dua a publikasion idatagda ti mensahe ti Pagarian iti wagas a nalaka a matarusan. Ti broshur a Kalikaguman naglaon iti nalawa a kurso iti panagadal, a mangsaklaw kadagiti pamunganayan a pannursuro iti Biblia. Ti libro a Pannakaammo tulonganna ti maysa a tao tapno maisurona ti kinapudno iti ad-adu pay a detalye, ngem simple, nabatad, ken ab-ababa.

¹¹ Ti napasimple a programa iti panangisuro, kas nailawlawag iti suplemento ti Hunio 1996 a Ministeriotayo iti Pagarian, palakaenna ti panangisuro ti mannursuro ken ti panagadal ti estudiante. Madadaan koma kadakayo ti kopia dayta a suplemento tapno marepasoyo dagiti metodo ken pamay-an iti panangisuro a napaneknekan nga epektibo. Dadduma kadagiti singasingna ramanenna no kasano nga ipakita ti napaypayso a personal nga interes iti estudiante, no kasanot’ kaadu ti material a saklawen iti maminsan a panagadal, no kasano a tamingen dagiti saludsod a saan a nainaig iti tema, no kasano nga isagana a nasaksakbay ti mannursuro ken ti estudiante ti adalenda, ken no kasano nga iturong ti estudiante iti organisasion ni Jehova. Babaen ti panangsurot kadagiti singasing, ad-adunto pay kadatayo, a pakairamanan dagiti kabbaro, ti makaidaulo iti narang-ay a panagadal.

¹² Dagiti Report Maipapan Kadagiti Nasayaat a Resulta iti Tay-ak: Ti broshur a Kalikaguman ken ti libro a Pannakaammo ket napaneknekan a nagpateg a tulong iti pannakapapartak ti panagaramid kadagiti adalan. Apaman a naawatna ti broshur a Kalikaguman, dagus nga inusar dayta ti maysa a kabsat idiay Bolivia a pangirugi iti panangyadalna iti maysa a lalaki. Kalpasan ti uppat a bulan iti kombension distrito, karaman daytoy nga estudiante kadagiti nararagsak a kandidato iti bautismo!

¹³ Adu ti matigtignay a mangidedikar iti biagda ken Jehova kalpasan a mairingpasda nga adalen ti libro a Pannakaammo. Iti maysa a kongregasion idiay Angola, uppat a bulan laeng kalpasan a nairugi a maaramat ti libro a Pannakaammo iti dayta a lugar, immadu ti iyad-adalan iti Biblia dagiti agibumbunannag manipud 190 a nagbalin a 260 ken nagdoble ti kaadu ti tumabtabuno iti gimong manipud 180 a nagbalin a 360. Di nagbayag, kasapulanen a mangbukel iti sabali pay a kongregasion.

¹⁴ Kalpasan ti damo a panangyadalna iti libro a Pannakaammo, kinuna ti maysa a kabsat a ti panangyadal iti dayta ket “simple no basta agsaludsod laengen ti konduktor, basaenna ti sumagmamano a tumutop a kasuratan, ken siguraduenna a matarusan ti estudiante.” Nupay kanayon nga impapanna a dagiti laeng kualipikado unay nga agibumbunannag ti makaidaulo kadagiti narang-ay a panagadal iti Biblia ket dina pulos kabaelan dayta, nautobna a kabaelanna, a kunkunana: “No kabaelak, kabaelan dayta ti asinoman.”

¹⁵ Maitungpaltayo ti kalat a panagaramid kadagiti adalan babaen ti panangidaulo kadagiti panangyadal iti Biblia kas paset ti ministeriotayo. Dagidiay naaddaan iti abilidad a makiraman iti daytoy nga aspeto ti ministerio makitada a pudno a makapnek ken makagunggona unay dayta. Sapay koma ta maikuna met maipapan kadatayo nga ‘ikaskasabatayo ti pagarian ti Dios . . . ken isursurotayo dagiti bambanag maipapan ken Apo Jesu-Kristo buyogen ti naindaklan unay a wayawaya ti panagsao.’—Ara. 28:31.