Panagaramid a Sipipinget iti Pagayatan ti Dios
1 Ti addaan panggep a napinget a panagtrabaho a mamataud iti matarigagayan a resulta isut’ kapkapnekan. (Ecl. 3:13) Ania a trabaho ti maar-aramid kadagitoy nga aldaw iti mangyeg ti kadakkelan a ragsak itan ken iti masakbayan? Adda laeng maymaysa a sungbat—ti panagaramid iti pagayatan ti Dios. Ti rason iti daytoy isut’ naan-anay a malawagan babaen kadagiti palawag, demostrasion, ken kapadasan bayat iti programa ti espesial nga aldaw iti asamblea nga agpaay ti 1992 a tawen iti serbisio. Ti tema iti programa isut’ “Panagaramid a Sipipinget iti Pagayatan ti Dios.”—Efe. 6:6; 1 Tim. 4:10.
2 Adu kadagitoy nga aldaw ti saan a mapnek gapu iti panagaramidda kadagiti trabaho a saanda a pagragsakan. Maisupadi, ti panagaramid iti pagayatan ni Jehova kas panangtulad ken Kristo isut’ mangpunno iti biagtayo ti adda kaeskanna ken tumulong pay kadatayo nga mangitungpal iti sekular nga ar-aramidtayo a buyogen ti positibo a panangmatmat. Ania iti ramanenna ti napinget a panagaramid iti pagayatan ti Dios? No maipapan iti panangasaba ken panangisuro a trabaho, kasano ti kapategna iti panangsurot ti direksion ken singasing nga inted iti organisasion ni Jehova? Ania a nagpaiduma nga oportunidad ti adda nga agpaay kadagiti agtutubo a mangisentro iti panagaramid ti pagayatan iti Dios?
3 Dagitoy a saludsod ti masungbatan babaen iti programa, a ramanenna dagiti dua a kangrunaan a palawag nga “Ti Aya Pagayatan iti Dios ti Mangiturturay iti Biagyo?” ken “Ti Panggeptayo iti Biag—Panagaramid iti Pagayatan ti Dios.” Agplanokayo itan a maadda sadiay ket sagrapenyo a naan-anay iti espesial a programa.