Panangitungpal iti Rebbengen nga Agaramid ti Naimbag iti Sabsabali
1 Imbalakad ni apostol Pablo kadagiti immuna a siglo a Kristiano: “Dikay lipatan ti panagaramid iti naimbag ken ti panangiranod kadagiti bambanag iti sabsabali.” (Heb. 13:16) Ti reggetda a tumulong iti kakabsatda uray pay iti sidong ti napeggad a kasasaad isut’ mangnayon iti ayatda ti Dios ken iti maysa ken maysa. (Juan 13:35) Maparegtatayo met nga agaramid ti naimbag ken mangiburay kadagiti dadduma.
2 Iti daytoy a banag, nangipaay ni Jehova iti parabor kadatayo tapno mataraonan ken makabalantayo iti espiritual. Anian a nagbaknang nga impormasion ti adda kadatayo manipud iti Pagwanawanan ken Agriingkayo! Anian a rag-o ti masarakan no basaen iti kada ruar apaman a maawattayo! Ti panangutob kadagiti Nainkasuratan nga impormasion, mabalintayo nga inotar dagiti puntos a mausar iti tay-ak ti ministerio ken kasta met iti pannakisaotayo kadagiti sabsabali. Umasping pay, mabalintayo a gundawayan iti tiempo nga agsagana a maipaay iti kada gimong ken nangruna iti linawas a panangusig iti Ti Pagwanawanan. Ti personal a panagadal iti Sao ti Dios isut’ tumulong kadatayo a mangpatanor “iti panunot ni Kristo” ken mangbadang kadatayo a mangimula no ania iti pagimbagan dagiti masabettayo.—1 Cor. 2:14-16; Sal. 19:14.
3 Rebbengen a Maikari nga Awaten: Amin dagiti agayat ken Jehova masapul nga idedikarda ti bagida kenkuana. Babaen ti panangawat iti responsabilidad a naisinggalut iti dedikasion, maidemostra nga agpaaytayo laeng ken Jehova ken insinatayo iti bagbagitayo iti lubong ni Satanas ken dagiti makaranggas a daldalanna. Babaen ti panangsurot iti modelo nga imbati ni Kristo Jesus, makaitedtayo iti naimbag nga ehemplo kadagiti dadduma. (1 Ped. 2:21) Dagiti programa iti asamblea ti sirkito a kas daydiay naiwayat nga agpaay iti 1992, agraman ti tema a “Panangibaklay iti Bukodtayo nga Awit a Responsabilidad,” paregtaennatayo nga agbiag a maitunos iti dedikasiontayo.
4 Ti regular nga itatabuno kadagiti gimong ti kongregasion isut’ mamalubos kadatayo a mangiranod iti pampanunot kadagiti sabsabali. Babaen ti personal a panagadal ken panagsagana nga agpaay kadagiti gimong isut’ mangted kadatayo iti nawadwad nga impormasion a maiburaytayo. Ti makita a personal nga interes iti dadduma isut’ mangparnuay iti nabara, nagayyeman ken napamiliaan nga espiritu. Babaen ti pannakiraman kadagiti gimong, kumanunongtayo iti sasao ni Pablo a nailanad iti Hebreo 10:24, 25 ken awatentayo iti rebbengen a mamaregta iti dadduma.
5 Ragpaten Dagiti Kanayonan a Rebbengen: Bayat iti 1992 a tawen ti serbisio, mabalintayo kadi a ragpaten dagiti kanayonan a rebbengen, kas iti auxiliary ken regular payunir a serbisio? Imbes a ti laeng kalat iti oras ti nangruna a maigunamgunam, apay a saan a maiturong ti asikaso iti maparang-ay a gundaway a makiraman iti trabaho a panangurnong? (Juan 4:35, 36) Ti regular a pannakikuyog iti sabali a kualipikado nga agibumbunannag ken payunir isut’ tumulong kadatayo a mangparang-ay iti laing a maipaay iti ministerio. Ti napaadu a bilang dagiti auxiliary payunir isut’ agserbi a kas nasalun-at a pammaregta iti kongregasion. No mabalin, apay a dikay agaplikar a kas regular payunir wenno auxiliary payunir iti regular a wagas bayat daytoy a tawen?
6 Dagiti responsabilidad ti nairanta nga agpaay kadagiti kualipikado a dedikado ken bautisado a lallaki a miembro ti kongregasion. (1 Tim. 3:1-10, 12, 13) Maidemostra dagiti amin ti kinatulokda nga agserbi babaen dagiti nasakbay a pinanunot a komentoda kadagiti gimong, pannakipaset iti Teokratiko a Pagadalan iti Ministerio, ken panangawat kadagiti paset a mangiparang ti demostrasion wenno mangtaripato iti dadduma a parte iti Gimong ti Serbisio. Uray dagiti ubbing mabalin a mapagulidananda kadagitoy a bambanag agraman ti konduktada iti Kingdom Hall. Makatulongda a makipagtrabaho iti grupo ti panagadal iti libro no madutokanda nga agdalus ti Kingdom Hall wenno mangasikaso iti dadduma pay a kasapulan.
7 Inyebkas ni Jesus ti kinatulokna a mangawat iti responsabilidad nga agaramid ti naimbag iti sabsabali babaen ti maysa a sao: “Kayatko.” (Luc. 5:12, 13) Babaen ti panangsurot iti ehemplona, maparegta ken matulongan met dagiti kakabsattayo, interesado a tattao, ken dagiti sinsero a tattao a masabet iti tay-ak ti serbisio a makitimpuyogdan a regular iti organisasion ni Jehova. Ti panangawat iti pagrebbengan nga “agtrabaho no ania iti pagimbagan dagiti amin” kasapulanna ti determinado a pinget ken nalabit a panagsakripisio iti biangtayo. (Gal. 6:10) Ngem no makita ti naimbag a gapuanan, umannugottayo ken Pablo, isu a nagkuna: “Dagiti kasta a sakripisio ti makaay-ayo iti Dios.”—Heb. 13:16.