Silalaing a Panangaramat iti Sao ti Kinapudno
1 Ti laingtayo a mangusar iti Sao ti Dios apektaranna iti wagas ti panangipangag dagiti tattao iti mensahetayo. Gapuna, nakuna ni Pablo: “Aramidem ti amin a kabaelam a mangiparang iti bagim a naanamongan ti Dios, a kas mangmangged nga awan iti ibainna, nga aramatem ti sao iti umiso.”—2 Tim. 2:15.
2 Ti laing a mangusar iti Biblia isut’ masapul a mapatanor. Nasken ti personal a panagadal ken tumabuno iti gimong. Nupay kasta, masapul nga aramaten dagiti naadaltayo babaen ti regular a panangusar iti Biblia idiay ministerio. Kasapulan met a biruken iti tulong ken panangidalan ti Dios.—1 Juan 3:22.
3 Ipamaysa iti Sao ti Dios: Nasken iti biang dagiti tattao a mabigbigda a ti damag nga iyegtayo ket saantayo a kukua ngem naggapu iti naisurat a Sao ti Dios. (Juan 7:18) Ti panangipakita iti maysa a tao no ania ti kuna iti Dios idiay Biblia ket dakkel ti puersana. Maallukoy dagiti nalinteg ti pusoda a tattao iti nabileg a mensahe ti Biblia.
4 Saan a kabisado dagiti kaaduan a tattao iti Biblia. No usarentayo, masapul a saan a basta basaen laeng dagiti teksto. Masapul a panunoten no kasano a maiyammo iti maysa a kasuratan. Mabalin a dakamaten dagiti saludsod wenno maysa a problema a pangriing iti interes. Kalpasan met a mabasa ti kasuratan, masapul a maipaganetget dagiti panulbek a sasao ken maiyaplikar tapno maipasagepsep dagiti ideya.—Kitaen ti Giya ti Eskuelaan, dagiti adalen 24 ken 25.
5 Ti Tukon: Bayat iti Disiembre itukontayo kadagiti interesado a tattao ti New World Translation of the Holy Scriptures agraman iti Ti Biblia—Saot’ Dios wenno iti Tao? Kasanotayo nga asitgan dagiti tattao babaen dagitoy a tukon? Kalpasan a naiyammo ti bagbagitayo mabalin a kunaen: “Kadagitoy nga aldaw, adu ti kumita iti nagduduma a tattao wenno publikasion a mangidalan kadakuada. Ania ti mariknayo a kasayaatan a taudan iti praktikal a pannakaidalan? [Palubosan a sumungbat.] Usigentayo ti makuna iti Biblia maipapan ti pudno a gubbuayan iti kinasirib. [Basaen ti Proverbio 2:6, 7.] Ti natauan a sirib ket napatalgedan iti naladingit a panagkurangna. Ti sirib iti Dios, nupay kasta, isut’ kanayon a mapaneknekan a mapagpiaran ken makagunggona. [Basaen ti Isaias 48:17, 18.] Gapuna, masapul a kumitatayo iti Dios, isu a mangipaay ti giya a mangparukma iti problematayo.” Kalpasanna mabalintayo nga iturong iti kapitulo 12 ti Saot’ Dios a libro ken basaen iti parapo 2.
6 Kalpasan ti panangusar iti Proverbio 2:6, 7 a mangilawlawag maipapan ti sirib iti Dios, iyammo ti New World Translation ken ilawlawag iti bumalay no apay a raemen ken italimeng ti Biblia. Palubosan a maammuanna a ti sursurona ket mangted kenkuana iti solido a namnama a maipaay ti masanguanan. Mabalin nga adda met oportunidadyo a mangitudo iti sumagmamano a nainsiriban a balakad ti Biblia iti kada aldaw a problema, a daytoy ti mangiturong iti panagadal ti Biblia.
7 Kanayon nga agturong ni Jesus iti Kasuratan a tumulong kadagiti nasingpet ti pusoda a tattao ken no sungbatanna dagiti bumusor kenkuana. Ugali idi ni Pablo nga ‘ilawlawag ken paneknekanna babaen kadagiti reperensia’ dagiti bambanag nga isursurona. (Ara. 17:2, 3) Ti talek ken rag-otayo iti ministerio isut’ rumang-ay bayat nga aggagartayo a mas nalaing a mangaramat iti Sao ti kinapudno.