Panangiparang ti Naimbag a Damag—Panangitukon iti Panagadal ti Biblia iti Pagtaengan
1 Daydi insert iti Agosto 1991 a Ti Ministeriotayo iti Pagarian impalagipna kadatayo ti responsabilidad nga agmula ken agsibug kas pamay-an iti panagaramid ti adalan ni Kristo. Impakitana kadatayo a kasapulan a matignaytayo a mangikondukta iti panagadal ti Biblia gapu iti ayattayo kadagiti tattao ken matungpaltayo ti komision nga agaramid iti disipulo.—Mat. 28:19, 20.
2 Nagsayaat a makita nga adun kadatayo ti nangrugi a nangaramid iti naimbag a pammaregta. Ti bilang dagiti panagadal ti Biblia a naireport ditoy Pilipinas isut’ rimmang-ay iti 12 porsiento iti 1991 manipud tawen ti serbisio idi 1990. Sigurado a dagidiay nangrugi a nangidaulo ti panagadal iti umuna a daras ket agrag-oda ti pannakiramanda iti trabaho a panagaramid ti disipulo. Ngem kasano nga ad-adu pay koma ti makipaset iti daytoy makagunggona a benneg ti ministeriotayo?
3 Usaren ti Tukon iti Bulan: Ti Enero isut’ maitutop a bulan nga agsapul iti baro a maadalan ti Biblia. Itukontayo dagiti daan a publikasion, a kaaduan kadagitoy ti addaan iti saludsod idiay baba ti parapo a mabalin a mausar a mangidemostra iti panagadal ti Biblia. Ti naimbag a pamay-an a pangpatanor ti interes iti bumalay isu ti panangusar kadagiti singasing a masarakan idiay Panakirinnason a libro.
4 Mabalintayo a dakamaten ti suheto maipapan iti sangalubongan a talna babaen ti panangusar kadagiti introduksion a naisingasing idiay panid 14 iti Panakirinnason ti baba iti “Gubat/Talna.” Adda tallo a nagduduma a wagas a pangrugi ti saritaan iti daytoy a tema. Ti panangparegta kadagiti tattao a mangsapul ti sungbat iti saludsod nga “Sangalubongan a Talna—Asideg Kadin?” isut’ mabalin a manglukat iti dalan a maipaay ti panagadal iti Biblia.
5 Iti babaen ti subtema a “Panangyadal ti Biblia iti Pagtaengan” iti panid 12 ti Panakirinnason a libro, adda dua a singasing a mabalin a nausar a pangiturong iti asikaso idiay publikasion a maitukon. Agpada nga iparegtana ti panangusar iti libro ti metodo a sistematiko a panagadal. No dakamatenyo ti diretso nga idudupag a pangrugi iti panagadal ti Biblia, mabalinyo a suroten dagiti nasayaat a singasing a linaon iti Oktubre 1991 a Ti Ministeriotayo iti Pagarian.
6 Agtalekkayo ken Jehova: Tapno agballigitayo iti panagadal ti Biblia a trabaho, laglagipentayo a dayta a balligi ket magun-odan laeng babaen ti tulong ni Jehova. Alaenna ti kangrunaan a papel iti pingettayo a tumulong kadagiti tattao. (1 Cor. 3:6) Gapuna, masapul nga ikararagtayo saan laeng a maipapan iti pannakasarak ti maysa a maadalan ngem kasta met iti panagprogreso dagidiay interesado a masarakantayo. (Juan 16:23) Laglagipen a datayo ket “katrabahonatayo ti Dios.”—1 Cor. 3:9.