Panangusar iti Ti Katan-okan a Tao a Nagbiag Pay Laeng
1 Kadagiti naglabas a tawtawen, gistay amin a publikasiontayo ti nangilawlawag iti biag ken ministerio ni Jesu-Kristo. Maiparbeng dayta, ta “awan ti sabali a nagan iti baba ti langit iti naited kadagiti tattao nga isut’ pakaisalakanantayo.” (Ara. 4:12) Daytoy a baro a libro ti naiduma agsipud ta isu pay laeng iti kaunaan kadagiti librotayo a nangipamaysa iti biag ni Jesus.
2 Panangitukon iti Daytoy iti Sabsabali: Ania ti dadduma a makapainteres a benneg daytoy a publikasion a mabalintayo nga itudo? Ti kapitulo 5 pataudenna ti maitutop a saludsod, “Pannakaiyanak ni Jesus—Sadino ken Kaano?” Mabalinyo a guyogoyen ti interes iti maysa nga agtutubo babaen ti makapariing a salaysay iti kapitulo 44, “Panangpaulimek ti Nakabutbuteng a Bagio.” Ti maysa a tao nga agsagsagaba ti pisikal a sakit wenno sagubanit isut’ sigurado a maliwliwa iti kapitulo 57, “Panangngaasi kadagiti Marigrigat.” Ti kapitulo 90, “Ti Namnama a Panagungar,” isut’ makaallukoy iti siasinoman a tao a malmaldaang ti ipupusay iti maysa nga ingongotenna. Ti diskusion maipapan iti makapadanag a kasasaad ti lubong isut’ maiturong iti kapitulo 111, “Pagilasinan ti Maudi nga Al-aldaw.”
3 Iti ruangan mabalinyo a kunaen daytoy: “Ania ti namnamaen iti Dios kadatayo kas Kristiano? Iturongnatayo ti Biblia a tumulad iti ehemplo a naituyang ti katan-okan a tao ditoy lubong, ni Jesu-Kristo. [Basaen ti 1 Pedro 2:21.] Insurona dagiti pasurotna nga agayat ti kaarubada, a nadalusda iti moral, ken agkararagda nga umay iti Pagarian ti Dios. Ti pannakaisalakantayo ti agpannuray iti panangbigbig ken panagtulnog ken Jesus kas Manangisalakantayo. [Basaen ti Juan 14:6.] Idinto ta agpannuraytayo kenkuana iti pannakaisalakan, saanyo kadi a riknaen a masapul nga ammuen agingga iti mabalin maipapan ti trabahona ken ti insurona? Daytoy a libro ti nairanta a nangruna iti daytoy a panggep, ket ragsakek nga itukon kadakayo daytoy a kopia.”
4 Siguruenyo a sarungkaran dagiti amin a makaala iti daytoy a libro. Mabalin a mausar a pangirugi iti panagadal ti Biblia iti pagtaengan. Nangruna a nasayaat daytoy iti panagadal ti pamilia ken dagiti panagadal a maikondukta iti agtutubo. Ti panangiraman iti daytoy a libro iti dadduma isut’ tumulong kadakuada a mangsarak iti dana ti agnanayon a biag.