Sieepektibo a Panangisango iti Agbiag nga Agnanayon a Libro
1 Ni Jesus ket nalaing a mangusar iti introduksion. Iti maysa nga okasion inyusuatna ti saritaan iti maysa a Samaritana babaen laeng ti panagkiddawna kenkuana iti mainum a danum. Daytoy ti dagus a nangawis ti asikasona agsipud ta ‘dagiti Judio saanda idi a makilanglangen kadagiti Samaritano.’ (Juan 4:7-9) Makaadaltayo iti daytoy nga ehemplo.
2 No agsaganakayo a mangitukon iti Agbiag nga Agnanayon a libro, saludsodanyo ti bagiyo, ‘Ania ti makaawis iti agtutubo, nataengan a tao, iti asawa a lalaki, wenno babai?’ Mabalinyo ti agsagana iti nasursurok ngem ti maysa nga introduksion ket usarenyo daydiay kasayaatan a maitutop iti situasion.
3 Idinto ta ti panagrakaya iti biag ti pamilia ket pakaseknan ti adu, mabalinyo a kunaen:
◼ “Dagiti inaldaw a pakasikoran iti biag ti mamarigat kadagiti pamilia kadagitoy nga aldaw. Sadino ti pakasarakan iti tulong? [Palubosan a sumungbat.] Ti Biblia ti pudno a makatulong kadatayo. [Basaen ti 2 Timoteo 3:16, 17.] Siputanyo ditoy parapo 3 iti panid 238 iti daytoy a publikasion, Mabalinyo ti Agbiag nga Agnanayon iti Paraiso a Daga. Basaen iti parapo 3, sa itukon ti libro.
4 No agusarkayo iti lokal a damag ti pagiwarnak, mabalinyo a kunaen:
◼ “Nangngegyo kadi daydiay damag maipapan iti [dakamaten daydiay banag a pakaseknan iti lokal]? Ania ti makunayo maipapan iti dayta? [Palubosan a sumungbat.] Nalabit a pagpanunotennakayo no sadino ti pagturongan daytoy a lubong, saan kadi? Impadto ti Biblia dagita a bambanag a kas ebidensia nga agbibiagtayon iti “maudi nga al-aldaw.” Kalpasanna mausig ti salaysay iti Agbiag nga Agnanayon a libro, pinanid 150-3.
5 Adu ti maseknan maipapan ti kumarkaro a krimen a problema. Mabalinyo nga usaren ti umuna nga introduksion iti baba ti paulo a “Krimen/Kinatalged” iti panid 10 iti “Panakirinnason” a libro:
◼ “Makisasaokami kadagiti tattao maipapan iti personal a kinatalged. Nakaro ti krimen iti aglawlawtayo, ket apektaranna ti biagtayo. Ania ti pagarupyo a masapul a maaramid tapno marikna dagiti tattao ti kinatalged iti lansangan no rumabii?” Basaen ti Salmo 37:10, 11 ken mailawlawag dagiti bendision iti Pagarian ti Dios, nga usaren dagiti pinanid 156-8 iti Agbiag nga Agnanayon a libro.
6 No kaykayatyo ti nalaka a yaasideg, mabalinyo nga usaren ti introduksion a kaasping daydiay masarakan iti panid 11 ti “Panakirinnason” a libro, iti baba ti paulo a “Masanguanan/Kinatalged”:
◼ “Parparegtaenmi dagiti kaarruba a mangusig iti nadaeg a masanguanan nga ipanamnama ti Biblia kadatayo. [Basaen ti Apocalipsis 21:3, 4.] Naimbag kadi daytoy kadakayo? [Palubosan a sumungbat.] Ti Kapitulo 19 daytoy a libro ilawlawagna dagiti bendision a lak-amen ti sangatauan iti sidong ti Pagarian ti Dios.” Maitukon ti libro.
7 Ti panagsagana iti epektibo nga introduksion ti tumulong kadatayo a mangdanon kadagidiay agbisin ti kinapudno ken kinalinteg.—Mat. 5:6.