Panangisilpo ti Introduksiontayo iti Literatura
1 No isaganayo ti panangiparangyo iti daytoy a bulan, mabalin a mausig nga umuna dagiti kangrunaan a problema a sangsanguen dagiti tattao idiay lugaryo kalpasanna pilienyo dagiti sasao manipud iti broshur a mangitudo ti Nainkasuratan a solusion.
2 Iti dadduma a sangakaarubaan, maseknan dagiti tattao maipapan ti kaawan a panggedan ken iti nangina gastos ti panagbiag. No masabetyo daytoy a situasion, mabalinyo a dakamaten a masinnunuo dayta a problema idiay introduksionyo.
Mabalinyo a kunaen:
◼ “Makisaokami kadagiti kaarubatayo maipapan no ania ti maaramid tapno maisiguro iti kaadda ti panggedan ken pagtaengan iti tunggal maysa. Patienyo kadi a nainkalintegan a manamnama iti natauan a gobierno a maitungpalna daytoy? [Palubosan ti bumalay a sumungbat.] Adda maysa a makaammo no kasano a masolbar dagitoy a problema; ket siputanyo ti naipasiguro a kari iti Isaias 65:21-23. [Mabasa.] Impaisurat ti Namarsuatayo daytoy a kari a kas pammaregta kadatayo, ket amintayo ti agkasapulan iti dayta kadagitoy a narikut a tiempo, saan kadi?”—rs, p. 11.
3 Iti daytoy a punto ti presentasionyo, mabalinyo nga isilpo iti material manipud ti maysa kadagiti broshur. No itukonyo ti “Adtoy!” a broshur, apay a dikay ipakita no kasano a ti kapanunotan iti pagtaengan ken panggedan kadagiti amin ket naiyilustrar idiay sango ken likud nga abbong ti broshur. Mabalinyo a luktan tapno makita ti bumalay iti intero nga ilustrasion a maminpinsan.
4 Kadagiti teritoria a dagiti bumalay ket nagduduma iti pakadanaganda, ti maysa a nalap-it nga introduksion isut’ makatulong. Mabalin a kayatyo a padasen daydiay maikadua nga introduksion a nailista iti Panakirinnason a libro iti baba ti “Pagarian.”
Mabalinyo a sawen:
◼ “Insuro kadatayo ni Jesus nga ikararag iti Pagarian ti Dios nga umay koma ken ti pagayatanna a maaramid ditoy daga a kas sadi langit. Pagarupyo kadi a no maaramid iti pagayatan ti Dios ditoy daga, ket ti daga pudnonto nga agbalin a paraiso?” Kalpasan a makasungbat ti bumalay, iyammo ken ibasayo iti Apocalipsis 21:3-5.
Kalpasanna, no itukonyo ti Gobierno a broshur, basaenyo dagiti napili a benneg iti panglukat a parapo idiay panid 3. Timudenyo dagiti sasao: “Babaen iti Pagarian, ipatingganton ti Dios dagiti gubgubat, bisin, sakit ken krimen.” Saludsodan iti bumalay no ania kadagitoy a problema ti mariknada a kaseriosuan.
5 Dagiti agtutubo ket epektiboda met a mangiparang iti mensahe ti Pagarian, uray kadagiti nataengan a tattao.
Ti panangiyammo iti Isaias 65:21-23, mabalin a kunaen dagiti agtutubo:
◼ “Ammok a kas nataengan a tattao ket mas aduankayo iti kapadasan ngem iti siak, ngem daytoy a kasuratan ti manglilwliwa kadatayo amin.”
6 Siguruenyo a maaramid a naannad iti rekord dagiti naipaima, agraman dagiti masinnunuo a broshur ken magasina. Kasapulanyo daytoy nga impormasion no agsarungkarkayo a mangkultibar iti interes.