Dagiti Introduksion a Mangpabara iti Interes
1 Ni Jesus ket nalaing a mangusar kadagiti introduksion. Agsao man iti saklang ti dakkel a grupo wenno iti maysa laeng a tao, maallukoy ni Jesus ti asikaso iti dumdumngeg kenkuana babaen ti personal a panangiramanna kadakuada. Impakitana kadakuada ti pateg iti suhetona.—Mat. 5:3-12; Luc. 20:25-37; Juan 4:7-30.
2 Kasapulan ti Nasakbay a Panagsagana: Tapno mapabara ti interes, dagiti introduksiontayo ti masapul a mangiraman iti daydiay tao, a dakamaten dagiti pakaseknanna, ken ipakita a ti damag iti Pagarian ti mismo a tumulong kenkuana.
3 Ti panagsagana a maipaay iti ministerio, repasuen no ania ti pakaseknan dagiti tattao iti komunidad. Ania ti paginteresan dagiti agtutubo a tattao? Dagiti lallakay ken babbaket? Dagiti assawa a lallaki, assawa a babbai, wenno dagiti nagannak? Imbes nga usaren iti isu met laeng nga introduksion ti kada ruangan, agsaganakayo iti nagduduma nga introduksion ken nakasaganakayo a mangitutop kadakuada bayat a matinongyo ti sungbat dagiti bumalay. Dadduma kadagiti agibumbunannag ti naballigi unay babaen iti panangusarda ti nagduduma nga introduksion manipud ti libro a Panakirinnason iti kada tiempo a mapanda iti panagbalaybalay a ministerio.—rs p. 9-15.
4 Bayat ti bulan iti Setiembre, mabalin a kayatyo nga usaren ti panangiparang a kas iti daytoy:
◼ “Naimbag a bigatyo. Salsaludsodenmi kadagiti dadduma a kaarubayo no ania dagiti kalidad ti kayatda a makita iti maysa a tao a mangituray iti sabsabali. Mabalin kadi a masaludsod kadakayo no ania a kalidad iti mapanunotyo a kaskenan? [Palubosan a sumungbat. Kanunongan no maitutop.] Ammoyon aya a ti Biblia ket dineskribena iti kualipikasion daydiay Maysa nga agturayto iti sangatauan? Adda ditoy Isaias 9:6, 7. [Mabasa.] Ania ti makunayo a kasasaadto iti sidong ti kasta nga agturay?” Palubosan a sumungbat sa maiturong ti asikasona iti Salmo 146:3, 4 ken ti material iti Panakirinnason a libro idiay pinanid 156-7 maipapan iti turay ni Jesus. Wenno ti Gobierno a broshur iti pinanid 19 ken 20 ti mabalin a mausar a pangpabara iti mainayon a diskusion.
5 No makisaokayo kadagidiay adda pamiliada, ti sumaruno a panangiparang ti mabalin nga agkurri kadakuada no aramatenyo iti Tagiragsakenyo ti Biag a broshur.
Kalpasan ti lokal a pangablaaw, mabalinyo a kunaen:
◼ “Napaliiwyo kadi a dagiti inaldaw a pakasikoran ket idatagda ti pudno a karit kadagiti pamilia kadagitoy nga aldaw? [Palubosan a sumungbat.] Adda aya banag iti panunotyo a mabalin a pagkamangan dagiti pamilia a maipaay iti nalimbong a balakad? [Palubosan a sumungbat.] Siputanyo no ania ti nakuna iti Namungay ti panagasawa iti umuna a natauan a pagasawaan.” Basaen ti Genesis 1:28 ken sa maiturong kadagiti punto 55, 56, 68, ken 69 idiay Tagiragsakenyo ti Biag a broshur ken maitultuloy iti diskusion.
6 Babaen ti panangtulad iti metodo ni Jesus a mangallukoy ti interes ken panangiraman iti dumdumngeg a maipaay ti diskusion, maipakita kadagiti nasingpet ti panagpuspusoda a tattao iti pateg ti naespirituan a bambanag.