Panangtrabaho iti Masansan Pannakawanasna a Teritoria
1 Maragsakantayo a makadamag nga adu dagiti kongregasion a masansan a makawanwanas iti teritoriada. (Mat. 24:14; 1 Tim. 2:3, 4) Nupay agbalin a maysa a karit daytoy, mapagballigian no nakasaganatayo a naimbag a mangsango kadagiti nadumaduma a sirkumstansia a tumaud.
2 Dagiti Epektibo nga Introduksion ti Tulbek: Napateg unay nga adda naisaganatayo a maysa wenno ad-adu pay a nasayaat-pannakaputarna nga introduksion. Saklawenna koma ti ababa a sasao a mangilawlawag kadagiti napateg a rason iti masansan nga isasarungkartayo.
3 Ti libro a Panakirinnason ipaayannatayo iti adu a nasayaat a pagarigan dagiti mayanatup nga introduksion a mausar. Adda nailista a tallo iti panid 15 iti baba ti paulo a “Kadagiti Teritoria a Masansan a Maas-asak.” Insaywen dagiti kayatyo nga usaren iti teritoriayo.
4 Dadduma nga agibumbunannag agballigida a mangirugi iti pannakisarita kadagiti masansan a maas-asak a teritoria babaen ti panangusar kadagiti damag iti lokal a diario. Mangted ti tallo a pagarigan ti libro a Panakirinnason no kasano nga aramiden daytoy. Kitaenyo ti maikadua nga introduksion iti baba ti paulo a “Krimen/Kinatalged” iti panid 10 ken ti umuna a dua nga introduksion iti baba ti paulo nga “Agdama a Paspasamak” iti panid 10 ken 11.
5 Dagiti Isaganayo nga Introduksion: Mabalinyo latta a putaren ken usaren dagiti pangiruangan a sasao a naiparang iti libro a Panakirinnason. Yebkas dagitoy iti bukodyo a sasao. Insaywenyo ida a kadua ti maysa nga addaan kapadasan nga agibumbunannag sakbay nga usarenyo ida iti tay-ak.
6 Kas pagarigan, mabalinyo a kunaen ti kastoy:
◼ “Manipud idi naudi nga ibibisitami kadakayo, [dakamaten ti nabiit pay a pasamak iti komunidad a pagsasaritaan dagiti tattao]. Agsipud ta apektadotay amin, adu kadagiti kaarrubatayo ti pudno a maseknan. Nalabit a pampanunotenyo met dayta. [Agsardengkay bassit ket urayenyo no adda sungbatna.] Gapu iti kasasaad ti lubong itatta, saan aya nga umanamongkayo iti insurat ni propeta Jeremias iti kapitulo 10, bersikulo 23?” Kalpasan ti pannakabasa ti kasuratan, dawaten ti obserbasion ti bumalay, sa kitaenyo ti maysa a kasuratan a mangipakita no kasano a risuten ni Jehova ti parikut a pagsasaritaan.
7 Wenno mabalinyo nga ikuna:
◼ “Awan duadua a nadlawyo ti adda iti diario ita [mangdakamatkayo iti espesipiko a pasamak]. Nalabit umanamongkayo nga apektarannatay amin daytoy. [Agsardengkay bassit no adda sungbatna.] Namnamaentayo a mangibalabala ti gobierno iti di-agbayag a remedio; nupay kasta, ipakita ti Biblia no kasano a permanente a marisutto ti problema.” Ipakita ti maysa a kasuratan a mangipakita no aniat’ aramidento ti Dios.
8 “Apay Nga Agkarasublikayo?” Dagiti mayanatup a sungbat iti daytoy nga isusupiat naitedda iti libro a Panakirinnason iti panid 20 iti baba ti paulo nga “Apay Nga Agkarasublikayo?” Uray no dida damagen, makaitedtay iti nasayaat a pammaneknek no tulongantayo ti sabsabali a mangapresiar a ti pudno a panagayat iti Dios ken iti kaarruba ti mangtignay kadatayo a masansan nga agsubli no mabalbalin. Ti panangisalaysay iti sasao ni Jesus iti Juan 21:15-17 mabalin a makagunggona iti daytoy.
9 Agingga a di pasardengen ni Jehova, itultuloytay a sanguen ti karit ti panangtrabaho iti masansan ti pannakawanasna a teritoria. Babaen iti daytoy a determinasion, manamnamatay ti pannarabay, pannalaknib, ken pamendisionna agingga iti panungpalan.—Mat. 28:19, 20.