Mannakibagaykayo Koma iti Ministerioyo
1 Makunkuna a ti kinadumaduma ket rekado iti biag. Masansan, ti naiduma nga idudupag a maipaay iti maysa a suheto ti mangaramid a mas makapainteres. Pudno daytoy iti ministeriotayo. No ditay agannad, ti panangiparangtayo ket agbalin a makapauma. Ti panangdagullit iti isu laeng nga isu nga introduksion ti makapabannog kadatayo ken kadagiti bumalay. Gapuna, agbalinkayo a nasalawitwit iti ministerioyo. Kasano a maaramid daytoy?
2 Imbes a kunaenyo, ‘Naimbag a bigatyo. Simmarungkarkami iti kaarubami babaen ti naimbag a damag iti Pagarian,’ apay a dikay mangpanunot ti wagas a naiduma kadagiti panglukat a sasaoyo? Idiay pinanid 9-15 iti Panakirinnason a libro, adda dagiti 18 nga introduksion iti nagduduma a suheto.
3 No usarenyo daydiay broshur a “Pudno Aya a Maseknan ti Dios Kadatayo?”, daytoy introduksion manipud benneg a “Biag/Kinaragsak” iti panid 13 ti mabalin a makatulong:
◼ “Makisasaokami kadagiti tattao a maseknan maipapan iti kualidad ti biag kadagitoy nga aldaw. Adu dagiti mangisaludsod, Posible ngata ti pudno a naragsak a biag? Daytoy a broshur ti mangted iti makaparegta a punto ti panangmatmat.” Luktan ti broshur iti panid 25 ken basaen ti parapo 15 ken 16.
4 Dadduma nga agibumbunannag ti nakasarak a makapainteres iti iyaadani no maaramid babaen ti panangusar iti tract.
Maysa nga agtutubo nga agibumbunannag ti mabalin a mangusar iti tract a “Tagiragsakenyo ti Biag ti Pamilia” a kunaenna:
◼ “Adda ababa a damag nga agpaay kadakayo maipapan no kasano a pagkaykaysaen ti Dios dagiti pamilia iti kinaragsak. Kayatko nga ited kadakayo daytoy tract a natituluan iti Tagiragsakenyo ti Biag ti Pamilia.” Ikeddeng ti nataengan nga agibumbunannag a kakuyog daytoy nga agtutubo no nayonanna pay ti agkomento.
5 No ti bumalay ipakitana iti interes, ti nataengan nga agibumbunannag mabalinna a kunaen:
◼ “Ipakita ti Biblia iti umiso a papel ti asawa a lalaki, iti asawa a babai, ken dagiti annak maipapan ti urnos iti pamilia. Idinto ta ti Dios isut’ Namunganay iti pamilia, saankayo kadi nga umanamong nga isut’ kasayaatan a mangibaga no kasano iti panagandar ti pamilia? Kayatko a mangngegan ti kapanunotanyo iti pammagbaga ti Biblia kadagiti miembro ti pamilia.” Kalpasanna basaen ti Efeso 5:22, 23, 28-31.
6 No dakamatenyo ti Creation a libro, apay a dikay ilawlawag iti masanguanan a madakamat iti Apocalipsis 21:3, 4? Kalpasanna basaenyo ti parapo 13 iti panid 239 daytoy a libro. Saludsodan ti bumalay no mamati a ti Dios ket tungpalenna dagitoy a karkarina. Ti maysa nga ababa a diskusion kadagitii padto ti Biblia a nalpasen a natungpal, kas ipakita iti kapitulo 18 ti libro, isut’ mamabileg iti pammati ti bumalay iti abilidad ti Dios a mangbendision iti sangatauan.
7 Amin dagiti manangiwaragawag iti Pagarian ti agmayat a makiraman a mangiyabante iti teokratiko nga interes, panagmula iti bukel ti kinapudno iti uray sadinoman ken kultibaren ti maipakita nga interes. No maaramid ti pasettayo, maragsakantayo a mangitalek iti aniaman a masanguanan a panagrang-ay iti ima ni Jehova.—1 Cor. 3:6.