Parayrayenyo ti Interes iti Libro nga Agbiag nga Agnanayon
1 No intay agbalaybalay, masansan a masarakantayo a makumikom unay dagiti tao iti “pakaringgoran daytoy a sistema ti bambanag.” (Mar. 4:19) Iti damo, kaaduan a tattao bassit ti interesda iti mensahetayo. No makayebkastay iti aniaman a makatignay iti biagda, nalabit a maparayraytay ti interesda iti mensahe ti Pagarian. Maysa a tulbek iti panangirugi ti panagpapatang isut’ panangpili kadagiti makaawis a punto manipud iti libro nga Agbiag nga Agnanayon. Aniat’ mabalinyo nga ibaga?
2 Mabalinyo nga usaren daytoy a panangiruangan:
◼ “No adda pannakabalinyo, ania a problema itatta ti aturenyo? [Palubosanyo a sumungbat.] Agpapan ita, bassit laeng ti naaramidan dagiti lider ti lubong a mangsolbar kadagiti inaldaw a problema. Ngem adda Maysa a makabael a mamagpatingga kadagiti amin a parikut a mangparparigat iti sangatauan. Imutektekanyo ti naibaga iti Salmo 145:16. [Basaen ti kasuratan, ken ipakita ti ilustrasion iti pinanid 11-13.] Ti parapo 14 iti panid 14 pataudenna ti saludsod a nagsasaritaantayo itay sa agsaludsod: ‘Ngem kaano a mapasamak daytoy?’” Ilawlawagyo a sungbatan ti libro dayta a saludsod, sa itukonyo ti libro.
3 Wenno mabalinyo a kunaen ti kastoy:
◼ “Nalabit ammoyo ti rikrikna ti maysa a napanawan iti pimmusay nga inay-ayat. Nalabit a pinagleddaangnakayo ken awan nabalinanyo. Mabalin nga inutobyo dagitoy a saludsod: [Basaen dagiti saludsod iti parapo 1 iti panid 76.] Saan aya a makaliwliwa no maammuantay ti sungbat dagitoy a saludsod? Ikari ti Biblia ti sigurado a namnama maipaay kadagidiay pimmusayen. [Basaenyo ti Juan 5:28, 29.] Tulongannatay daytoy a libro a mangtarus iti kasasaad dagiti natay ken no ania a namnama ti adda iti masanguanan.” Itukonyo ti libro.
4 Awan duadua a maaddaankayto kadagiti gundaway iti impormal a panangasaba. No kasta, mabalinyo a kunaen ti kastoy:
◼ “Napno ti parikut ti lubong itatta, ket awan duadua a naapektarankayo. Nakalkaldaang nga ibaga, a dagiti awan basolna a tao ti ad-adda nga agsagaba. Ti kadi pagarupyo ket pagpatinggaento ti Dios ti panagrigrigat? [Palubosanyo a sumungbat.] Kitaenyo no ania ti ikari ti Dios kadagidiay agserbi kenkuana. [Basaen ti Salmo 37:40 ket lukatanyo ti libro nga Agbiag nga Agnanayon iti panid 99.] Ilawlawag daytoy a libro no apay a palubosan ti Dios ti kinadakes ken no kasano a pagpatinggaennanto.”
5 No maysakay nga agtutubo nga agibumbunannag, mabalinyo nga usaren ti panangiparang a naibasar kadagiti ilustrasion iti pinanid 156-8. Mabalin nga irugi babaen iti panangisaludsod:
◼ “Kayatyo kadi ti agtaeng iti lubong a kas itoy? [Palubosanyo a sumungbat.] Tunggal maysa kadagitoy napintas a ladawan ket naibasar iti kari a nailanad iti Sao ti Dios, ti Biblia. [Ipakita dagiti reperensia iti Kasuratan.] Tulongannakayo daytoy a libro a mangadal ti ad-adu pay maipapan iti kari ti Dios a mangaramid iti intero a daga a paraiso. Linaonna ti makaispal-biag nga impormasion ket maikari a pangusaran ti tiempo a basaen.”—Juan 17:3.
6 Usarentay amin ti libro nga Agbiag nga Agnanayon iti Setiembre tapno maparayray ti interes iti naimbag a damag iti Pagarian.