Tulongan Ida a Dumngeg iti “Sabali Pay a Tiempo”
1 “Dumngegkaminto kenka maipapan itoy iti sabali pay a tiempo.” (Ara. 17:32) Dayta idi ti sungbat ti sumagmamano iti palawag ni Pablo idiay Areopago. Kasta met ita, sidadaan a dumngeg pay dagiti dadduma maipapan iti mensahe ti Pagarian nga inranudtayo kadakuada iti damo nga isasarungkartayo.
2 Matulongannatay ti nasayaat a panagsagana no agsublitayto a mangparayray ti interesda. Irekomenda ti libro a Giya iti panid 51: “Umuna nga ammuenyo dagiti argumento a mangsuportar iti material a silalawag iti panunotyo. . . . Kitaenyo no maikabilyo dagiti ideya iti mismo a sasaoyo. Tarusanyo a naimbag dagiti Nainkasuratan a pammaneknek. Sisasaganakay koma a mangyaplikar a sieepektibo kadagiti kasuratan.”
3 No naipaimayo ti libro a “Ti Biblia—Saot’ Dios wenno iti Tao?,” mabalin a kastoy ti ikunayo:
◼ “Ti libro a naibatik kadakayo pataudenna ti saludsod, ‘Apay Basaenyo ti Biblia?’ [Basaen ti introduksion iti panid 5, ket bay-an a komentuanna ti maudi a saludsod.] Ibaga ti Biblia kadatayo a ngannganin risuten ti Dios amin dagiti parikut ti sangatauan. Nadisenio daytoy a libro a tumulong iti personal ken sangapamiliaan a panagadal ti Biblia. Maragsakanak a mangipakita no kasanoyo nga usaren dayta.”
4 Kadagiti sasarungkaran a naibatianyo iti tract a “No Apay a Mapagtalkanyo ti Biblia,” padasenyo a kunaen ti kastoy:
◼ “Interesadotay amin iti masanguanan. Gapu iti agdama a kasasaad ti lubong, ania ti pagarupyo a mapasamakto? [Palubosan a sumungbat.] Tangay mabalin laeng ti tao ti agipapan, ti Dios ammona ti apag-isu a mapasamakto. [Basaen ti Isaias 46:10.] Ipadto ti Biblia a ngannganitayon tagiragsaken ti paraiso a baro a lubong. [Basaen ti maikatlo a parapo iti panid 4.] Bay-andak a mangisalaysay ti ad-adu pay maipapan iti dayta.”
5 No inkay sarungkaran ti nakaibatianyo ti “New World Translation,” nalabit epektibo daytoy a singasing kadakayo:
◼ “Itay nabiit, nakaibatiak kadakayo iti kopia ti Biblia, ket nagkariak nga agsubli tapno tulongankay a mangusar iti dayta. No maminsan agpanunottayo no kasanotay a mapagtalinaed ti nainggayyeman a relasiontayo kadagiti sabsabali. Adda nasayaat a balakad ti Biblia iti daytoy, ket nalaka a sapulen dayta iti New World Translation. [Luktan ti panid 1595 (1636 iti Iloko) sa kitaen iti baba ti paulo a “Love(s)” (“Ayat” iti Iloko). Dakamaten dagiti teksto kas ti 1 Corinto 13:4; Colosas 3:14; ken 1 Pedro 4:8.] Maysa daytoy a pagarigan a mangipakita no kasano a mangted ti Biblia kadagiti praktikal a solusion iti parparikuttayo. Inton agsubliak, kayatko nga ipakita ti sabali pay a wagas no kasano a tulongannatayo ti Biblia a maaddaan iti natalna a panunot.”
6 Awanen ti dakdakkel a gameng a mabalintay nga ited iti sabsabali no di ti umiso a pannakaammo iti Sao ti Dios. Tulongan dayta a pannakaammo dagiti tattao a magna iti dalan ni Jehova, a mangyeg kadakuada iti agnanayon a bendision.—Prov. 2:20, 21.