Ti Biblia—Gubuayan ti Liwliwa ken Namnama iti Nariribuk a Lubong
1 Naipasidong dagiti tattao itatta iti nakaro a pakarigatan ket masapulda ti liwliwa ken namnama. Ti Biblia laeng ti kakaisuna a gubuayan ti pudno a liwliwa. Itukonna ti namnama iti maysa a baro a lubong. (Roma 15:4; 2 Ped. 3:13) Kuna ti libro nga Insight, Tomo 1, panid 311: “No awan ti Biblia ditay koma naammuan ni Jehova, ditay koma naammuan dagiti nakaskasdaaw a gunggona nga imbanag ti daton a subbot ni Kristo, ken ditay koma natarusan dagiti kasapulan tapno magun-od ti agnanayon a biag iti sidong ti nalinteg a Pagarian ti Dios.”
2 Bayat ti Nobiembre ipakitatayto no kasano a tulongan ti Saot’ Dios ti tattao a mangdaer kadagiti pammarigat a patauden ti lubong. Itukontayto ti New World Translation of the Holy Scriptures (wenno Ti Nasantuan a Kasuratan) ken ti libro a Ti Biblia—Saot’ Dios wenno iti Tao? Ania ngata ti mabalintay nga isao a tumulongto kadagiti tao a sidadaan a dumngeg a mangapresiar iti kinapateg ti Biblia?
3 Kalpasan a mayam-ammoyo ti bagiyo, mabalinyo a kunaen ti kastoy:
◼ “Nalabit umanamongkayo a nalikmuttayo kadagiti parikut a mangriribuk iti natalna a panunot. Pakasarakantay ngata iti praktikal a balakad a tumulong kadatayo a mangdaer kadagitoy a problema? [Palubosan a sumungbat.] Nasarakak a mapangnamnamaan ti Biblia agsipud ta isuronatayo nga agragsak. [Basaen ti Lucas 11:28.] Panggep ti trabahomi a paregtaen dagiti tattao nga agbasa iti Biblia. Daytoy a katulongan ti panagadal ti Biblia, Ti Biblia—Saot’ Dios wenno iti Tao?, matulongannakayo a mangaramid iti dayta. Kitaenyo ti kunana maipapan iti panangrisut kadagiti problema. [Basaen ti maikadua a sentensia iti parapo 9 iti panid 187.] Maragsakanak a mangibati iti daytoy a kopia kadakayo.”
4 Nalabit pilienyo nga usaren ti simple a yaasideg a kas itoy:
◼ “Interesadokami a mangparegta iti ad-adda a panagraem iti Sao ti Dios, ti Biblia. Kayatko koma nga ited kadakayo daytoy a tract No Apay a Mapagtalkanyo ti Biblia. Ilawlawagna no apay a makapagpiartay iti Biblia a pakasarakan ti sierto a namnama maipaay iti nasaysayaat a lubong. [Luktan ti panid 6, sa basaen ti Salmo 37:29 ken ti maudi a parapo.] Basaenyo daytoy a tract, ket inton sumaganad nga isasarungkarko, ibagayonto kaniak no ania ti makunayo maipapan iti namnama nga ituktukon ti Biblia.”
5 Nalabit kayat ti dadduma nga agibumbunannag nga usaren daytoy direkta a yaasideg iti panangirugi ti panagadal ti Biblia:
◼ “Simmarungkarak ta kayatko nga itukon ti maysa a libre a panagadal ti Biblia iti pagtaenganyo. Nadisenio ti New World Translation of the Holy Scriptures para iti personal a panagadal. Popular dayta kadagiti minilion a managbasa ti Biblia iti intero a lubong. Ipalubosyo nga idemostrak no kasano a mausaryo dayta. [Luktan ti panid 1653, sayo ipakita ti 23A. Basaen ti maysa wenno dua kadagiti naisitar a kasuratan sayo pagsaritaan.] Maragsakanakto nga agsubli tapno pagsaritaantanto pay daytoy a namnama ti Pagarian.”
6 Ti Biblia isut’ gubuayan ti kinapudno a mangiturong iti biag nga agnanayon. (Juan 17:3, 17) Ti panangiranud iti kinapudno ti Biblia iti sabsabali paragsakenna ni Jehova, “a ti pagayatanna ket maisalakan koma dagiti amin a kita ti tattao.”—1 Tim. 2:4.