Itultuloyyo nga Asikasuen ti Isursuroyo
1 Ti baro a programa ti Theocratic Ministry School mangruginto no Enero 1995. Aniat’ baro iti programa? Ti nakaay-ayat a historia ti moderno-nga-aldaw nga organisasion ni Jehova ti tema a masalaysayto iti kaaduan dagiti makaisuro a palawag. Kabayatan ti tawen, matamingto ti 178 a pinanid ti libro a Dagiti Saksi ni Jehova—Manangiwaragawag iti Pagarian ti Dios. Tangay awan ti repaso kalpasan ti makaisuro a palawag a maibatay iti libro a Manangiwaragawag, aniat’ mabalintay nga aramiden tapno maasikaso ti isursurotayo ken magun-odtay dagiti gunggona?—1 Tim. 4:16.
2 Nupay adun ti nakabasa iti libro a Manangiwaragawag, ti pannakatamingna iti eskuelaan tulongannanto amin a mangapresiar nga ad-adda pay ti nateokratikuan a tawidda. (Sal. 71:17, 18) Apay a dikay mangyeskediul iti bassit a tiempo kada lawas tapno repasuen ti naituding a material iti libro a Manangiwaragawag?
3 Nabiag ken Makatukay a Makaisuro a Palpalawag: Rebbeng koma a maiparang a nabiag ken makatukay dagiti makaisuro a palawag a naibatay iti libro a Manangiwaragawag. Masapul met a pagminarenda ti praktikal a kinapateg ti impormasion, nga usaren tapno umuneg ti panagraem iti organisasion ni Jehova ken ti apresasion kadagiti pribilehiotayo kas ad-adipen ti Dios. No itugot ti tunggal pamilia ti kopiada iti libro a Manangiwaragawag iti gimong, mabalin a sisisingedto a suroten dagiti kameng ti pamilia ti makaisuro a palawag ket magunggonaanda kadagiti ilustrasion ken ladawan nga adda iti libro.
4 Makatukay-panunot a Panagbasa iti Biblia: Ti nasigo a panagbasa, a mabuyogan iti panangipaganetget ken rikna, ket nasken a paset ti epektibo a panangisuro. Mainayon pay, saan nga atiddog ti naituding a material a basaen iti Talk No. 2, isu nga adda umdas a panawen para iti introduksion ken pangserra a komento ti agpalawag. Ti introduksion masapul koma a matignayna ti interes iti material ken maisaganana dagiti agim-imdeng a mangilasin iti praktikal a pategna. Mabalin nga iraman ti konklusion dagiti manglawag a komento ken aplikasion ti material, nga usaren a naimbag ti espiker ti naituding a panawen.
5 Masarakan ti kanayonan nga impormasion maipapan iti programa ti eskuelaan ken no kasano nga isagana dagiti paset iti “Theocratic Ministry School Schedule for 1995.” Maasikasotayo ti isursurotayo babaen iti panangrepaso kadagiti instruksion iti daytoy a material, babaen iti naimbag a panangisagana kadagiti paset, ken babaen iti panangyaplikar iti balakad a maited kadatayo. Sibabara a maawis nga agpalistan dagidiay di pay nakapagpasalista iti eskuelaan.