Paset 2—Magunggona Manipud Teokratiko nga Eskuelaan ti Panagministro iti 1996
1 Di nagbayag kalpasan a nangrugi ti Teokratiko nga Eskuelaan ti Panagministro idi 1943, maysa kadagiti sanga ti Sosiedad ti nagreport: “Iti ababa a tiempo, nagballigi daytoy nagsayaat nga urnos a nangtulong iti adu a kakabsat a nangipagarup a nikaanoman saanda nga agbalin a nalalaing a pumapalawag iti publiko iti plataporma ken ad-adda nga epektibo iti tay-ak.” Agtultuloy ti eskuelaan a mangted iti ekselente a pannakasanay a kasapulantayo amin.
2 Panagbasa iti Biblia: Saan laeng a dagidiay maikkan iti paset nga agpalawag ti magunggonaan iti eskuelaan. Kinapudnona, addaantay amin iti paset—ti linawas a panagbasa iti Biblia. Adu a Kasuratan ti mangipalagip kadatayo a basaen ti Biblia nga inaldaw. (Jos. 1:8; Sal. 1:2; Ara. 17:11) Nasken ti panagbasa iti Biblia a maipaay iti naimbag a naespirituan a salun-at; taraonanna ti panunot ken puso. No basaentayo ti Biblia iti uray lima a minutos laeng iti kada aldaw, mabalintayo ti makidanggay iti eskediul ti eskuelaan a mangbasa iti Biblia. Iti ngudo ti tawen, nakabasatayton iti nasurok a 150 a kapitulo iti Sao ti Dios.
3 Pangisuro a Palawag: Masapul nga usaren ti mangted iti pangisuro a palawag kadagiti naimbag a metodo ti panangisuro tapno mapabilegna ti panangipateg ken Jehova, ti Saona, ken ti organisasionna. Agsagana koma a naimbag dagiti panglakayen ken ministerial nga adipen, ipaganetgetda ti tema, ken biagenda ti material. (Heb. 4:12) Nasken nga agtalinaed ti managpalawag iti naituding nga orasna. Idatag ti libro nga “Amin a Kasuratan” ti adu a nagduduma a makaparayray a Nainkasuratan a material a pagimbagantay iti naespirituan. Ti libro a Manangiwaragawag naglaon iti moderno nga aldaw a historia ti makitkita nga organisasion ni Jehova ken salaysayenna dagiti pasamak iti biag dagiti pudno a tattao a nangidemostra ti pammati, regta, debosion, ken ayat.
4 Dagiti Tampok ti Biblia: Pilien koma dagiti kakabsat a pakaitedan daytoy a paset dagiti masinunuo a bersikulo a mayaplikar iti praktikal a wagas. Kasapulan daytoy ti panangbasa kadagiti kapitulo a naituding ken agsukimat tapno maalana ti kaipapanan dagiti bersikulo. Idiay likud ti Watch Tower Publications Index, adda “Scripture Index,” a makatulong a mangsapul iti salaysay maipapan kadagiti masinunuo a bersikulo ti Biblia. Masapul nga usaren dagiti kakabsat a mangisango iti daytoy a paset ti pannakaawat ket liklikanda ti manginayon iti di maikanatad a material. Saanda nga agsagana iti material nga ad-adu ngem ti maiparbeng a mawanas iti innem a minutos.
5 Magunggonaantay amin iti Teokratiko nga Eskuelaan ti Panagministro. No naan-anay a gundawayantay daytoy a probision sigurado a tumulong iti ‘panagrang-aytayo a maiparangarang iti amin a tattao.’—1 Tim. 4:15.