Ipakita ti Panangtaripato babaen ti Panagsarungkaryo
1 Ti panangsapul kadagiti interesado a tattao iti ruruangan idemostrana ti tarigagayyo a mangited iti sabsabali ti gundaway a dumngeg iti mensahe ti Pagarian. Gapuna a siguruenyo ti sumarungkar kadagiti naipaima a literatura iti Enero, ta daytoy ti naimbag a pamay-an a mangipakita a maseknankayo iti dadduma.
2 No nakaibatikayo iti “Panangbiruk iti Dios” a libro, padasenyo nga ituloy ti saritaan iti kastoy:
◼ “Iti napalabas napagsaritaantayo no kasano a dagiti adu a tattao ket natawidda laeng dagiti relihionda manipud nagannakda. Ngem masdaawkayo kadi no apay a nagadu a relihion ti agkuna a Kristianoda? [Palubosan a sumungbat.] Ti libro nga imbatik kadakayo ti mangted iti kompleto a salaysay idiay kapitulo 11, mangrugi iti panid 261. Di kadi mabalin nga iruaryo ti libroyo ta kitaentayo dagiti sumagmamano a parapo?” Lawagan dagiti umuna a tallo a parapo ken maiyurnos ti panagsarungkar tapno maituloy ti panagadal.
3 Adtoy ti sabali a singasing nga ipadasyo:
◼ “Iti napalabas nagsaritaantayo dagiti sumgmamano a pakailasinan a marka iti pudno a relihion. Maysa kadagiti kangrunaan a nadakamat ditoy isu ti Juan 13:34, 35. [Basaen.] Ti panagkunayo amin ngata a relihion ket naipakitada daytoy a kita ti ayat iti maysa ken maysa? Ti libro a naibatik kadakayo ket ilawlawagna daytoy a suheto iti kapitulo 15, ditoy panid 344. Kayatko nga ipakita kadakayo dagiti sumagmamano a puntos a magustuak iti daytoy a kapitulo.” Lawlawagan dagiti sumagmamano a parapo sa maiyurnos iti masanguanan a diskusion.
4 Mabalinyo a sarunuen ti naipaima a libro a “Pudno a Talna ken Talged—Kasanoyo a Masarakan Dayta?” babaen ti ababa a presentasion a kas iti daytoy:
◼ “Dagiti pangulo ditoy lubong ita ket saanda a kabaelan nga iyeg iti talna ken talged. Ni Jehova a Dios laeng ti makaaramid iti dayta. Ipakita ti Biblia kadatayo no ania ti kasapulan nga aramiden. [Mailawlawag dagiti puntos idiay parapo 1 ken 2 iti panid 175, sa mabasa iti Isaias 26:4.] Kayatko nga ipakita kadakayo no kasano a makatulong daytoy a libro kadakayo.”
5 Mabalin a mairugi ti panagadal iti aniaman a kapitulo iti Panangbiruk iti Dios a libro, ngem gagangay a kayattayo nga idirekta kadakuada iti kapitulo 15 ken 16. Sumaganad, kalpasan ti adu a panagadal, kayattayo nga iyallatiw iti Agnanayon nga Agbiag a libro.
6 Inwayat ni Jehova ti perpekto nga ehemplo kas naayat a Pastor a mangtaripato iti karnerona. (Eze. 34:11-14) Ti napasnek a regtatayo a tumulad iti naayat a panangtaripatona ti mangparagsak kenkuana, mangipakita ti ayattayo, ken mangyeg iti bendision kadagiti dadduma.