Ania Dagiti Kalat nga Intuyangyon Para Kadagiti Annakyo?
1 Ti balligi iti biag agpannuray iti panangituyang ken panangragpat kadagiti makagunggona a kalat. Kasapulan ti sirib a mangutob no ania dagiti gandat a ragpaten tapno “mapetpetan a sititibker ti pudpudno a biag.” (1 Tim. 6:19) Anian a yamantayo ta ni Jehova, ipakitana kadatayo ti eksakto a dana a turongentayo!—Isa. 30:21.
2 Intuyang ni Jehova ti naimbag nga ehemplo kadagiti nagannak. Imbes a palubosan dagiti awanan kapadasan nga annak a mangpili no ania ti kasayaatan a dana, sanayen ida dagiti masirib a nagannak iti dana a rumbeng a papananda, ket inton tumaenganda, ‘didanto pagpanawan dayta.’ (Prov. 22:6) Ammo dagiti Kristiano a nagannak babaen iti kapadasan a masapul nga agtalekda ken Jehova. (Prov. 3:5, 6) Nangruna a kasapulan daytoy dagiti annak, ta limitadoda iti pannakaammo ken kapadasan.
3 Mabalin nga ituyang ti nagannak kadagiti annakda dagiti makagunggona a kalat a tumulong kadakuada a mangipamaysa kadagiti “napatpateg a bambanag.” (Fil. 1:10) Mairugida daytoy babaen iti panagadal ti pamilia, a paregtaen dagiti annak a mangipateg iti dayta. Nasayaat a mayugali dagiti annak ti agadal a nasakbay para kadagiti gimong ti kongregasion ken agsaganada nga agkomento iti bukodda a sao. Ti regular a pannakiraman iti panangasaba ket napateg. Mabalin a makibulig dagiti ubbing babaen iti panangitukonda kadagiti tract, wenno magasin, wenno agbasada iti kasuratan. No kabaelanda ti agbasa, bumadang kadakuada a rumang-ay iti naespirituan ti panagpalista iti Teokratiko nga Eskuelaan ti Panagministro. Ti pannakaikari a di bautisado nga agibumbunannag wenno iti bautismo ket dakkel nga irarang-ay.
4 Bayat a dumakkel dagiti annakda, masapul a napaypayso a kasarita ida dagiti nagannak maipapan kadagiti kalatda a karera. Nalaka laeng nga impluensiaan ida dagiti mammagbaga ti pagadalan ken kaadalanda a pumabor kadagiti materialistiko a gakat. Masapul a tulongan dagiti nagannak ti annakda a mangpili kadagiti kurso nga adalen a makaipaay iti praktikal a panagsanay, a mangkabal kadakuada a mangtaming iti material a kasapulanda a dida maisakripisio dagiti interes ti Pagarian. (1 Tim. 6:6-10) Mabalin a paregtaen ida a mangragpat iti “sagut” ti kinawaywayas ken kamaudiananna, no ikeddengda ti mangasawa, mabalindanto nga akmen dagiti nadagsen a rebbengen ti panagasawa. (Mat. 19:10, 11; 1 Cor. 7:36-38) Ti positibo a pannakisarita maipapan iti panagpayunir, ti mangipasagepsep kadagiti annak uray iti naganus nga edadda ti tarigagay a mangusar iti biagda iti wagas a makaay-ayo ken Jehova, a makagunggona iti dadduma, ken iti mismo a bagida.
5 Addaantay iti adu nga agtutubo iti organisasion itatta a mangsalsalimetmet kadagiti natan-ok a Nakristianuan a prinsipio ken mangsursurot kadagiti teokratiko a kalat. Kaaduan kadagiti balligida ket gapu kadagiti naayat a nagannak. No maysakayo a naganak, sadino ti madlawyo a turong dagiti annakyo? Narang-ay kadi ti panagabanteda iti biag a naipamaysa kadagiti interes ti Pagarian? Laglagipenyo, maysa kadagiti kapatgan a banag a maaramidyo isu ti panangitukit iti kinapudno kadagiti annakyo ken panangisao iti dayta nga inaldaw. Nalabit a mabendisionankayo iti maysa a sangakabbalayan a simamatalek nga agserserbi ken Jehova.—Deut. 6:6, 7; Jos. 24:15.