Ti Regular a Pannakigimong—Nasken iti Panagtakdertayo a Natibker
1 Kadagiti gimong ti kongregasion pagsasaritaantay dagiti nasayaat a kapanunotan ket maaruatantayo iti naespirituan a kabal tapno mabalintay “ti agtakder a sititibker maibusor kadagiti pangallilaw a pamuspusan ti Diablo.”—Efe. 6:11; Fil. 4:8.
2 Ipaay Dagiti Gimong ti Kasapulantayo: Kadagiti gimong a mayebkas dagiti kararag a mangidayaw iti Dios ken umararaw kenkuana kadagiti kasapulan ti kongregasion. (Fil. 4:6, 7) Ti pannakidanggay iti kankanta ti Pagarian parayrayennatayo ken tumulong kadatayo a mangyebkas iti riknatayo bayat nga agdayawtay ken Jehova. (Efe. 5:19, 20) Ti panaglalangentayo a sangsangkamaysa iti Kingdom Hall sakbay ken kalpasan dagiti gimong ti mamaregta kadatayo, pabilgennatayo, ken bang-arannatayo.—1 Tes. 5:11.
3 Itay napan nga Abril, sibibileg nga inggunamgunam ti espesial a palawag a “Ti Panungpalan ti Ulbod a Relihion Asidegen” ti kinaganat ti dagus nga iruruar manipud Babilonia a Dakkel. (Apoc. 18:4) Bayat ti Hunio ken Hulio, pudno a makatignay idi ti panangsaklaw kadagiti tallo nga artikulo [a naadal] iti Pagwanawanan maipapan kadagiti rimat ti lawag a nangraniag iti dana dagiti nalinteg! (Prov. 4:18) Panunotenyo dagiti nasaawtay koma no nagliwaytayo a timmabuno kadagidiay a gimong.
4 Kas itudo ti libro nga Organisado a Mangitungpal ti Ministeriotayo iti panid 72, ti Teokratiko nga Eskuelaan ti Panagministro ket maysa a probision a maipaay iti agtultuloy a pannakaisuro ti intero a kongregasion. Madama a matultulongantayo a mangkabesado iti historia ti organisasion babaen ti panangusar iti libro a Manangiwaragawag. Ditay kayat ti maikapis iti daytoy nga edukasion.
5 Kabalannatay ti Gimong ti Serbisio nga ad-adda nga epektibo iti ministerio. Inyilustrar daytoy ti gimong a nangawatantayo iti instruksion iti pannakaiwaras ti Kingdom News No. 34. Siwawadwad a binendisionan ni Jehova daytoy a trabaho, kas makita iti nagpaiduma a resultana iti sangalubongan. (Idilig ti 2 Corinto 9:6, 7.) Pinarayray dagidiay regular a tumabtabuno kadagiti gimong ti suporta a naited iti kampania.
6 Iti Panagadal ti Libro iti Kongregasion, ad-adda a nariknatay ti kinaganat babaen kadagiti bambanag a maad-adaltayo iti libro nga Apocalipsis. Babaen ti napardas a panaglabas dagiti pasamak iti lubong, masapul a maawatantayo ti kaitungpalan dagiti naun-uneg a padto ti Apocalipsis.
7 Iyun-una ti Regular a Pannakigimong: Kadagiti adu a daga mabigbig dagiti kakabsattayo ti kinapateg dagiti gimong iti kada lawas. Kas pagarigan, idiay Burundi, Rwanda, Liberia, ken Bosnia ken Herzegovina, nagadu dagiti agdadamo kadagiti gimong a ti tumabtabuno ket mamindua wenno mamitlo a daras ti kaaduda ngem iti dagup ti bilang dagiti agibumbunannag. Iti kastoy a pamay-an, tulongan ni Jehova dagiti kakabsat nga agtalinaed a natibker iti maymaysa nga espiritu.—Fil. 1:27; Heb. 10:23-25.
8 Asinoman a nagliway iti regular a pannakigimong ket masapul nga irugida koman nga aturen daytoy a turong. (Prov. 18:1; Ecl. 4:9-12) Tapno makapagtakdertayo a natibker, kasapulantay ti pannakipinnaregta kadagiti nataengan, kas ti ipapaay ti regular a pannakigimong.—Roma 1:11, 12.