Adda Kadi Masnup a Pedidoyo?
1 Napadasyo kadin ti napan iti taripnong para iti tay-ak ti serbisio ket natakuatanyo nga awan awityo a magasin? Bueno, lagipenyo ti suplemento ti Enero 1996 a Ti Ministeriotayo iti Pagarian a napauluan “Usaren Dagiti Magasintayo iti Kasayaatan.” Imbagana kadatayo nga addaantay koma “iti masinunuo a pedido a magasin,” a kunana: “Itedyo ti pedidoyo iti kabsat a mangas-asikaso kadagiti magasin a maipaay iti masinunuo a bilang ti kopia kada ruar. Iti kasta, maaddaankayo ken ti pamiliayo iti regular nga abasto dagiti magasin.” Inaramidyo kadin daytoy?
2 Apay a dikay agkiddaw iti masnup a pedido a magasin? Ad-addanto a mautobyo ti responsabilidadyo nga agiwaras kadagiti magasin iti linawas, ket masagrapyonto ti dakdakkel a rag-o no aramidenyo dayta. No addan masnup a pedidoyo, tingitingenyo manen no umdas met laeng ti kaadu ti magasin a kasapulanyo para iti kadawyan a bulan iti ministerio. Siempre, masapul a mapagtalkantayo a mangala iti pedidotayo iti kada lawas ket mariknatay koma nga obligasiontayo dayta. No agbakasionkayo iti mabayag, ipakaammoyo iti mangay-aywan ti magasin no kayatyo nga itedna dagiti magasinyo iti sabali agingga nga agsublikayo.
3 Ti isu met laeng a suplemento a nadakamat iti ngato kinunana pay a rumbeng a “mangyeskediul[tayo] iti regular nga aldaw ti panagmagasin.” Masuportaranyo kadi ti linawas nga Aldaw a Panagmagasin? Kas nailanad iti 1999 Calendar of Jehovah’s Witnesses, maaramid daytoy iti kada Sabado ti makatawen! Dikay tagtagibassiten ti pateg ti panagiwaras iti Pagwanawanan ken Agriingkayo! No ikagumaantayo ti makiraman a naan-anay iti panagiwaras iti magasin, ‘mangmangyegtayo iti naimbag a damdamag ti kinaimbag’ kadagiti kaarrubatayo.—Isa. 52:7.