Pamay-an a Mangtulong Kadakuada

Dagiti pudno a Kristiano makiramramanda iti publiko a ministerio a panangiwaragawag iti naimbag a damag. (Fil. 2:17) Tapno maitungpal dayta, sumagmamano a napateg a broshur, polieto, ken artikulo iti 20 a pagsasao ti addan iti site ti Internet a www.watchtower.org. Daytoy a Web site ket saan a nairanta a mangiwaras kadagiti kabaruan a publikasion kadagiti Saksi ni Jehova. Ti panggepna ket tapno maipakaammo iti publiko ti umiso nga impormasion maipapan iti isursuro dagiti Saksi ni Jehova manipud iti Biblia.

Iti nabiit pay, adda ti nagpateg a nainayon iti opisial a Web site-tayo. Daytoy ti broshur nga Ania ti Kalikaguman ti Dios Kadatayo? iti nasurok a 220 a pagsasao. Maysa pay, naikabilen ti adres ti Web site-tayo iti makinlikud nga akkub Ti Pagwanawanan ken Agriingkayo! iti amin a pagsasao. Nangrugi dayta iti Enero 1 ken Enero 8, 2004 a ruar.

Kasanoyo a mausar daytoy? Bueno, mabalin nga adda masarakanyo a kasla interesado ngem makaawat laeng iti sabali a pagsasao. No agus-usar iti Internet, mabalinyo nga ipakita ti adres iti makinlikud nga akkub Ti Pagwanawanan wenno Agriingkayo! Iti daytoy a pamay-an, mabalinna nga adalen ti broshur a Kalikaguman iti bukodna a pagsasao agingga a makapagsublikayo a mangted kenkuana iti literatura iti bukodna a lenguahe. Wenno mabalinyo nga ipabiang ti panangsarungkar kenkuana iti kongregasion wenno grupo nga agus-usar iti pagsasaona.