“Isu Mangted iti Bileg iti Daydiay Nabannog”
1 Adda dagiti panawen a mabannogtayo. Mabalin a saan laeng a ti trabaho wenno ti dadduma pay a pisikal nga aktibidad ti pakabannogantayo no di ket kadagiti pay parikut a pakaipaspasanguantayo kadagitoy “napeggad a tiempo a narigat a pakilangenan.” (2 Tim. 3:1) Kas ad-adipen ni Jehova, kasano nga agbalintayo a nabileg iti naespirituan tapno saan a bumannayat ti ministeriotayo? Maaramidtayo daytoy babaen ti panagpannuray iti daydiay ‘nakired ti pannakabalinna,’ ni Jehova. (Isa. 40:26) Ammona dagiti kasapulantayo ken talaga nga interesado a tumulong kadatayo.—1 Ped. 5:7.
2 Dagiti Probision ni Jehova: Pabpabilgennatayo ni Jehova babaen ti nasantuan nga espirituna, ti isu met laeng a nabileg a puersa nga inusarna a nangparsua iti uniberso. No mabannogtayo, ti espiritu ti Dios ti tumulong kadatayo a ‘mangpasubli iti bilegtayo.’ (Isa. 40:31) Iyimtuodyo iti bagiyo, ‘Kaano ti naudi a panagkararagko, nga espesipiko a kiniddawko ti nasantuan nga espiritu a mangpabileg kaniak a mangitungpal kadagiti obligasionko kas Kristiano?’—Luc. 11:11-13.
3 No inaldaw a basaen ken utobentayo ti naipaltiing a Sao ti Dios ken mataraonantayo iti naespirituan babaen ti regular a panangadal kadagiti Nakristianuan a publikasiontayo, agbalintayo a kas iti nalangto a “kayo a naimula iti igid dagiti pagayusan ti danum, a mangipaay iti bukodna a bunga iti panawenna ket dagiti bulongna saan a malaylay.”—Sal. 1:2, 3.
4 Us-usaren met ni Jehova dagiti kapammatiantayo, a mabalin a ‘mangpabileg’ kadatayo. (Col. 4:10, 11) Mapabilegdatayo kadagiti gimong ti kongregasion babaen kadagiti komento, palawag, ken iti makaparegta a pannakisaritada. (Ara. 15:32) Dagiti Kristiano a papanglakayen ti nangnangruna a mangipaay kadatayo iti naespirituan a tulong ken makapabang-ar a pammaregta.—Isa. 32:1, 2.
5 Ti Ministerio: Saankayo nga agsardeng a mangasaba uray no kasla nabambannogkayon! Iti kinapudnona, ti regular a pannakiraman iti ministerio ket makapabang-ar saan a kas iti adu a dadduma pay nga aktibidad. (Mat. 11:28-30) Ti panangiranud iti naimbag a damag tulongannatayo a mangipamaysa iti Pagarian ti Dios ken pagtalinaedennatayo a silalagip iti kinaagnanayon ken kadagiti nakaskasdaaw a namnama nga itdenna.
6 Nakaad-adu pay ti matrabaho sakbay a madadael daytoy a dakes a sistema. Adu ti panggapuantayo nga agtalinaed a natibker iti panagserbi, nga ‘agpannuraytayo iti bileg nga ipaay ti Dios.’ (1 Ped. 4:11) Babaen ti tulong ni Jehova, mairingpastayto ti trabahotayo, agsipud ta ‘itedna ti bileg iti daydiay nabannog.’—Isa. 40:29.