Saludsod
◼ Maitutop kadi nga agpalakpak ti tallaong kalpasan ti tunggal paset iti Teokratiko nga Eskuelaan ti Panagministro ken iti Gimong ti Serbisio?
Idi a ni Jehova a Namarsua imbangonna ti daga, “dagiti bituen ti agsapa sirarag-o a nagikkisda a sangsangkamaysa, ken ti amin nga annak ti Dios nangrugida a nagdir-i buyogen ti panangpadayaw.” (Job 38:7) Dagitoy nga anghel nga annak ti Dios tinarigagayanda nga idaydayaw ni Jehova gapu iti nakaskasdaaw a pinarsuana ta baro dayta a panangiparangarang iti kinasirib, kinaimbag, ken pannakabalinna.
Nasayaat nga iyebkastayo ti naimpusuan nga apresasion iti panangikagumaan dagiti kakabsattayo a mangiparang kadagiti pasetda. Kas pagarigan, gagangay a palpalakpakantayo dagiti palawag ken demostrasion kadagiti espesial a taripnong, kas kadagiti asamblea ken kombension. Ad-adu nga oras ken panagregget ti mabusbos iti panangisagana kadagiti paset a maidatag kadagita a taripnong. Ti panagpalakpaktayo ipakitana nga ap-apresiarentayo saan laeng a ti kinapinget ti ispiker no di ket agyamantayo iti instruksion nga ipapaay ni Jehova babaen ti Sao ken organisasionna.—Isa. 48:17; Mat. 24:45-47.
Ti ngay panangpalakpak kadagiti paset a maidatag iti Teokratiko nga Eskuelaan ti Panagministro ken iti Gimong ti Serbisio? Awan ti paglintegan a mangiparit iti panagpalakpak no la ket ta gagangay dayta a panangipakita iti apresasion, kas koma no naiparang ti estudiante ti damo a pasetna. Nupay kasta, ti panagpalakpak ket nalaka laeng nga agbalin a parparawpaw ken mapukaw ti kaipapananna. Gapu ta kasta, gagangay a saantayo nga agpalakpak kalpasan ti tunggal paset.
Nupay saantay a palpalakpakan ti kaaduan a paset iti Teokratiko nga Eskuelaan ti Panagministro ken iti Gimong ti Serbisio, adda dadduma pay a pamay-an a maipakitatay amin ti apresasiontayo kadagiti instruksion ken panagregget dagidiay agpaset. Maaramidtayo dayta babaen ti panagtalinaedtayo nga alerto ken dumngegtayo a naimbag kadagiti ispiker. Kalpasan ti gimong, masansan a mabalintay nga asitgan dagiti nagpaset tapno iyebkastayo ti apresasiontayo iti panagreggetda a nangiparang kadagiti pasetda.—Efe. 1:15, 16.