Panangipakita iti Panagyaman iti Kasayaatan a Sagut ti Dios
1. Apay nga agyamantayo unay ken Jehova?
1 Kadagiti adu a “naimbag a sagut” ni Jehova, ti subbot nga impaay ti patpatgenna nga Anak ti kasayaatan. (Sant. 1:17) Gapu iti daytoy, adu a bendision ti mabalintayo nga awaten, a pakairamanan ti pannakapakawan dagiti basoltayo. (Efe. 1:7) Gapuna, kanayon nga agyamyamantayo. Kabayatan ti panawen ti Memorial, nangnangruna nga iwayaantayo nga utoben ti maipapan iti daytoy a nagpateg a sagut.
2. Kasanotayo a mapatanor ti apresasiontayo iti subbot, kas pamilia ken kas indibidual?
2 Panangpatanor iti Apresasion: Tapno mapatanor ti pamiliayo ti panangipategda iti subbot, nasayaat no repasuenyo dagiti impormasion maipapan iti subbot kabayatan ti Sangapamiliaan a Panagdaydayawyo iti rabii kadagiti lawas sakbay ti Marso 30. Mabalinyo met nga usigen kas pamilia ti espesial a panagbasa iti Biblia a nakaeskediul iti panawen ti Memorial. Utobenyo kas indibidual no kasano a nagunggonaankayo iti subbot ken no ania ti epekto dayta iti panangmatmatyo ken Jehova, iti bagiyo, kadagiti sabsabali, ken iti masanguananyo. Nasayaat met no ensayuenyo a kantaen ti dua a baro a kanta a makanta inton Memorial, ti kanta numero 8 ken 109.—Sal. 77:12.
3. Kasanotayo a mayebkas ti panagyamantayo?
3 Dagiti Ebkas ti Panagyaman: Ti panangapresiar iti subbot tignayennatayo a mangisarsarita kadagiti sabsabali iti maipapan ken Jehova ken iti naindaklan nga ayatna babaen ti panangisakripisiona iti Anakna. (Sal. 145:2-7) Kabayatan ti Marso, Abril, ken Mayo, adda dagiti pamilia a mangyebkas iti apresasionda babaen ti panangaramidda kadagiti urnos tapno makapag-auxiliary pioneer ti uray maysa laeng a miembro ti pamiliada. No saanyo a maaramidan daytoy, mabalinyo kadi ti ‘gumatang iti tiempo’ tapno ad-adu ti panawenyo a makiraman iti ministerio? (Efe. 5:16) Ti kinamanagyaman tignayennatayo met a tumulong kadagiti sabsabali tapno makaduatayo ida a tumabuno iti Memorial. (Apoc. 22:17) Rugianyon nga ilista dagiti sarsarungkaran, iyad-adalan, kakabagian, katrabahuan, ken kakaarruba nga awisenyo, sa makiramankayo a naan-anay iti espesial a kampania a panagiwaras iti imbitasion iti Memorial.
4. Kadagiti ania a pamay-an a mausartayo a nainsiriban ti panawen ti Memorial?
4 Ti panawen ti Memorial ipaayannatayo kadagiti baro nga oportunidad a mangiparangarang no kasano kauneg ti panangapresiartayo iti sagut ni Jehova iti sangatauan. Sapay koma ta usarentayo daytoy a tiempo a mangparayray ken mangyebkas iti panagyamantayo iti subbot ken iti amin a “di matukod a kinabaknang ti Kristo.”—Efe. 3:8.