Ti Memorial Tulongannatayo a Mangipakita iti Kinamanagyaman

1. Ania a naisangsangayan a gundaway ti ipaay ti Memorial?

¹ Ti Memorial inton Abril 14 ket mangted iti naisangsangayan a gundaway a mangparayray ken mangipakita iti panagyamantayo iti kinaimbag ni Jehova. Ipakita ti salaysay iti Lucas 17:11-18 ti panangmatmat ni Jehova ken Jesus iti kinamanagyaman. Nakalkaldaang ta maysa laeng kadagiti sangapulo nga agkukutel a napaimbag ti nagyaman ken Jesus. Iti masanguanan, gapu iti sagut a subbot, mapaimbagto amin a sakit ken agbiagtayto nga agnanayon! Sigurado nga inaldaw nga agyamantayto ken Jehova gapu kadagita a bendision. Ngem kadagiti mapaspasungad a lawas, kasanotayo a maipakita a managyamantayo?

2. Kasanotayo a maparayray ti panagyamantayo iti subbot?

² Panangparayray iti Kinamanagyaman: Ti isiptayo ti mangtignay kadatayo nga agyaman. Tapno rumayray ti panangapresiartayo iti subbot, adda nayeskediul nga espesial a panagbasa iti Biblia iti Memorial a masarakan iti kalendario ken iti Panangsukimat iti Kasuratan iti Inaldaw. Apay a saanyo nga usigen daytoy nga impormasion kas pamilia? No aramidentayo daytoy, rumayray ti panangapresiartayo iti subbot. Nasayaat met ti epekto daytoy iti kababalintayo.—2 Cor. 5:14, 15; 1 Juan 4:11.

3. Bayat ti panawen ti Memorial, kasanotayo a maipakita a managyamantayo?

³ Panangipakita iti Kinamanagyaman: Makita ti kinamanagyaman babaen ti aramid. (Col. 3:15) Ti managyaman nga agkukutel inkagumaanna a binirok ni Jesus tapno agyaman. Awan duadua a sigagagar met a nangisarsarita iti milagro a pannakapaimbagna. (Luc. 6:45) Ti kadi panagyamantayo iti subbot tignayennatayo a makiraman a sireregta iti kampania a panangiwaragawag iti Memorial? Ti sabali pay a pamay-an a maipakitatayo ti panagyamantayo ket ti panag-auxiliary pioneer wenno panangnayon iti panawentayo a makiraman iti ministerio bayat ti panawen ti Memorial. Iti rabii ti Memorial, no addaantayo iti puso a managyaman, matignaytayo a mangabrasa kadagiti bisita ken sidadaantayo a mangsungbat kadagiti saludsodda.

4. Ania ti aramidentayo tapno awan ti pagbabawyantayo iti panawen ti Memorial?

⁴ Daytoy kadin ti maudi a Memorial nga angayentayo? (1 Cor. 11:26) Saantay nga ammo. Ngem ammotayo nga apaman a lumabas daytoy, lumabas met ti naisangsangayan a gundawaytayo a mangipakita iti panagyaman. Gundawayanyo kadi dayta? Sapay koma ta dagiti sasaotayo a napnuan iti apresasion ken ti panagmennamenna ti pusotayo ket mangyeg iti rag-o ken Jehova, a sipaparabur a nangipaay iti subbot.—Sal. 19:14.