Dagiti Magasintayo—Nadisenio a Makaay-ayo iti Adu a Tattao
1. Kasano a tultuladen ti klase matalek ken masirib nga adipen ni apostol Pablo?
1 Kas ken apostol Pablo a nangibagaybagay iti wagas a panangidatagna iti naimbag a damag tapno magun-odna ti “amin a kita ti tattao,” ti klase matalek ken masirib nga adipen us-usarenna dagiti literaturatayo a mangdanon kadagiti tattao a nagduduma ti kasasaad ken patpatienda. (1 Cor. 9:22, 23) Tapno mausartayo a naimbag Ti Pagwanawanan ken Agriingkayo! nasayaat no laglagipentayo no siasino dagiti mangbasa kadagitoy a magasin.
2. Ti Agriingkayo! ket nairanta a tumulong kadagiti siasino?
2 Agriingkayo!: Daytoy a magasin ket nairanta a tumulong kadagiti kita ti tattao a kas kadagiti “lallaki a taga Atenas” a nakasarita ni apostol Pablo. (Ara. 17:22) Dagita a lallaki ket saan a Kristiano ken bassit laeng ti ammoda maipapan iti Kasuratan. Umasping iti dayta, nadisenio ti Agriingkayo! para kadagiti tattao a bassit wenno awan pay ketdi ti ammoda maipapan iti Biblia. Mabalin a saanda nga ammo dagiti Nakristianuan a sursuro, mabalin nga awan panagtalekda iti relihion, wenno mabalin a saanda nga ammo dagiti praktikal a pateg ti Biblia. Ti kangrunaan a panggep ti Agriingkayo! ket tapno makombinsir dagiti tattao nga adda ti pudno a Dios. Panggep pay daytoy a magasin a tulongan dagiti agbasbasa a maaddaan iti pammati iti Biblia ken makitada a dagiti Saksi ni Jehova ket naiduma kadagiti sabali a relihion.
3. Siasino ti nakairantaan ti publiko nga edision ken ti pagadalan nga edision Ti Pagwanawanan?
3 Ti Pagwanawanan: Ti publiko nga edision daytoy a magasin ket nairanta para kadagiti addaan iti panagraem iti Dios ken iti Kasuratan. Addaanda iti pannakaammo iti Biblia ngem saan nga umiso ti pannakatarusda kadagiti pannursuro a nailanad iti dayta. Kapadpadada dagiti dimngeg ken Pablo a dinakamatna kas dagiti “agbuteng iti Dios.” (Ara. 13:14-16) Ti pagadalan nga edision Ti Pagwanawanan ket agpaay kadagiti Saksi ni Jehova. Pinanunot ni Pablo a dagiti mangbasa kadagiti suratna ket pamiliar iti Kasuratan ken umiso ti pannakaammoda iti kinapudno. (1 Cor. 1:1, 2) Umasping iti dayta, dagiti artikulo iti pagadalan nga edision ket para kadagiti tumabtabuno kadagiti gimongtayo ken pamiliar kadagiti termino ken sursuro dagiti Saksi.
4. Apay a kabesaduentayo ti tunggal ruar dagiti magasin nga usarentayo iti tay-ak?
4 Uray no agpada nga ituktukontayo dagiti magasin, gagangay a maysa laeng ti itampoktayo iti presentasiontayo. Gapuna, ikagumaanyo a kabesaduen ti tunggal ruar dagiti magasin. Iti kasta, ammoyo no ania ti itampokyo a makapainteres kadagiti makasabaanyo.