Pagtuladan a Presentasion

Panangirugi iti Panangyadal iti Biblia iti Umuna a Sabado iti Marso

“Adu a tattao ti mangramrambak iti pannakayanak ni Jesus, ngem iti panagkunayo, napateg kadi a laglagipentayo met ti ipapatayna?” Palubosanyo a sumungbat. Kalpasanna, ikkanyo ti bumalay iti kopia ti Marso 1 a Pagwanawanan sa pagsaritaanyo ti material iti babaen ti umuna a subtitulo iti panid 16 ken ti uray maysa laeng kadagiti teksto. Ibagayo nga agsublikayto tapno pagsaritaanyo ti sumaruno a saludsod.

Ti Pagwanawanan Marso 1

“Nakaad-adu ti sekta ken relihion a nagduduma dagiti patpatien ken ar-aramidda. Iti panagkunayo, amin ngata nga agkunkuna a Kristiano ket talaga a Kristiano? [Palubosanyo a sumungbat.] Sigun ken Jesus, daytoy ti maysa kadagiti pakabigbigan dagiti pudno a Kristiano. [Basaenyo ti Juan 13:34, 35.] Ilawlawag daytoy a magasin dagiti lima nga imbaga ni Jesus a pakabigbigan dagiti pudno a pasurotna.”

Agriingkayo! Marso

“Makisarsaritakami kadagiti kaarrubami maipapan iti saan a nasayaat nga ugali nga agraraira ita. Agparang a dagiti tattao ita ket managpungtot ken naglaka a pumudot ti ulona. Ania ti ammoyo a makagapu? [Palubosanyo a sumungbat.] Imutektekanyo no ania ti kuna ti Biblia maipapan iti panagpungtot. [Basaen ti Salmo 37:8.] Ilawlawag daytoy a magasin ti sumagmamano kadagiti rason no apay a nalaka a makapungtot dagiti tattao ita ken no ania ti aramidentayo tapno makapagteppeltayo.”