Pagtuladan a Presentasion

Panangirugi iti Panangyadal iti Biblia iti Umuna a Sabado iti Mayo

“Iti panagkunayo, itantandudo kadi ti relihion ti ayat ken kappia wenno gura ken kinaranggas? [Palubosanyo a sumungbat.] Adda kayatko nga ipakita kadakayo a makapainteres nga impormasion maipapan iti daytoy.” Itedyo iti bumalay ti Mayo 1 a Pagwanawanan sa usigenyo ti material iti babaen ti umuna a subtitulo iti panid 16 ken ti uray maysa laeng a teksto. Ipaimayo dagiti magasin sa ibagayo nga agsublikayto tapno pagsaritaanyo ti sungbat ti sumaruno a saludsod.

Ti Pagwanawanan Mayo 1

“Patien ti adu a nasayaat no makibiang ti relihion iti politika, idinto ta kuna met dagiti dadduma a saan a rumbeng a makibiang ti relihion iti politika. Ania ti makunayo? [Palubosanyo a sumungbat.] Kitaenyo no ania ti reaksion ni Jesus idi kayat dagiti tattao a makiraman iti politika idi kaaldawanna. [Basaenyo ti Juan 6:15.] Ilawlawag daytoy a magasin no apay a kasta ti reaksion ni Jesus ken no ania ti kasayaatan a maitulong dagiti Kristiano iti komunidadda.”

Agriingkayo! Mayo

“Dandani amin a nakasaritami ket nakapasaren iti di patas a pannakatrato. Iti panagkunayo, adda ngata solusion ti kinaawan hustisia? [Palubosanyo a sumungbat.] Imutektekanyo daytoy a padto maipapan iti agturay a mamagpatingga iti kinaawan hustisia. [Basaenyo ti Salmo 72:11-14.] Ilawlawag daytoy a magasin dagiti kari ti Biblia maipapan iti masanguanan nga agrairanton ti hustisia.”