Usarenyo a Naimbag Dagiti Daan a Magasin
Awan ti magunggonaan kadagiti daan a magasin no idulin wenno ibellengtayo, isu nga ikagumaantayo nga ipaima dagita. Ti maysa a magasin kabaelanna a tukayen ti interes ti maysa a tao iti kinapudno ken mangtignay kenkuana nga umawag iti nagan ni Jehova. (Roma 10:13, 14) Dagitoy ti sumagmamano a singasing no kasano nga usaren a naimbag dagiti daan a magasin.
No mangasabakayo kadagiti teritoria a manmano a maasak ket awan ti madanonyo a bumalay, mabalinyo ti mangibati iti magasin iti lugar a saan a makita dagiti aglabas.
No mangasabakayo iti publiko kadagiti lugar a pagurayan dagiti tattao, kas kadagiti estasion ti bus wenno tren, saludsodenyo kadagiti tattao no kayatda ti agbasa, ipakitayo ti sumagmamano a daan a ruar dagiti magasin sa pagpilienyo ida.
No mapankayo kadagiti opisina, beauty parlor, klinika, wenno dadduma pay nga umasping a lugar iti teritoriayo, mangibatikayo iti sumagmamano a daan a magasin iti waiting area. Nasayaat no dumawatkayo iti pammalubos iti parabantay. No makitayo nga adda naikabilen a magasin, saankayon a mangikabil iti kanayonan a kopia.
No agsagsaganakayo a sumarungkar, panunotenyo no ania ti paginteresan dagiti planoyo a sarungkaran. Adda kadi pamiliana? Kaay-ayona kadi ti agpasiar? Magusgustuanna kadi ti agmula? Kitaenyo dagiti daan a magasin no adda artikulo a mabalin a paginteresanna sa itedyo kenkuana inton sumarungkarkayo.
No madanonyo ti interesado a tao a saanyo a nadandanon iti sumagmamano a panagsarungkaryo, ipakitayo dagiti daan a magasin a saanyo a naited kenkuana.