Apay a Saan a Makapagkakapia Dagiti Tattao?—Ania ti Ibaga ti Biblia?

Saan a kaya dagiti lider ti lubong ken internasional nga organisasion nga ipaay ti kappia ditoy lubong. Sipud idi Gubat Sangalubongan II, ad-adu itan ti mapaspasamak a panaglalaban. Agarup dua a bilion a tattao—kakapat ti bilang ti populasion ti lubong—ti aggigian kadagiti lugar nga apektado kadagiti kasta a panaglalaban.

Apay a saan a kaya nga ipaay ti tao ti talna? Ania ti ibaga ti Biblia?

Tallo a rason no apay a saan a maipaay ti tao ti talna

1. 1. Marigatan dagiti tattao a makikappia gapu kadagiti saan a nasayaat nga ugalida. Impakpakauna ti Biblia nga iti panawentayo, “ay-ayatento laeng dagiti tattao ti bagbagida, managayat iti kuarta, napangas, natangsit, . . . saan a matalek, . . . saanda a kayat ti makitulag, . . . awanan panagteppel, nauyong, . . . natangken ti uloda, [ken] napannakkel.”—2 Timoteo 3:2-4.

2. 2. Saan a kabaelan dagiti tattao, kas indibidual wenno kas grupo, a solbaren dagiti problemada no awan ti tulong ti Namarsua a ni Jehovaa a Dios. Ibagbaga ti Biblia a “saan a naikkan ti tao iti autoridad a mangiturong uray iti addangna.”—Jeremias 10:23.

3. 3. Ti lubong ket im-impluensiaan ti maysa a nabileg ken dakes nga agturay, ni Satanas a Diablo, “a mangal-allilaw iti intero a mapagnaedan a daga.” (Apocalipsis 12:9) Agingga a “ti intero a lubong ket adda iti pannakabalin daydiay managdakdakes,” addanto nga adda gubat ken panaglalaban.—1 Juan 5:19.

Asino ti makaipaay iti talna?

Ipasigurado ti Biblia a ti Dios ti mangipaayto iti talna, saan a dagiti tattao.

• “‘Ta sigurado nga ammok ti pampanunotek para kadakayo,’ kuna ni Jehova, ‘ikkankayo iti talna, saan a didigra, tapno maaddaankayo iti nasayaat a masakbayan ken namnama.’”—Jeremias 29:11.

Kasano a tungpalen ti Dios dayta a kari? ‘Ti Dios a mangted iti talna asidegen a rumekenna ni Satanas.’ (Roma 16:20) Usarento ti Dios ti nailangitan a gobierno, nga aw-awagan ti Biblia a “Pagarian ti Dios,” a mangyeg iti talna iti intero a lubong. (Lucas 4:43) Inton iturayanen ni Jesu-Kristo nga Ari dayta a Pagarian ti intero a daga, masursuruanto dagiti tattao a makikappia iti maysa ken maysa.—Isaias 9:6, 7.

• Tapno maammuam ti ad-adu pay, basaem ti artikulo nga “Anianto ti Aramiden ti Pagarian ti Dios?”