OPISIAL TI PALASIO
Ti Hebreo a sao a sa·risʹ a naipatarus nga “opisial ti palasio” (1Ar 22:9) ket mabalin met nga ipatarus a “eunuko” (Est 2:3; Isa 56:3) ken “opisial” (Ge 40:2, 7). Naipatarus dayta iti Genesis 37:36 (KJ) kas “opisial,” ket addaan dayta iti komento iti marhin a kunana: “Ngem tumukoy daytoy a sao saan laeng a kadagiti eunuko, no di ket kadagiti pay mayordomo, agserserbi iti palasio, ken kadagiti opisial.” Ti Griego a sao a eu·nouʹkhos a naipatarus a “eunuko” ket mabalin a tumukoy iti maysa nga opisial ti palasio (Ara 8:27) wenno iti tao a saan a makaputot wenno makapataud iti anak.—Mt 19:12.
Pagarupen ti kaaduan a dagiti opisial ti palasio ket lallaki a mangay-aywan kadagiti pribado a siled wenno adu a kuarto ti maysa a palasio wenno mansion, kas koma ken Blasto a mayordomo ni Ari Herodes. (Ara 12:20) (Nupay kasta, ti naaramat ditoy ket ti Griego a termino nga e·piʹ tou koi·toʹnos, ti “agay-aywan iti siled a pagturogan.”) Ngem nagduduma unay dagiti annongen ti tunggal opisial iti palasio ti ari. Da Bigtan ken Teres ket opisial ti palasio ti Medo-Persia ken talken nga ad-adipen, nga agparang nga annongenda ti panangbantay iti ruangan ti pribado a siled ni Ari Asuero. (Est 2:21) Ti dadduma nga opisial ti palasio ket nagserbi iti mismo nga ari. (Est 1:10, 11) Dakamaten ti Biblia a ti sumagmamano nga opisial ti palasio ket lallaki nga adda akemda iti militar. (2Ar 25:19) Ti maysa a “kangrunaan nga opisial ti palasio” idiay Babilonia ket naparebbengan a mangdutok iti agaywan kada Daniel, Hananias, Misael, ken Azarias apaman a nakasangpetda idiay Babilonia idi nga impan ni Nabucodonosor idiay Babilonia da Ari Jehoiaquin ken ti sumagmamano a Judio idi 617 K.K.P.—Da 1:3, 7, 11.
Agparang a saan nga amin nga opisial ti palasio ket literal a eunuko, kayatna a sawen, nakapon a lallaki. Dagiti literal a eunuko masansan nga isuda ti mangay-aywan kadagiti siled ti babbai, wenno harem ti maysa nga ari. Ngem saan a kasapulan a makapon dagiti opisial nga agserbi kas panguluen nga agaw-awit iti kopa (maysa a nangato a saad) ken panadero, nupay mabalin a eunukodan sakbay a naital-oda kadagita a saad. (Ge 40:2) Iti palasio ni Faraon, adda asawa ni Potifar, maysa nga opisial ti palasio ken panguluen dagiti para-guardia. (Ge 39:1) Ti Etiope a “eunuko” a binautisaran ni Felipe a managebanghelio ket lalaki nga addaan pannakabalin, kas agay-aywan iti isuamin a gameng ni Reyna Candace. Isu ket proselita iti Judio a relihion, managdaydayaw ken Jehova, iti sidong ti Linteg. Isu ket saan a literal a eunuko, ta awan idi ti kapon a tao a makastrek iti kongregasion ti Israel ken malaksid kadagiti Judio ken dagiti proselita awanen ti sabali pay a nabautisaran sakbay ti pannakakomberte ni Cornelio. (Ara 8:26-38; 10:24, 34, 35, 44-47; De 23:1) Pinaayaban ni David dagiti amin nga opisial ti palasiona (a mayanatup a saanda a literal a eunuko maigapu iti kababalin dagiti Judio ken ti Linteg), agraman dagiti prinsipe ken nabibileg a lallaki, tapno ipakaammona kadakuada a nadutokan ti anakna a ni Solomon a mangibangon iti templo ni Jehova.—1Cr 28:1-6; kitaenyo ti KOPA, AGAW-AWIT ITI; MAYORDOMO.