Maparmekyo ti Pannakaupay!

INSURAT ti maysa a masirib a tao: “Impakitam kadi a naupayka iti aldaw ti rigat? Kurangto ti bilegmo.” (Proverbio 24:10, NW) No napadasanyon ti naupay, mabalin nga anamonganyo dagita a sasao.

Awan ti tao a di makarikna iti pannakaupay. Ti bassit a pannakaupay ket mabalin nga agpaut iti maysa wenno dua nga aldaw santo maep-ep. Ngem no nairaman ti sakit ti nakem wenno panagpasugnod, mabalin a napapaut pay ti parikut. Adda dagiti Kristiano a matalek iti adun a tawen ngem naupay iti kasta unay nga uray la saandan a makigimgimong ken mangaskasaba.

No maupaykayo, papigsaenyo ti nakemyo! Dagiti nagkauna a matalek nga adipen naparmekda ti pannakaupay, ket kabaelanyo met dayta babaen ti tulong ti Dios.

No Addada Mangsair iti Riknayo

Diyo namnamaen a maliklikanyo ti tunggal nagubsang a sao wenno darasudos nga aramid. Nupay kasta, adda mabalinyo nga aramiden tapno saanda a malapdan dagiti pagkurangan ti sabsabali ti panagserbiyo ken Jehova. No adda nangsair iti riknayo, makatulong ti panangusig no kasano a nagtignay ni Anna, ti ina ni Samuel, iti makapaupay a kasasaad.

Tinarigagayan unay ni Anna ti maaddaan iti annak, ngem isu ket lupes. Nakaputoten ni lakayna iti lallaki ken babbai, iti maikadua nga asawana a ni Penina. Imbes koma a maasian gapu iti sasaaden ni Anna, imbilang ni Penina kas maysa a karibal ken trinatona a nakagapu iti ‘panagsangit ken saan a pannangan’ ni Anna.​—1 Samuel 1:2, 4-7.

Iti maysa nga aldaw, simrek ni Anna iti tabernakulo tapno agkararag. Nasiputan ni Eli, ti nangato a padi ti Israel, nga aggargaraw ti bibig ni Anna. Gapu ta dina ammo nga agkarkararag ni Anna, impagarup ni Eli nga isu ket nabartek. “Agingga iti kaano ti kaaddamto a nabartek?” kinunana. “Yadayom ta arakmo kenka.” (1 Samuel 1:12-14) Mailadawanyo kadi ti posible a narikna ni Anna? Napan idiay tabernakulo tapno maparegta. Sigurado a dina ninamnama a babalawen ti maysa kadagiti kalatakan a lallaki ti Israel!

Napalalo koma ti pannakaupay ni Anna iti daydi a pasamak. Mabalin koma a pimmanaw a dagus idiay tabernakulo, nga inkarina a dinton pulos agsubli sadiay bayat a ni Eli pay la ti nangato a padi. Nupay kasta, nalawag nga impateg ni Anna ti relasionna ken Jehova. Ammona nga agladingit ti Dios no kasdiay ti inaramidna. Ti tabernakulo idi ti sentro ti pudno a panagdayaw. Insaad ni Jehova ti naganna sadiay. Ken nupay imperpekto ni Eli, isu ti pinili ni Jehova a pannakabagina.

Ti nadayaw nga isusungbat ni Anna iti pammabalaw ni Eli ket maysa a nagsayaat a pagwadantayo ita. Nupay dina impalubos a mapabasol iti di umiso, simmungbat a buyogen ti nauneg a panagraem. “Saan, apok!” kinunana. “Siak maysaak a babai a naladingit ti espirituna: diak imminum iti arak wenno iti naingel nga inumen, no di ket imbukbukko ti kararuak iti sango ni Jehova. Dika koma ibilang ti adipenmo a maysa a babai a dakes, ta iti kinawadwad ti ladingitko ken ti unnoyko nagsaoak agingga ita.”​—1 Samuel 1:15, 16.

Nagikalintegan kadi ni Anna? Wen. Ngem sitatanang a nakisao ken Eli, a saanna a sikukuspag a binabalaw gapu iti di umiso a pammabasolna. Kas resultana, napnuan asi a simmungbat ni Eli, a kunana: “Inka a sitatalna; ket ti Dios ti Israel itedna koma kenka ti dawatmo a dinawatmo kenkuana.” Apaman a narisut ti parikut, ‘nagawid [ni Anna], ket nangan; ket ti rupana saan idin a silaladingit.’​—1 Samuel 1:17, 18.

Ania ti masursurotayo iti daytoy a salaysay? Dagus a nagtignay ni Anna tapno maatur ti di pagkinnaawatan, ngem buyogen ti nauneg a panagraem. Kas resultana, nagtultuloy a nasayaat ti relasionna ken Jehova ken ni Eli. Masansan a malapdan ti ikakaro dagiti nalag-an a parikut babaen ti nasayaat a komunikasion ken bassit a kinatanang!

Nasken a bigbigen ti agsinnumbangir a dasig a masapul nga agbalinda a napakumbaba ken mannakibagay tapno marisut dagiti di pagkikinnaawatan. No agkedked ti maysa a kapammatian iti panagreggetyo a makikappia kenkuana, mabalin nga ipabiangyon dayta ken Jehova, nga agtalekkayo a tamingenna dayta iti panawen ken pamay-an nga ikeddengna.

Naawanankay Kadi iti Pribilehio?

Nagladingit ti dadduma iti pannakapukaw ti impatpategda a pribilehio iti panagserbi iti Dios. Tinagiragsakda ti agserbi kadagiti kakabsat, ket idi napukaw dayta a pribilehio, impapanda nga awanen pategda ken ni Jehova ken iti organisasionna. No kasta ti mariknayo, mabalin a maawatanyo a naimbag dagiti bambanag no usigenyo ti napasamak iti mannurat iti Biblia a ni Marcos, a naawagan met iti Juan Marcos.​—Aramid 12:12.

Kimmuyog ni Marcos kada Pablo ken Bernabe iti umuna a panagdaliasatda kas misionero, ngem bayat ti panagbaniagada, pinanawanna ida sa nagsubli sadi Jerusalem. (Aramid 13:13) Idi agangay, kayat ni Bernabe nga ikuyog manen ni Marcos iti sabali a panagdaliasatda. Nupay kasta, kuna ti Biblia: “Impagarup ni Pablo a di umiso ti panangikuyogda iti daytoy a maysa, yantangay simmina kadakuada manipud Pamfilia ket saan a kimmuyog kadakuada iti trabaho.” Saan nga immanamong ni Bernabe. “Gapu itoy,” kuna pay ti salaysay, “adda bimtak a nakaro a panagpungtot, iti kasta [da Pablo ken Bernabe] nagsinada a dua; ket ni Bernabe inkuyogna ni Marcos ket naglayag a nagturong idiay Chipre. Ni Pablo pinilina ni Silas ket nagluas.”​—Aramid 15:36-40.

Mabalin a nagsakit ti nakem ni Marcos idi naammuanna a di kayat ti mararaem nga apostol Pablo ti makipagtrabaho kenkuana ken ti panagsupiat maipapan iti kualipikasionna ket nagbanag iti panagsina da Pablo ken Bernabe. Ngem saan a nagpatingga dita ti estoria.

Kasapulan pay la idi da Pablo ken Silas ti kaduada nga agdaliasat. Idi nakagtengda idiay Listra, nakasarakda iti kasukat ni Marcos, ti agtutubo a managan Timoteo. Nalabit a dua wenno tallo a tawen pay la a nabautisaran ni Timoteo idi napili. Iti kasumbangirna, naitimpuyogen ni Marcos iti kongregasion Kristiano manipud pay iti pannakaipasdek dayta​—kinapudnona, nabaybayag ngem ni Pablo a mismo. Kaskasdi, ni Timoteo ti naipaayan iti pribilehio nga agserbi.​—Aramid 16:1-3.

Ania ti reaksion ni Marcos idi nadamagna a naisukat kenkuana ti ub-ubing, kurang kapadasanna a lalaki? Saan nga ibaga ti Biblia. Nupay kasta, ipasimudaagna a nagtultuloy nga aktibo ni Marcos iti panagserbi ken Jehova. Inaprobetsarna dagiti pribilehio a nailukat kenkuana. Nupay saanen a nakapagserbi a kadua da Pablo ken Silas, nagdaliasatda ken Bernabe a napan idiay Chipre, ti pagtaengan a teritoria ni Bernabe. Nagserbi met ni Marcos a kadua ni Pedro idiay Babilonia. Kamaudiananna, naaddaan iti gundaway a makipagtrabaho ken Pablo​—ken ni Timoteo​—idiay Roma. (Colosas 1:1; 4:10; 1 Pedro 5:13) Idi agangay, napaltiingan pay ketdi ni Marcos a mangisurat iti maysa kadagiti uppat nga Ebanghelio!

Adda napateg a maadal iti daytoy. Saan a nalabes ti pannakaseknan ni Marcos iti napukaw a pribilehio a nanglapped koma kenkuana a mangapresiar kadagiti pribilehio a silulukat pay la kenkuana. Nagtalinaed ni Marcos a nagaget iti panagserbi ken Jehova, ket binendisionan ni Jehova.

Isu a no naawanankayo iti pribilehio, dikay koma maupay. No taginayonenyo ti positibo a kababalin ken agtalinaedkay a naagawa, mabalin a makaawatkayto iti dadduma pay a pribilehio. Adu ti mabalin nga aramiden iti trabaho ti Apo.​—1 Corinto 15:58.

Naupay ti Matalek nga Adipen

Saan a nalaka ti makidangadang a sipipinget agpaay iti pammati. Adda dagiti tiempo a nalabit maupaykayo. Kalpasanna mabalin a makonsiensiakayo gapu ta naupaykayo, a panunotenyo a saan koma a kasta ti rikna ti maysa a matalek nga adipen ti Dios. Panunotenyo ni Elias, maysa kadagiti kangrunaan a propeta iti Israel.

Idi a naammuan ti reyna ti Israel a ni Jezebel, maysa a panatiko a promotor ti panagdayaw ken Baal, a pinapatay ni Elias dagiti propeta ni Baal, insapatana nga ipapatayna ni Elias. Napadasen ni Elias a sinaranget dagiti kabusor a nabilbileg ngem ni Jezebel, ngem pagammuan ta naupay ket tinarigagayanna ti matay. (1 Ar-ari 19:1-4) Apay a napasamak dayta? Adda banag a nalipatanna.

Nalipatan ni Elias ti agpannuray ken Jehova kas Gubuayan ti bilegna. Siasino aya ti nangted ken Elias iti pannakabalin a mangpagungar iti natay ken mangsango kadagiti propeta ni Baal? Ni Jehova. Awan duadua a maited ni Jehova kenkuana ti bileg a kasapulanna a mangsango iti pungtot ni Reyna Jezebel.​—1 Ar-ari 17:17-24; 18:21-40; 2 Corinto 4:7.

Mabalin nga adda kanito a kumapuy ti panagtalek ti asinoman ken Jehova. Kas ken Elias, mabalin a matmatanyo no dadduma ti maysa a parikut sigun iti panirigan ti tao imbes a tamingenyo dayta babaen “ti sirib manipud ngato.” (Santiago 3:17) Nupay kasta, saan a binaybay-an ni Jehova ni Elias gapu iti daytoy apagkanito a panagbiddutna.

Nagkamang ni Elias idiay Beer-sheba sa nagpalet-ang, nga iti panagkunana ket awan makasarak kenkuana. Ngem nasarakan ni Jehova. Nangibaon iti maysa nga anghel a mangliwliwa kenkuana. Sinigurado ti anghel a maipaayan ni Elias iti kalutluto a tinapay a taraon ken makarepresko a danum nga inumen. Idi nakainanan ni Elias, binilin ti anghel nga agdaliasat iti agarup 300 kilometro agingga idiay Bantay Horeb, ti lugar a pangpabilgan pay ni Jehova kenkuana.​—1 Ar-ari 19:5-8.

Idiay Bantay Horeb, naimatangan ni Elias ti makapabileg-pammati a panangiparangarang ni Jehova iti pannakabalinna. Kalpasanna, sitatanang ken siaalumamay nga impanamnama ni Jehova kenkuana nga isu ket saan nga agmaymaysa. Nupay saan nga ammo ni Elias, kaduana ni Jehova ken ti 7,000 kadagiti kakabsatna. Kamaudiananna, inikkan ni Jehova iti annongen. Saanna nga inlaksid ni Elias kas propetana!​—1 Ar-ari 19:11-18.

Adda Sidadaan a Tumulong

No pasaray makariknakayo iti bassit a pannakaupay, mabalin a kasapulanyo ti kanayonan a panaginana wenno makapasalibukag a taraon tapno mabang-arankayo. Ni Nathan H. Knorr, a nagserbi kas miembro ti Bagi a Manarawidwid dagiti Saksi ni Jehova agingga iti ipapatayna idi 1977, napaliiwna a masansan a kasla lumag-an unay dagiti parikut no adda umdas a turog iti agpatnag. Ngem no agtultuloy latta ti parikut, nalabit saan nga umdas ti kasta a remedio​—masapulyon ti agpatulong tapno maparmek ti pannakaupay.

Nangibaon idi ni Jehova iti anghel a mangpabileg ken Elias. Iti kaaldawantayo, ipapaay ni Jehova ti pammaregta babaen dagiti panglakayen ken dadduma a nataengan a Kristiano. Pudno nga agserbi dagiti panglakayen a “kas maysa a paglemmengan no agangin.” (Isaias 32:1, 2) Ngem mabalin a nasken nga umasidegkay kadakuada tapno maparegtadakayo. Nupay napalalo idi ti pannakaupayna, napan ni Elias idiay Bantay Horeb tapno agpaiwanwan ken Jehova. Makagun-odtayo iti makapabileg a pannursuro babaen ti kongregasion Kristiano.

No agpatulong ken situtured a sanguentayo dagiti suot, kas iti pannakasair ti rikna wenno pannakapukaw dagiti pribilehio, maitandudotayo ti dasig ni Jehova iti maysa a napateg nga isyu. Ania nga isyu? Kinuna ni Satanas nga agserserbi laeng dagiti tattao ken Jehova gapu iti bukodda a pagimbagan. Ammo ni Satanas nga agserbitayo iti Dios no nanam-ay ti biagtayo, ngem kunana a ditay agserbin iti Dios no marigatantayo. (Job, kapitulo 1 ken 2) No agtultuloytayo nga agserbi ken Jehova uray adda pannakaupay, makatulongtayo a mangsungbat iti pammardaya ti Diablo.​—Proverbio 27:11.

Nagparikut da Anna, Marcos, ken ni Elias a namagladingit kadakuada iti apagbiit. Nupay kasta, naparmekda dagiti parikutda ket naaddaanda iti makapnek a biag. Babaen ti tulong ni Jehova, maparmekyo met ti pannakaupay!