Panangapresiar ken Jesus​—Ti Natantan-ok a David ken Natantan-ok a Solomon

“Adtoy! maysa a nangnangruna ngem ni Solomon ti adda ditoy.”​—Mat. 12:42.

1, 2. Iti panangmatmat ti tao, apay a kasla saan a nakappapati a ni David ti naibilin a pulotan ni Samuel nga agbalin nga ari?

KASLA saan nga agbalin nga ari. Isu ket maysa laeng nga agtutubo a pastor iti panangmatmat ni propeta Samuel. Ken saan a nalatak ti ili a nakayanakanna, ti Betlehem. Natukoy dayta a lugar kas “nakabasbassit tapno mairaman kadagiti rinibu ti Juda.” (Mik. 5:2) Nupay kasta, daytoy kasla awan pategna nga agtutubo manipud iti bassit nga ili ket dandanin pulotan ni propeta Samuel kas masanguanan nga ari ti Israel.

² Ni agtutubo a David, ti inaudi kadagiti walo nga annak a lallaki ni Jesse, ket saan nga isu ti immuna nga imparang ni amana ken Samuel tapno mapulotan. Saan met nga isu ti maikadua wenno maikatlo nga imparangna. Awan pay ketdi ni David idi napan ni Samuel iti balay ti matalek a lalaki a ni Jesse tapno pulotanna ti maysa kadagiti annakna kas sumaruno nga ari iti pagilian. Ngem ni David ti pinili ni Jehova, ket dayta ti napateg.​—1 Sam. 16:1-10.

3. (a) Ania ti napateg ken Jehova no sukimatenna ti maysa a tao? (b) Ania ti napasamak kalpasan ti pannakapulot ni David?

³ Nakita ni Jehova ti saan a makita ni Samuel. Mabasa ni Jehova ti puso ni David, ket naay-ayo iti nakitana. Saan a ti makinruar a langa ti napateg iti Dios no di ket ti makin-uneg a kinatao ti maysa. (Basaen ti 1 Samuel 16:7.) Isu nga idi naamiris ni Samuel nga awan kadagiti pito nga in-inauna nga annak ni Jesse ti pinili ni Jehova, kiniddawna a maayaban ti inaudi manipud iti pagpastoran. Kuna ti salaysay: “Iti kasta [ni Jesse] nagbaon ket pinaumayna [ni David]. Ita isu lumabbasit, agtutubo a napintas dagiti matana ken nataer ti langana. Idin kinuna ni Jehova: ‘Tumakderka, pulotam, ta isu daytoy!’ Iti kasta innala ni Samuel ti sara ti lana ket pinulotanna iti tengnga ti kakabsatna. Ket ti espiritu ni Jehova nangrugi nga agtignay ken David manipud iti dayta nga aldaw ken agpatpatuloy.”​—1 Sam. 16:12, 13.

Ni David Inyanninawna ni Kristo

4, 5. (a) Mangdakamat iti sumagmamano a nagpadaan da David ken Jesus. (b) Apay a maibilang ni Jesus kas ti Natantan-ok a David?

⁴ Kas ken David, nayanak ni Jesus idiay Betlehem agarup 1,100 a tawen kalpasan ti pannakayanak ni David. Kasla saan met nga agbalin nga ari ni Jesus iti panangmatmat ti adu, kayatna a sawen, saan nga isu ti ari a ninamnama ti adu nga Israelita. Ngem kas ken David, isu ti pinili ken dungdungnguen ni Jehova.a (Luc. 3:22) Malaksid iti dayta, ‘ti espiritu ni Jehova nagtignay met kenkuana.’

⁵ Adda pay dadduma a nagpadaanda. Kas pagarigan, no kasano a ni David ket liniputan ti mammalakadna a ni Ahitofel, ni Jesus ket liniputan met ti apostolna a ni Judas Iscariote. (Sal. 41:9; Juan 13:18) Agpada nga umap-apuy ti regtada maipaay iti lugar a pagdayawan ken Jehova. (Sal. 27:4; 69:9; Juan 2:17) Ni Jesus ti agtawid iti trono ni David. Sakbay a nayanak ni Jesus, imbaga ti anghel iti inana a ni Maria: “Ni Jehova a Dios itednanto kenkuana ti trono ni David nga amana.” (Luc. 1:32; Mat. 1:1) Ni Jesus, ti Mesianiko nga Ari a nabayagen a sinegseggaan dagiti tattao, ket natantan-ok ngem ni David gapu ta matungpal kenkuana ti amin a kari mainaig iti Mesias.​—Juan 7:42.

Surotenyo ti Ari a Pastor

6. Kadagiti ania a pamay-an a ni David ket nasayaat a pastor?

⁶ Ni Jesus ket maysa met a pastor. Ania dagiti galad ti nasayaat a pastor? Isu ket maysa a matalek ken natured a mangaywan, mangpakan, ken mangsalaknib iti arbanna. (Sal. 23:2-4) Kas agtutubo, ni David ket maysa a pastor, ken inaywananna a naimbag dagiti karnero ni amana. Simamaingel nga inrisgona ti biagna tapno masalakniban dagiti karnero manipud iti panangraut ti leon ken oso.​—1 Sam. 17:34, 35.

7. (a) Ania ti nangisagana ken David kadagiti annongenna kas ari? (b) Kasano a pinaneknekan ni Jesus nga isu ti Nasayaat a Pastor?

⁷ Adu a tawen ti binusbos ni David a nangipastor kadagiti karnero iti away. Dayta ti nangisagana kenkuana kadagiti nadagsen nga annongen ken responsabilidad a mangipastor iti nasion ti Israel.b (Sal. 78:70, 71) Impakita met ni Jesus nga isu ket mapagulidanan a pastor. Pinabileg ken inwanwan ni Jehova bayat nga ay-aywananna ti “bassit nga ipastoran” ken ti “sabsabali a karnero.” (Luc. 12:32; Juan 10:16) Iti kasta, pinaneknekan ni Jesus nga isu ti Nasayaat a Pastor. Am-ammona a naimbag ti arbanna nga uray la mainagananna ti tunggal maysa kadakuada. Kasta unay ti panagayatna kadagiti karnerona isu a bayat ti kaaddana ditoy daga, sidadaan a nagsakripisio agpaay iti pagimbaganda. (Juan 10:3, 11, 14, 15) Kas ti Nasayaat a Pastor, intungpal ni Jesus ti maysa a banag a di pulos naaramidan ni David. Ti pangsubbot a datonna ti nangted iti gundaway tapno mawayawayaan ti sangatauan manipud ken patay. Awan ti makalapped kenkuana a mangiwanwan iti “bassit nga ipastoran” nga agturong iti imortal a biag idiay langit ken mangidalan iti “sabsabali a karnero” nga agturong iti agnanayon a biag iti nalinteg a baro a lubong nga awanan kadagiti arig lobo a manangdangran.​—Basaen ti Juan 10:27-29.

Surotenyo ti Nabileg nga Ari

8. Apay a makuna a nabileg nga ari ni David?

⁸ Kas ari, ni David ket maingel a mannakigubat a nangsalaknib iti daga ti ili ti Dios, ken “intultuloy ni Jehova nga insalakan ni David sadinoman a napananna.” Iti sidong ti panangidaulo ni David, limmawa ti masakupan ti nasion manipud iti karayan ti Egipto agingga iti karayan ti Eufrates. (2 Sam. 8:1-14) Iti tulong ni Jehova, nagbalin ni David a kabilgan nga agturay. Kuna ti Biblia: “Ti panagdindinamag ni David nangrugi nga agsaknap iti amin a dagdaga, ket ti panagalinggaget kenkuana inkabil ni Jehova a mismo kadagiti amin a nasion.”​—1 Cron. 14:17.

9. Ilawlawagyo no kasano a nabileg ni Jesus kas ti Nadutokan nga Ari.

⁹ Umasping ken Ari David, natured met ni Jesus. Kas ti Nadutokan nga Ari, impakitana a nabilbileg ngem kadagiti demonio babaen ti panangparuarna kadakuada manipud kadagiti tattao a linugananda. (Mar. 5:2, 6-13; Luc. 4:36) Uray ti kangrunaan a kabusor a ni Satanas a Diablo dina kabaelan ni Jesus. Iti tulong ni Jehova, naparmek ni Jesus ti lubong nga iturturayan ni Satanas.​—Juan 14:30; 16:33; 1 Juan 5:19.

10, 11. Ania ti akem ni Jesus kas Mannakigubat nga Ari idiay langit?

¹⁰ Agarup 60 a tawen kalpasan a nagungar ken nagpalangit ni Jesus, nasirmata ni apostol Juan ti naipadto nga akem ni Jesus kas Mannakigubat nga Ari idiay langit. Insurat ni Juan: “Adtoy! maysa a puraw a kabalio; ket daydiay sisasakay iti dayta addaan iti bai; ket naited kenkuana ti maysa a korona, ket rimmuar a mangparmek ken tapno an-anayenna ti panagballigina.” (Apoc. 6:2) Ni Jesus ti nakasakay iti puraw a kabalio. “Naited kenkuana ti maysa a korona” idi 1914, idi naitrono kas Ari iti nailangitan a Pagarian. Kalpasanna, “rimmuar a mangparmek.” Wen, kas ken David, nabileg nga ari ni Jesus. Di nagbayag kalpasan a naitrono kas Ari iti Pagarian ti Dios, pinarmekna ni Satanas ket intapuakna ditoy daga agraman dagiti demoniona. (Apoc. 12:7-9) Agtultuloy ti naballigi a panagsakayna agingga nga “an-anayenna ti panagballigina,” inton ikisapna ti intero a dakes a sistema ni Satanas.​—Basaen ti Apocalipsis 19:11, 19-21.

¹¹ Ngem kas ken David, naasi nga ari ni Jesus, ket salaknibanna ti “dakkel a bunggoy” inton Armagedon. (Apoc. 7:9, 14) Malaksid iti dayta, ‘agungarto agpadpada dagiti nalinteg ken dagiti nakillo’ iti sidong ti panangituray ni Jesus ken dagiti kakaduana nga agtawid, dagiti napagungar a 144,000. (Ara. 24:15) Dagidiay mapagungar ditoy daga addaandanto iti namnama nga agbiag nga agnanayon. Anian a nagraniag a masanguanan ti agur-uray kadakuada! Sapay koma ta determinadotayo amin nga agtultuloy nga ‘agaramid iti naimbag,’ tapno agbiagtayo ditoy daga a mapno kadagiti nalinteg ken naragsak a tattao nga iturayan ti Natantan-ok a David.​—Sal. 37:27-29.

Nasungbatan ti Kararag ni Solomon Maipaay iti Sirib

12. Ania ti inkararag ni Solomon?

¹² Ni Solomon nga anak ni David inyanninawna met ni Jesus.c Idi nagbalin nga ari ni Solomon, nagpakita kenkuana ni Jehova babaen ti tagtagainep. Kinuna ti Dios nga itedna iti ari ti aniaman a kiddawenna. Mabalin koma a kiniddaw ni Solomon ti ad-adu a kinabaknang, pannakabalin, wenno napapaut a biag. Nupay kasta, saan nga agpaay iti bagina ti kiniddawna ken Jehova: “Itdem kaniak ita ti sirib ken pannakaammo tapno makaruarak iti sanguanan daytoy nga ili ken tapno makastrekak, ta siasino ti makabalin a mangukom iti daytoy dakkel nga ilim?” (2 Cron. 1:7-10) Sinungbatan ni Jehova ti kararag ni Solomon.​—Basaen ti 2 Cronicas 1:11, 12.

13. Kasano nga awan ti pumatas iti kinasirib ni Solomon, ken asino ti Gubuayan ti siribna?

¹³ Idi matalek pay ni Solomon kenni Jehova, awan kadagiti kapatadanna ti pumatas iti kinasiribna. Makapagsao ni Solomon iti “tallo ribu a proverbio.” (1 Ar. 4:30, 32, 34) Adu kadagitoy ti naisurat ken agtultuloy nga ipatpateg dagidiay agsapsapul iti sirib. Nagdaliasat ti reyna ti Sheba iti agarup 2,400 a kilometro tapno subokenna ti kinasirib ni Solomon babaen “kadagiti makatikaw a saludsod.” Nagamanga kadagiti sasao ni Solomon ken iti kinarang-ay ti pagarianna. (1 Ar. 10:1-9) Tinukoy ti Biblia ti Gubuayan ti sirib ni Solomon idi kinunana: “Ti amin a tattao iti daga sapsapulenda idi ti rupa ni Solomon tapno denggenda ti siribna nga inkabil ti Dios iti pusona.”​—1 Ar. 10:24.

Surotenyo ti Masirib nga Ari

14. Kadagiti ania a pamay-an a ni Jesus ket “maysa a nangnangruna ngem ni Solomon”?

¹⁴ Maysa laeng a tao ti nalawag a nakaartap iti sirib ni Solomon. Isu ni Jesu-Kristo, a nangtukoy iti bagina kas “maysa a nangnangruna ngem ni Solomon.” (Mat. 12:42) Nakapagsao ni Jesus iti “sasao ti agnanayon a biag.” (Juan 6:68) Kas pagarigan, ti Sermonna iti Bantay ket nangipaay iti kanayonan a panangilawlawag kadagiti prinsipio ti dadduma a proverbio ni Solomon. Dinakamat ni Solomon ti sumagmamano a banag a mangyeg iti kinaragsak kadagiti agdaydayaw ken Jehova. (Prov. 3:13; 8:32, 33; 14:21; 16:20) Impaganetget ni Jesus a ti pudno a kinaragsak ket aggubuay kadagiti bambanag mainaig iti panagdayaw kenni Jehova ken iti pannakatungpal dagiti karina. Kinunana: “Naragsak dagidiay sipapanunot iti naespirituan a kasapulanda, yantangay kukuada ti pagarian ti langlangit.” (Mat. 5:3) Dagidiay mangyaplikar kadagiti prinsipio nga insuro ni Jesus ad-adda a sumingedda ken Jehova, “ti ubbog ti biag.” (Sal. 36:9; Prov. 22:11; Mat. 5:8) Ni Kristo ti mangibagi iti “sirib ti Dios.” (1 Cor. 1:24, 30) Kas Mesianiko nga Ari, addaan ni Jesu-Kristo iti “espiritu ti kinasirib.”​—Isa. 11:2.

15. Kasano a magunggonaantayo manipud iti nadiosan a sirib?

¹⁵ Kas pasurot ti Natantan-ok a Solomon, kasano a magunggonaantayo manipud iti nadiosan a sirib? Yantangay naipalgak ti sirib ni Jehova iti Saona, nasken nga ikagumaantayo a biroken dayta babaen ti naannad a panagadal iti Biblia, nangnangruna kadagiti nailanad a sasao ni Jesus, ken babaen ti panangutob kadagiti mabasatayo. (Prov. 2:1-5) Maysa pay, masapul nga itultuloytayo ti agkiddaw iti sirib manipud iti Dios. Ipanamnama kadatayo ti Sao ti Dios a masungbatan dagiti napasnek a kararagtayo maipaay iti tulong. (Sant. 1:5) Iti tulong ti nasantuan nga espiritu, makabiroktayo kadagiti arig saniata a sirib iti Sao ti Dios a tumulong kadatayo a mangrisut kadagiti parikut ken mangaramid kadagiti nainsiriban a desision. (Luc. 11:13) Natukoy pay ni Solomon kas “ti manangummong” a ‘nagtultuloy a nangisuro kadagiti tattao iti pannakaammo.’ (Ecl. 12:9, 10) Ni Jesus, kas Ulo ti kongregasion Kristiano, ummongenna met dagiti pasurotna. (Juan 10:16; Col. 1:18) Gapuna, masapul a tumabunotayo kadagiti gimong ti kongregasion, a sadiay ket ‘agtultuloy a masursuruantayo.’

16. Ania ti nagpadaan da Solomon ken Jesus?

¹⁶ Adu ti nagapuanan ni Solomon kas ari. Inyurnosna ti panagibangon a proyekto iti intero a pagilian, immatonanna ti pannakaaramid dagiti palasio, kalsada, pagurnongan iti danum, siudad a pagidulinan, siudad ti karuahe, ken siudad a maipaay kadagiti kumakabalio. (1 Ar. 9:17-19) Nagunggonaan ti intero a pagarian gapu kadagita a proyektona. Nagibangon met ni Jesus. Imbangonna ti kongregasionna iti “dakkel a bato.” (Mat. 16:18) Imatonannanto pay ti trabaho a panagibangon a maaramid iti baro a lubong.​—Isa. 65:21, 22.

Surotenyo ti Ari ti Talna

17. (a) Ania ti kasasaad bayat ti panagturay ni Solomon? (b) Ania ti saan a naibanag ni Solomon?

¹⁷ Ti nagan a Solomon ket nagtaud iti sao a kaipapananna “talna.” Nagturay ni Ari Solomon idiay Jerusalem, ti nagan a kaipapananna “Naruay a Talna.” Kabayatan ti 40 a tawen a panagturayna, nagari ti awan kaaspingna a talna iti nasion ti Israel. Kuna ti Biblia maipapan kadagidi a tawtawen: “Ti Juda ken ti Israel nagtultuloy nga agnaed iti kinatalged, tunggal maysa iti sirok ti bukodna a puon ti ubas ken iti sirok ti bukodna a kayo a higos, manipud Dan agingga idiay Beer-seba, iti amin nga al-aldaw ni Solomon.” (1 Ar. 4:25) Nupay nakasirsirib ni Solomon, dina nawayawayaan dagiti iturayanna manipud iti pannakaadipenda iti sakit, basol, ken ipapatay. Ngem ti Natantan-ok a Solomon wayawayaanna dagiti iturayanna manipud kadagita.​—Basaen ti Roma 8:19-21.

18. Ania dagiti kasasaad a tagtagiragsakentayo iti uneg ti kongregasion Kristiano?

¹⁸ Uray ita, adda talna iti uneg ti kongregasion Kristiano. Kinapudnona, tagtagiragsakentayo ti naespirituan a paraiso. Addaantayo iti natalna a relasion iti Dios ken kadagiti padatayo a tattao. Imutektekanyo ti impadto ni Isaias maipapan kadagiti kasasaad a mapaspasarantayo ita: “Pitpitendanto dagiti kampilanda a pagbalinen a subsob ti arado ken dagiti pikada a pagbalinen a pangarbas a getgetteng. Ti nasion saanto a mangitag-ay iti kampilan maibusor iti nasion, saandanto met a sursuruenen ti pannakigubat.” (Isa. 2:3, 4) Babaen ti panagtignay a maitunos iti espiritu ti Dios, adda maitulongtayo a mangpangayed iti naespirituan a paraiso.

19, 20. Ania dagiti rason nga agrag-otayo?

¹⁹ Ngem nasaysayaatto pay ti masanguanan. Bayat a tagtagiragsaken dagiti natulnog a tattao ti awan kaaspingna a talna iti sidong ti turay ni Jesus, in-inut a ‘mawayawayaandanto iti pannakaadipen iti panagrupsa’ agingga nga agbalinda a perpekto. (Roma 8:21) Kalpasan a malasatanda ti maudi a pannubok iti ngudo ti Sangaribu a Tawen a Panagturay, “dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.” (Sal. 37:11; Apoc. 20:7-10) Wen, ti turay ni Kristo Jesus artapanna ti turay ni Solomon kadagiti pamay-an a ditay pay mailadawan!

²⁰ No kasano a nagrag-o ti Israel iti sidong ti panangiwanwan da Moises, David, ken Solomon, ad-addanto pay nga agrag-otayo iti panangituray ni Kristo. (1 Ar. 8:66) Agyamantayo ken Jehova ta intedna kadatayo ti bugbugtong nga Anakna​—ti Natantan-ok a Moises, David, ken Solomon!

[Footnotes]

Mailawlawagyo Kadi?

• Kasano a ni Jesus ti Natantan-ok a David?

• Kasano a ni Jesus ti Natantan-ok a Solomon?

• Ania ti apresiarenyo iti Natantan-ok a David ken Natantan-ok a Solomon?

[Ladawan iti panid 31]

Ti inted ti Dios a sirib ken Solomon iyanninawna ti sirib ti Natantan-ok a Solomon

[Ladawan iti panid 32]

Ti turay ni Jesus artapanna ti turay da Solomon ken David kadagiti pamay-an a ditay pay mailadawan!